55 ಸಾವಿರ ನಕಲಿ ಕಂಪನಿಗಳು ವಜಾ : ಕೇಂದ್ರ ಸರ್ಕಾರ

0
412

ಅಕ್ರಮ ವ್ಯವಹಾರಗಳಿಗೆ ಪೂರಕವಾಗಿರುವ ನಕಲಿ ಕಂಪನಿಗಳ ವಿರುದ್ಧದ ಸಮರವನ್ನು ಕೇಂದ್ರ ಸರಕಾರ ಮುಂದುವರಿಸಿದೆ. ಎರಡನೇ ಹಂತದಲ್ಲಿ 55,000 ನಕಲಿ ಕಂಪನಿಗಳನ್ನು ವಜಾ ಮಾಡಿರುವುದಾಗಿ ಸರಕಾರವು ಸೆಪ್ಟೆಂಬರ್ 21 ರ ಶುಕ್ರವಾರ ತಿಳಿಸಿದೆ.

ಹೊಸದಿಲ್ಲಿ : ಅಕ್ರಮ ವ್ಯವಹಾರಗಳಿಗೆ ಪೂರಕವಾಗಿರುವ ನಕಲಿ ಕಂಪನಿಗಳ ವಿರುದ್ಧದ ಸಮರವನ್ನು ಕೇಂದ್ರ ಸರಕಾರ ಮುಂದುವರಿಸಿದೆ. ಎರಡನೇ ಹಂತದಲ್ಲಿ 55,000 ನಕಲಿ ಕಂಪನಿಗಳನ್ನು ವಜಾ ಮಾಡಿರುವುದಾಗಿ ಸರಕಾರವು ಶುಕ್ರವಾರ ತಿಳಿಸಿದೆ. ಅಲ್ಲದೇ, ಕೆಲವು ಕಂಪನಿಗಳಿಗೆ ನೋಟಿಸ್‌ ನೀಡಲಾಗಿದ್ದು, ಅವುಗಳ ಮೇಲೆ ನಿಗಾ ಇಡಲಾಗಿದೆ ಎಂದು ಸರಕಾರ ಹೇಳಿದೆ. 

ಈಗಾಗಲೇ ಕಾರ್ಪೊರೇಟ್‌ ವ್ಯವಹಾರಗಳ ಸಚಿವಾಲಯವು 2.26 ಲಕ್ಷ ಕಂಪನಿಗಳನ್ನು ನೋಂದಣಿ ಪಟ್ಟಿಯಿಂದ ತೆಗೆದುಹಾಕಿದೆ. ನಿರಂತರವಾಗಿ ಎರಡು ವರ್ಷಗಳ ಅವಧಿಯಲ್ಲಿ ವಾರ್ಷಿಕ ರಿಟರ್ನ್ಸ್‌ ಅಥವಾ ಫೈನಾನ್ಸಿಯಲ್‌ ಸ್ಟೇಟ್‌ಮೆಂಟ್‌ಗಳನ್ನು ಸಲ್ಲಿಸಲು ವಿಫಲವಾಗಿದ್ದ 2 ಲಕ್ಷಕ್ಕೂ ಅಧಿಕ ಕಂಪನಿಗಳನ್ನು ಮೊದಲ ಹಂತದಲ್ಲಿ ವಜಾ ಮಾಡಲಾಗಿತ್ತು. 

”ಸರಕಾರದ ನಿಯಮಗಳನ್ನು ಪಾಲಿಸದ ಕಂಪನಿಗಳ ಮಾನ್ಯತೆಯನ್ನು ರದ್ದುಗೊಳಿಸಲಾಗಿದೆ. ಇವುಗಳಲ್ಲಿ ಬಹುತೇಕ ಬೋಗಸ್‌ ಕಂಪನಿಗಳಿರುವುದು ಕಂಡು ಬಂದಿದೆ. 400ಕ್ಕೂ ಅಧಿಕ ಕಂಪನಿಗಳು ಕೇವಲ ಒಂದೇ ಕೊಠಡಿಯಂಥ ವಿನ್ಯಾಸಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದವು,” ಎಂದು ಕಾರ್ಪೊರೇಟ್‌ ವ್ಯವಹಾರಗಳ ಸಚಿವಾಲಯದ ಸಹಾಯಕ ಸಚಿವ ಪಿಪಿ ಚೌಧರಿ ಹೇಳಿದ್ದಾರೆ. ಸುದ್ದಿಗಾರರ ಜತೆ ಮಾತನಾಡಿದ ಅವರು, ”ಕಾರ್ಪೊರೇಟ್‌ ವ್ಯವಸ್ಥೆಯ ದುರ್ಬಳಕೆ ಮೂಲಕ ಕಾಳಧನ ವ್ಯವಹಾರ ಅಥವಾ ಅಕ್ರಮ ಚಟುವಟಿಕೆಗಳಿಗೆ ಸರಕಾರವು ಅವಕಾಶ ನೀಡುವುದಿಲ್ಲ. ಗಂಭೀರ ವಂಚನೆ ಪ್ರಕರಣಗಳ ತನಿಖಾ ಕಚೇರಿ(ಎಸ್‌ಎಫ್‌ಐಒ) ಮತ್ತು ಇತರೆ ತನಿಖಾ ಸಂಸ್ಥೆಗಳು ನಕಲಿ ಕಂಪನಿಗಳಿಗೆ ಸಂಬಂಧಿಸಿದ ಪ್ರಕರಣಗಳನ್ನು ನಿಭಾಯಿಸುತ್ತಿವೆ. ಕಂಪನಿಗಳ ವಿರುದ್ಧ ಅಗತ್ಯ ಕ್ರಮಗಳನ್ನು ಜರುಗಿಸಲಾಗುತ್ತಿದೆ,” ಎಂದು ಚೌಧರಿ ಹೇಳಿದ್ದಾರೆ. 

