2018 ರ ನವೆಂಬರ್‌ನಿಂದ ಹಿರಿಯ ನಾಗರಿಕರಿಗೆ ಸಾವಿರ ರೂ. ಪಿಂಚಣಿ

0
9

ನವೆಂಬರ್‌ನಿಂದ ಹಿರಿಯ ನಾಗರಿಕರಿಗೆ ಒಂದು ಸಾವಿರ ರೂ.ಗಳ ಪಿಂಚಣಿ ನೀಡಲಾಗುವುದು ಎಂದು ಸಿಂಎ ಕುಮಾರಸ್ವಾಮಿ ಆಗಸ್ಟ್ 10 ರ ಶುಕ್ರವಾರ ಪ್ರಕಟಿಸಿದರು.

ಚಿಕ್ಕಬಳ್ಳಾಪುರ: 2018 ನವೆಂಬರ್‌ನಿಂದ ಹಿರಿಯ ನಾಗರಿಕರಿಗೆ ಒಂದು ಸಾವಿರ ರೂ.ಗಳ ಪಿಂಚಣಿ  ನೀಡಲಾಗುವುದು ಎಂದು ಸಿಎಂ ಕುಮಾರಸ್ವಾಮಿ ಶುಕ್ರವಾರ ಪ್ರಕಟಿಸಿದರು. 

ನಾಡಪ್ರಭು ಕೆಂಪೇಗೌಡರ ಜಯಂತಿ ಉದ್ಘಾಟಿಸಿ ಶುಕ್ರವಾರ ಮಾತನಾಡಿದ ಅವರು, ”ಭರವಸೆಗಳನ್ನು ಪೂರೈಸಲು ಕಾಲವಕಾಶ ನೀಡಿ. ನಮ್ಮದು ಆಶ್ಚರ್ಯಕರ ರೀತಿಯಲ್ಲಿ ರಚನೆಯಾದ ಸರಕಾರ. ಹೀಗಾಗಿ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಅಭಿವೃದ್ಧಿಪಡಿಸಲಾಗುವುದು. ಮತದಾರರಿಗೆ ಅನ್ಯಾಯ ಮಾಡಿ ಸರಕಾರ ನಡೆಸುವುದಿಲ್ಲ. ಎಲ್ಲ ಭರವಸೆಗಳನ್ನು ಆದಷ್ಟು ಬೇಗ ಈಡೇರಿಸಲಾಗುವುದು,” ಎಂದು ಭರವಸೆ ನೀಡಿದರು. 

ಗೌರಿ-ಗಣೇಶ ಹಬ್ಬದೊಳಗೆ ರೈತರಿಗೆ ಸಿಹಿ ಸುದ್ದಿ 
”ಸಹಕಾರ ಸಂಘಗಳಲ್ಲಿ 9,948 ಕೋಟಿ ರೂ. ಸಾಲ ಮನ್ನಾ ಮಾಡಲಾಗಿದೆ. ಉಳಿದ 17.5 ಸಾವಿರ ಕೋಟಿ ರೂ. ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿನ ಸಾಲವನ್ನು ಮುಂದಿನ ಆಯವ್ಯಯದಲ್ಲಿ ಚರ್ಚೆಗಿಡಲಾಗುವುದು. ನನಗೆ ಸ್ವಲ್ಪ ಸಮಯ ಕೊಟ್ಟು ನೋಡಿ. ಸದ್ಯಕ್ಕೆ ಹಣ ಕ್ರೋಢೀಕರಣ ಮಾಡಲಾಗುತ್ತಿದೆ. ಮುಂದಿನ ಗೌರಿ-ಗಣೇಶ ಹಬ್ಬದೊಳಗೆ ರೈತರಿಗೆ ಸಿಹಿ ಸುದ್ದಿ ನೀಡಲಾಗುವುದು. ಅದನ್ನು ಈಗಲೇ ಬಹಿರಂಗ ಮಾಡಿದರೆ, ಅದಕ್ಕೆ ಒಂದಷ್ಟು ತಡೆ ಬರುವ ಸಾಧ್ಯತೆಗಳಿವೆ. ಹೀಗಾಗಿ ಯೋಜನೆಯನ್ನು ಸಮಯ ಬಂದಾಗ ಬಹಿರಂಗ ಪಡಿಸುತ್ತೇನೆ,” ಇದೇ ವೇಳೆ ತಿಳಿಸಿದರು. 

 ಕಾರ್ಯಕ್ರಮದಲ್ಲಿ ಆದಿಚುಂಚನಗಿರಿ ಮಠದ ಪೀಠಾಧ್ಯಕ್ಷರಾದ ನಿರ್ಮಲಾನಂದನಾಥ ಸ್ವಾಮಿಜಿ, ಸಚಿವರಾದ ಡಿ.ಕೆ.ಶಿವಕುಮಾರ್‌, ಎನ್‌.ಎಚ್‌ ಶಿವಶಂಕರರೆಡ್ಡಿ, ವಿಧಾನಪರಿಷತ್‌ ಸದಸ್ಯ ವೈ.ಎನ್‌.ನಾರಾಯಣಸ್ವಾಮಿ, ತೂಪಲ್ಲಿ ಚೌಡರೆಡ್ಡಿ ಮತ್ತಿತರರಿದ್ದರು.