GSAT 11 ಉಪಗ್ರಹ ಯಶಸ್ವೀ ಉಡ್ಡಯನ, ಇಸ್ರೋದ ಸಾಧನೆಗೆ ಮತ್ತೊಂದು ಗರಿ: ಹೈಸ್ಪೀಡ್ ಇಂಟರ್‌ನೆಟ್‌ ಸೇವೆಯೇ ಗುರಿ

0
478

ಹಲವು ತಿಂಗಳುಗಳ ನಿರೀಕ್ಷೆಯ ಬಳಿಕ ಭಾರತದ ಅತ್ಯಧಿಕ ತೂಕದ (5,854 ಕೆಜಿ) ಜಿಸ್ಯಾಟ್‌-11 ಉಪಗ್ರಹ ಫ್ರೆಂಚ್‌ ಗಯಾನಾದಿಂದ ಡಿಸೆಂಬರ್ 5 ರ ಬುಧವಾರ ಬೆಳಗಿನ ಜಾವ 2.07ಕ್ಕೆ ಯಶಸ್ವಿಯಾಗಿ ಉಡಾವಣೆಗೊಂಡಿದೆ. ಏರಿಯಾನ್‌ಸ್ಪೇಸ್‌ನ ಏರಿಯಾನ್‌-5 ರಾಕೆಟ್‌ ಭಾರತದ ಈ ಅತ್ಯಾಧುನಿಕ ಶಕ್ತಿಶಾಲಿ ಸಂವಹನ ಉಪಗ್ರಹ ಜಿಸ್ಯಾಟ್-11 ಮತ್ತು ದಕ್ಷಿಣ ಕೊರಿಯಾದ ಜಿಯೋ- ಕಾಂಪ್‌ಸ್ಯಾಟ್‌-2ಎ ಉಪಗ್ರಹವನ್ನು ನಿರ್ದಿಷ್ಟ ಕಕ್ಷೆಗಳಿಗೆ ಸೇರಿಸಿತು.

ಹೊಸದಿಲ್ಲಿ: ಹಲವು ತಿಂಗಳುಗಳ ನಿರೀಕ್ಷೆಯ ಬಳಿಕ ಭಾರತದ ಅತ್ಯಧಿಕ ತೂಕದ (5,854 ಕೆಜಿ) ಜಿಸ್ಯಾಟ್‌-11 ಉಪಗ್ರಹ ಫ್ರೆಂಚ್‌ ಗಯಾನಾದಿಂದ ಬುಧವಾರ ಬೆಳಗಿನ ಜಾವ 2.07ಕ್ಕೆ ಯಶಸ್ವಿಯಾಗಿ ಉಡಾವಣೆಗೊಂಡಿದೆ. ಏರಿಯಾನ್‌ಸ್ಪೇಸ್‌ನ ಏರಿಯಾನ್‌-5 ರಾಕೆಟ್‌ ಭಾರತದ ಈ ಅತ್ಯಾಧುನಿಕ ಶಕ್ತಿಶಾಲಿ ಸಂವಹನ ಉಪಗ್ರಹ ಜಿಸ್ಯಾಟ್-11ಮತ್ತು ದಕ್ಷಿಣ ಕೊರಿಯಾದ ಜಿಯೋ- ಕಾಂಪ್‌ಸ್ಯಾಟ್‌-2ಎ ಉಪಗ್ರಹವನ್ನು ನಿರ್ದಿಷ್ಟ ಕಕ್ಷೆಗಳಿಗೆ ಸೇರಿಸಿತು. 

29 ನಿಮಿಷಗಳ ಉಡಾವಣೆ ಅವಧಿಯಲ್ಲಿ ಜಿಸ್ಯಾಟ್‌-11 ರಾಕೆಟ್‌ನಿಂದ ಬೇರ್ಪಟ್ಟು ಯಶಸ್ವಿಯಾಗಿ ನಿಗದಿತ ಕಕ್ಷೆ ಸೇರಿತು. ಇದಾಗಿ ನಾಲ್ಕು ನಿಮಿಷಗಳ ಬಳಿಕ ಕೊರಿಯನ್ ಉಪಗ್ರಹವನ್ನು ರಾಕೆಟ್‌ನಿಂದ ಪ್ರತ್ಯೇಕಿಸಿ ಕಕ್ಷೆಗೆ ಸೇರಿಸಲಾಯಿತು. 