21 ಲಕ್ಷ ನಿರ್ದೇಶಕರಿಗೆ ಸಂಕಷ್ಟ 

ನಕಲಿ ಕಂಪನಿಗಳನ್ನು ಪತ್ತೆ ಹಚ್ಚುವ ನಿಟ್ಟಿನಲ್ಲಿ ಕೆವೈಸಿ ದಾಖಲೆಗಳನ್ನು ಸಲ್ಲಿಸಲು ಕಂಪನಿಗಳ ನಿರ್ದೇಶಕರಿಗೆ ಸೂಚನೆ ನೀಡಲಾಗಿತ್ತು. ಸೆ.15ರ ಗಡುವು ಮುಕ್ತಾಯವಾಗಿದ್ದು, ದೇಶದ 33 ಲಕ್ಷ ನಿರ್ದೇಶಕರ ಪೈಕಿ 21 ಲಕ್ಷ ಮಂದಿ ಕೆವೈಸಿ ವಿವರಗಳನ್ನು ದಾಖಲಿಸಿಲ್ಲ. ಇಂಥವರ ನಿರ್ದೇಶಕತ್ವವು ರದ್ದಾಗಲಿದ್ದು, ಇವರು ‘ಡಮ್ಮಿ’ ನಿರ್ದೇಶಕರೇ ಎನ್ನುವ ನಿಟ್ಟಿನಲ್ಲಿ ಸರಕಾರ ತನಿಖೆ ನಡೆಸಲಿದೆ. ಗಡುವಿನಲ್ಲಿ ವಿವರ ಸಲ್ಲಿಸದ ನಿರ್ದೇಶಕರ ಹುದ್ದೆಯನ್ನು ನಿಷ್ಕ್ರಿಯಗೊಳಿಸಲಾಗುತ್ತದೆ. ಆದಾಗ್ಯೂ, ಅಸಲಿ ನಿರ್ದೇಶಕರು ಸಕಾರಣದ ಮನವಿಯೊಂದಿಗೆ ವಿವರಗಳನ್ನು ಸಲ್ಲಿಸಿದರೆ 5000 ರೂ. ಶುಲ್ಕವನ್ನು ಪಡೆದು ಸರಕಾರವು ನಿರ್ದೇಶಕತ್ವವನ್ನು ಮರು ಸಕ್ರಿಯಗೊಳಿಸುತ್ತದೆ. 

ಮೊದಲ ಹಂತದಲ್ಲಿ 2.26 ಲಕ್ಷ ಕಂಪನಿಗಳು ವಜಾ. 

21 ಲಕ್ಷ ನಿರ್ದೇಶಕರು ಕೆವೈಸಿ ಪ್ರಕ್ರಿಯೆಯಲ್ಲಿ ವಿಫಲ. ಇಂಥವರ ಡಿಐಎನ್‌ ನಿಷ್ಕ್ರಿಯಗೊಳಿಸುವ ಪ್ರಕ್ರಿಯೆ ಜಾರಿಯಲ್ಲಿದೆ. 

ಕಳೆದ ವರ್ಷ ಸುಮಾರು 3 ಲಕ್ಷ ಜನರ ನಿರ್ದೇಶಕತ್ವ ರದ್ದು. 

ನಿಷ್ಕ್ರಿಯ ನಿರ್ದೇಶಕರನ್ನು ಒಳಗೊಂಡ ಕಂಪನಿಗಳು ಸುದೀರ್ಘ ಕಾಲದಿಂದ ವ್ಯವಹಾರ ನಡೆಸದಿರುವುದು ತನಿಖೆ ವೇಳೆ ಬಯಲು.