ಸೌರಮಂಡಲದ ತುತ್ತತುದಿ ತಲುಪಿದ ನಾಸಾ ಸ್ಪೇಸ್‌ ಪ್ರೋಬ್‌!

0
796

ಸೌರಮಂಡಲದ ತುದಿಯಲ್ಲಿರುವ ಮಂಜುಗಟ್ಟಿದ ಕಲ್ಲಿನ ಬಗ್ಗೆ ಸಂಶೋಧನೆ ನಡೆಸಲು ತೆರಳಿರುವ ನಾಸಾದ ಸ್ಪೇಸ್‌ ಪ್ರೋಬ್‌ ಮೊದಲ ಸಿಗ್ನಲ್‌ ಕಳುಹಿಸಿದೆ. ಇದುವರೆಗೆ ಯಾವ ಉಪಗ್ರಹವೂ ಇಷ್ಟು ದೂರ ಕ್ರಮಿಸಿದ ಉದಾಹರಣೆಗಳಿಲ್ಲ.

ವಾಷಿಂಗ್ಟನ್‌: ಸೌರಮಂಡಲದ ತುದಿಯಲ್ಲಿರುವ ಮಂಜುಗಟ್ಟಿದ ಕಲ್ಲಿನ ಬಗ್ಗೆ ಸಂಶೋಧನೆ ನಡೆಸಲು ತೆರಳಿರುವ ನಾಸಾದ ಸ್ಪೇಸ್‌ ಪ್ರೋಬ್‌ ಮೊದಲ ಸಿಗ್ನಲ್‌ ಕಳುಹಿಸಿದೆ. ಇದುವರೆಗೆ ಯಾವ ಉಪಗ್ರಹವೂ ಇಷ್ಟು ದೂರ ಕ್ರಮಿಸಿದ ಉದಾಹರಣೆಗಳಿಲ್ಲ. 

ಮುಂದಿನ ದಿನಗಳಲ್ಲಿ ಹೆಚ್ಚಿನ ಮಾಹಿತಿ ಮತ್ತು ಚಿತ್ರಗಳನ್ನು ಭೂಮಿಗೆ ರವಾನಿಸಲಿದೆ ಎಂದು ನಾಸಾ  ವಿಜ್ಞಾನಿಗಳು ಹರ್ಷ ವ್ಯಕ್ತ ಪಡಿಸಿದ್ದಾರೆ. 

ಪರಮಾಣು ಚಾಲಿತ ಸ್ಪೇಸ್‌ ಪ್ರೋಬ್‌ ಬರೋಬ್ಬರಿ 640 ಕೋಟಿ ಕಿಲೋ ಮೀಟರ್‌ ಕ್ರಮಿಸಿದ್ದು, ಕೈಪರ್‌ ಬೆಲ್ಟ್‌ನಲ್ಲಿರುವ ಮಂಜಿನ ಕಲ್ಲನ್ನು ಸಮೀಪಿಸಲು ಕೇವಲ 3,540 ಕಿ.ಮೀ. ಬಾಕಿಯಿದೆ. 

ಕಡಲೆಕಾಯಿ ಆಕಾರದಲ್ಲಿರುವ ಅಜ್ಞಾತ ಬಾಹ್ಯಾಕಾಶ ವಸ್ತುವಿನ ಮೇಲೆ ಸ್ಪೇಸ್‌ ಪ್ರೋಬ್‌ ಸಂಶೋಧನೆ ನಡೆಸಲಿದೆ. ನೆಪ್ಚೂನ್‌ ಕಕ್ಷೆಯ ಹೊರಭಾಗದಲ್ಲಿ ಮಂಜಿನಿಂದ ಕೂಡಿದ ಕೈಪರ್‌ ಬೆಲ್ಟ್‌ನ ಹೃದಯ ಭಾಗದಲ್ಲಿ ಈ ಮಂಜಿನ ಕಲ್ಲಿದೆ. ಇದನ್ನು ವೈಜ್ಞಾನಿಕವಾಗಿ ಅಲ್ಟಿಮಾ ಥುಲೆ  (Ultima Thule) ಎಂದು ಹೆಸರಿಡಲಾಗಿದೆ. (486958) 2014 MU69 ಎಂಬ ಸಂಜ್ಞೆಯಿಂದ ಗುರುತಿಸಲಾಗುತ್ತದೆ. 