ಜಿಸ್ಯಾಟ್‌-11 ಕೆಯು ಬ್ಯಾಂಡ್ ಹಾಗೂ ಕೆಎ ಬ್ಯಾಂಡ್‌ನ ಶಕ್ತಿಯುತ 40 ಟ್ರಾನ್ಸ್‌ಪಾಂಡರ್‌ಗಳನ್ನು ಹೊಂದಿದ್ದು, 14 ಜಿಬಿಪಿಎಸ್ ವೇಗದ ಡೇಟಾ ವರ್ಗಾವಣೆ ಸಾಮರ್ಥ್ಯ ಹೊಂದಿದೆ. ಉಪಗ್ರಹದ ಜೀವಿತಾವಧಿ 15 ವರ್ಷಗಳಾಗಿದ್ದು, ದೇಶಾದ್ಯಂತ ಅತಿ ವೇಗದ ಇಂಟರ್ನೆಟ್‌ ಸಂಪರ್ಕದ ವಿಸ್ತರಣೆಗೆ ನೆರವಾಗಲಿದೆ. 

ಯಶಸ್ವೀ ಉಡ್ಡಯನದ ಬಳಿಕ ಏರಿಯಾನ್‌ಸ್ಪೇಸ್‌ನ ಸಿಇಓ ಸ್ಟೀಫನ್ ಇಸ್ರೇಲ್‌ ಅವರು ಇಸ್ರೋದ ಮುಖ್ಯಸ್ಥ ಕೆ. ಶಿವನ್ ಮತ್ತು ಬೆಂಗಳೂರು ಕೇಂದ್ರಿತ ಯು.ಆರ್ ರಾವ್ ಉಪಗ್ರಹ ಕೇಂದ್ರದ ನಿರ್ದೇಶಕ ಪಿ. ಕುಂಞಿಕೃಷ್ಣನ್‌ ಅವರನ್ನು ಅಭಿನಂದಿಸಿದರು. ಭಾರತದ ಬಾಹ್ಯಾಕಾಶ ಸಂಸ್ಥೆ ಜತೆಗಿನ ನಂಟು 1991ರಿಂದಲೇ ಇದ್ದು, ಇಂದಿನ ಉಡ್ಡಯನದೊಂದಿಗೆ ಅದು ಮತ್ತಷ್ಟು ಬಲಗೊಂಡಿದೆ ಎಂದು ಸ್ಟೀಫನ್ ಇಸ್ರೇಲ್ ನುಡಿದರು. 

ಏರಿಯಾನಾಸ್ಪೇಸ್‌ಗೆ ಕೃತಜ್ಞತೆ ಸಲ್ಲಿಸಿ ಮಾತನಾಡಿದ ಶಿವನ್‌, ‘ಭಾರತದ ಮೊದಲ ಹೈಪರ್‌ಪೆಕ್ಟ್ರಲ್ ಇಮೇಜಿಂಗ್‌ ಉಪಗ್ರಹದ (ಹೈಸಿಸ್‌) ಯಶಸ್ವೀ ಉಡಾವಣೆಯ 6 ದಿನಗಳ ಬಳಿಕ ದೇಶದ ಅತ್ಯಧಿಕ ತೂಕದ ಜಿಸ್ಯಾಟ್-11 ಉಪಗ್ರಹದ ಉಡಾವಣೆ ಯಶಸ್ವಿಯಾಗಿರುವುದು ಇಸ್ರೋದ ಸಾಧನೆಯಲ್ಲಿ ಮತ್ತೊಂದು ಮೈಲುಗಲ್ಲು. ಇದರ ಸಂಪೂರ್ಣ ಯಶಸ್ಸು ಇಸ್ರೋತಂಡಕ್ಕೆ ಸಲ್ಲುತ್ತದೆ’ ಎಂದು ನುಡಿದರು.