‘ಸ್ಕೂಲ್ ಮಾಸ್ಟರ್’ ಖ್ಯಾತಿಯ ಗಾಯಕಿ ಕೆ ರಾಣಿ ಇನ್ನಿಲ್ಲ

0
61

ಕನ್ನಡದ ಭಾಗ್ಯೋದಯ (1956), ರತ್ನಗಿರಿ ರಹಸ್ಯ (1957), ಸ್ಕೂಲ್ ಮಾಸ್ಟರ್ (1958), ಗಾಳಿಗೋಪುರ (1962), ರತ್ನಮಂಜರಿ (1962) ಚಿತ್ರಗಳಲ್ಲಿ ಹಾಡಿರುವ ಖ್ಯಾತ ಗಾಯಕಿ ಕೆ ರಾಣಿ (75) ಹೈದಾರಾಬಾದಿನ ಕಲ್ಯಾಣನಗರದ ತಮ್ಮ ನಿವಾಸದಲ್ಲಿ ಶುಕ್ರವಾರ ರಾತ್ರಿ (ಜು.13) ಇಹಲೋಕ ತ್ಯಜಿಸಿದ್ದಾರೆ.

ಹೈದರಾಬಾದ್: ಕನ್ನಡದ ಭಾಗ್ಯೋದಯ (1956), ರತ್ನಗಿರಿ ರಹಸ್ಯ (1957), ಸ್ಕೂಲ್ ಮಾಸ್ಟರ್ (1958), ಗಾಳಿಗೋಪುರ (1962), ರತ್ನಮಂಜರಿ (1962) ಚಿತ್ರಗಳಲ್ಲಿ ಹಾಡಿರುವ ಖ್ಯಾತ ಗಾಯಕಿ ಕೆ ರಾಣಿ (75) ಹೈದಾರಾಬಾದಿನ ಕಲ್ಯಾಣನಗರದ ತಮ್ಮ ನಿವಾಸದಲ್ಲಿ ಶುಕ್ರವಾರ ರಾತ್ರಿ (ಜು.13) ಇಹಲೋಕ ತ್ಯಜಿಸಿದ್ದಾರೆ. 
ಇವರು ಕನ್ನಡ, ತೆಲುಗು, ತಮಿಳು, ಹಿಂದಿ, ಬಂಗಾಳಿ, ಸಿಂಹಳ, ಮಲಯಾಳಂ ಮತ್ತು ಉಜ್ಬೇಕ್ ಭಾಷೆಯಲ್ಲಿ ಸುಮಾರು 500ಕ್ಕೂ ಹೆಚ್ಚು ಗೀತೆಗಳು ಅವರ ಕಂಠಸಿರಿಯಲ್ಲಿ ಹೊರಹೊಮ್ಮಿವೆ. 

ಕೆಲ ಕಾಲದಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ರಾಣಿ ಅವರು ಕಲ್ಯಾಣನಗರದ ತಮ್ಮ ಮಗಳು ವಿಜಯಾ ಅವರ ನಿವಾಸದಲ್ಲಿ ಜುಲೈ 13 ರ ಶುಕ್ರವಾರ ರಾತ್ರಿ ನಿಧನರಾಗಿದ್ದಾರೆ. ಶ್ರೀಲಂಕಾ ರಾಷ್ಟ್ರಗೀತೆಯನ್ನು ಹಾಡಿ ಅಪರೂಪದ ದಾಖಲೆಗೆ ರಾಣಿ ಪಾತ್ರರಾಗಿದ್ದರು. ತಮ್ಮ ಒಂಬತ್ತನೇ ವಯಸ್ಸಿನಲ್ಲೇ ಸಂಗೀತ ಪಯಣ ಆರಂಭಿಸಿದ ಖ್ಯಾತಿ ಅವರದು. 

ಸರ್ವೆಪಲ್ಲಿ ರಾಧಾಕೃಷ್ಣನ್ ರಾಷ್ಟ್ರಪತಿಯಾಗಿದ್ದಾಗ ರಾಷ್ಟಪತಿ ಭವನದಲ್ಲಿ ಪ್ರದರ್ಶನ ನೀಡಿದ ಘನತೆ ಅವರಿಗೆ ಸಲ್ಲುತ್ತದೆ. ಇನ್ನೊಂದು ಹೆಗ್ಗಳಿಕೆ ಎಂದರೆ ಸರ್ ಎಂ ವಿಶ್ವೇಶ್ವರಯ್ಯನವರ ಜನ್ಮ ಶತಮಾನೋತ್ಸವ ಸಮಾರಂಭಕ್ಕೆ ರಾಣಿ ಅವರನ್ನು ವಿಮಾನದಲ್ಲಿ ಕರೆಸಿಕೊಂಡಿತ್ತು ಕರ್ನಾಟಕ ಸರಕಾರ . ವೇದಿಕೆ ಮೇಲೆ ಹಿಂದಿ ಹಾಡುಗಳನ್ನು ರಾಣಿ ಹಾಡುತ್ತಿದ್ದರೆ ರಾಜ್ ಕಪೂರ್ ಸಹ ತಾಳಹಾಕುತ್ತಿದ್ದನ್ನು ಸ್ಮರಿಸಬಹುದು. 

ತೆಲುಗಿನ ‘ರೂಪವತಿ’ ಸಿನಿಮಾ ಮೂಲಕ ತಮ್ಮ ವೃತ್ತಿಬದುಕನ್ನು ಆರಂಭಿಸಿದ ರಾಣಿ ಬಳಿಕ ಲವಕುಶ ಸೇರಿದಂತೆ ಹಲವಾರು ಸಿನಿಮಾಗಳಿಗಾಗಿ ಹಾಡಿದ್ದಾರೆ. ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಕಾಮರಾಜ್ ಅವರು ‘ಇನ್ನಿಸಾಯ್ ರಾಣಿ’ ಎಂದು ಅವರನ್ನು ಕರೆದಿದ್ದಾರೆ. 1951ರಲ್ಲಿ ಗಾಲಿವೀಟಿ ಸೀತಾರಾಮರೆಡ್ಡಿ ಅವರನ್ನು ಮದುವೆಯಾದ ಬಳಿಕ ಸಿನಿಮಾ ಸಂಗೀತಕ್ಕೆ ಗುಡ್ ಬೈ ಹೇಳಿದ್ದರು.