ನ್ಯಾಷನಲ್‌ ಏರೋನಾಟಿಕ್‌ ಆ್ಯಂಡ್‌ ಸ್ಪೇಸ್‌ ಏಜೆನ್ಸಿ ಜನೇವರಿ 2 ರ ಬುಧವಾರ ಬೆಳಗ್ಗೆ 10.28ಕ್ಕೆ ಸ್ಪೇಸ್‌ ಪ್ರೋಬ್‌ನಿಂದ ಬಂದ ಮೊದಲ ಸಿಗ್ನಲ್‌ಅನ್ನು ಸ್ವೀಕರಿಸಿತು. ಈ ಉಪಗ್ರಹವನ್ನು 2006ರ ಜನವರಿಯಲ್ಲಿ ಉಡ್ಡಯನ ಮಾಡಲಾಗಿತ್ತು. 

ಕಡಲೆಕಾಯಿ ಆಕಾರದಂತೆ ಕಾಣುವ ಮಂಜಿನ ಕಲ್ಲು ಏಕಮಾತ್ರವೇ? ಅಥವಾ ಎರಡು ಮಂಜಿನ ಕಲ್ಲುಗಳು ಪರಸ್ಪರ ಸುತ್ತುತ್ತಿವೆಯೇ ಎಂಬ ಅಚ್ಚರಿ ಬಯಲಾಗಲಿದೆ. ಪ್ರಸ್ತುತ ಕಳುಹಿಸಿರುವ ಚಿತ್ರದಲ್ಲಿ ಬ್ಲರ್‌ ಆಗಿ ಕಾಣಿಸುತ್ತಿದ್ದು, ಪ್ರೋಬ್‌ ಮತ್ತಷ್ಟು ಸಮೀಪಿಸಿದ ನಂತರ ಮತ್ತಷ್ಟು ಚಿತ್ರಗಳನ್ನು ಮಾಹಿತಿಗಳನ್ನು ಕಳುಹಿಸಲಿದೆ ಎಂದು ನಾಸಾ ವಿಜ್ಞಾನಿಗಳು ಮಾಹಿತಿ ನೀಡಿದ್ದಾರೆ. 

 ಸೂರ್ಯನನ್ನೇ ಟಚ್‌ ಮಾಡುತ್ತಾ ನಾಸಾ? 

2015ರಲ್ಲಿ ಪ್ಲೂಟೋ ಗ್ರಹವು ನಾವು ಅಂದುಕೊಂಡಿದ್ದಕ್ಕಿಂತ ಸ್ವಲ್ಪ ದೊಡ್ಡದಾಗಿದೆ ಎಂಬ ಮಾಹಿತಿ ಮೊದಲು ಕೈಪರ್‌ ಬೆಲ್ಟ್‌ ಬಾಹ್ಯಾಕಾಶ ಯೋಜನೆಯಲ್ಲಿ ತಿಳಿದುಬಂದಿತ್ತು. ಹಿಮದಿಂದ ಕೂಡಿದ ಕುಬ್ಜ ಗ್ರಹದ ಮೇಲ್ಮೈನಲ್ಲಿ ಮೀಥೇನ್‌ ಭರಿತ ದಿಬ್ಬಗಳನ್ನು ಪತ್ತೆ ಮಾಡಿತ್ತು. 

ಇದೀಗ ಕೈಪರ್‌ ಬೆಲ್ಟ್‌ ಸಮೀಪಿಸಿರುವ 2ನೇ ಸ್ಪೇಸ್‌ ಪ್ರೋಬ್‌ ಉಪಗ್ರಹವು ಪ್ಲೂಟೋ ಗ್ರಹದಿಂದ ಸುಮಾರು 164 ಕೋಟಿ ಕಿ.ಮೀ. ದೂರ ಸಾಗಿದೆ. 

1977ರಲ್ಲಿ ವೋಯೇಜರ್‌ 1 ಮತ್ತು 2 ಎಂಬ ಉಪಗ್ರಹಗಳನ್ನು ನಾಸಾ ಉಡ್ಡಯನ ಮಾಡಿತ್ತು. ಇವುಗಳು ಅತ್ಯಂತ ದೂರವನ್ನು ಕ್ರಮಿಸಿ ದಾಖಲೆ ಮಾಡಿದ್ದವು. ಪ್ರಸ್ತುತ ಎರಡೂ ಉಪಗ್ರಹಗಳು ಕಾರ್ಯ ನಿರ್ವಹಿಸುತ್ತಿವೆ.