ವಿಶ್ವ ಜೂನಿಯರ್‌ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌ : ಭಾರತದ ಲಕ್ಷ್ಯ ಸೇನ್‌ ಗೆ ಕಂಚಿನ ಪದಕ

0
173

ಭಾರತದ ಲಕ್ಷ್ಯ ಸೇನ್‌ ವಿಶ್ವ ಜೂನಿಯರ್‌ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌ನಲ್ಲಿ ಕಂಚಿನ ಪದಕ ಗೆದ್ದಿದ್ದಾರೆ.

ಮಾರ್ಖಂ (ಕೆನಡಾ): ಭಾರತದ ಲಕ್ಷ್ಯ ಸೇನ್‌ ವಿಶ್ವ ಜೂನಿಯರ್‌ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌ನಲ್ಲಿ ಕಂಚಿನ ಪದಕ ಗೆದ್ದಿದ್ದಾರೆ. 

ಇಲ್ಲಿ ಭಾನುವಾರ ನಡೆದ ಸೆಮಿಫೈನಲ್‌ ಸೆಣಸಾಟದಲ್ಲಿ ಭಾರತದ 17ರ ತರುಣ ಲಕ್ಷ್ಯ ಸೇನ್‌ ಅಗ್ರ ಶ್ರೇಯಾಂಕದ ಆಟಗಾರ ಥಾಯ್ಲೆಂಡ್‌ನ ಕುನ್ಲಾವತ್‌ ವಿತಿದ್‌ಸರ್ನ್‌ ವಿರುದ್ಧ 22-20, 16-21, 13-21 ಗೇಮ್‌ಗಳಿಂದ ಸೋತು ಕಂಚಿನ ಪದಕಕ್ಕೆ ಸಮಾಧಾನ ಪಟ್ಟುಕೊಂಡರು. 

ಜೂನಿಯರ್‌ ವಿಭಾಗದಲ್ಲಿ ವಿಶ್ವದ 3ನೇ ಶ್ರೇಯಾಂಕದ ಆಟಗಾರನಾಗಿರುವ ಲಕ್ಷ್ಯ ಸೇನ್‌ ಈ ವರ್ಷ ಜುಲೈನಲ್ಲಿ ನಡೆದ ಏಷ್ಯಾ ಜೂನಿಯರ್‌ ಚಾಂಪಿಯನ್‌ಷಿಪ್‌ನಲ್ಲಿ ಬಂಗಾರದ ಸಾಧನೆ ಮಾಡಿದ್ದರು. ಹೀಗಾಗಿ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಅವರಿಂದ ಮೇರು ಸಾಧನೆ ನಿರೀಕ್ಷಿಸಲಾಗಿತ್ತು. ಆದರೆ, ಭಾನುವಾರ 71 ನಿಮಿಷಗಳ ಕದನದಲ್ಲಿ ಥಾಯ್ಲೆಂಡ್‌ ಆಟಗಾರನ ಸವಾಲು ಹತ್ತಿಕ್ಕುವಲ್ಲಿ ಸೇನ್‌ ವಿಫಲರಾದರು. ನಿಕಟ ಪೈಪೋಟಿ ಕಂಡ ಮೊದಲ ಗೇಮ್‌ನಲ್ಲಿ 22-20ರಿಂದ ಥಾಯ್ಲೆಂಡ್‌ ಆಟಗಾರನನ್ನು ಹಿಮ್ಮೆಟ್ಟಿಸಿದ ಭಾರತೀಯ ಆಟಗಾರನಿಂದ ಆ ನಂತರದ ಎರಡು ಗೇಮ್‌ಗಳಲ್ಲಿ ನಿರೀಕ್ಷಿತ ಮಟ್ಟದ ಪ್ರದರ್ಶನ ಮೂಡಿಬರಲಿಲ್ಲ. ಕೊನೆಯ ಎರಡೂ ಗೇಮ್‌ಗಳಲ್ಲಿ ಕುನ್ಲಾವತ್‌ ಮೇಲುಗೈ ಸಾಧಿಸಿದರು. 

ಎರಡನೇ ಪದಕ : 
ಇದು ವಿಶ್ವ ಜೂನಿಯರ್‌ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌ನ 20ನೇ ಆವೃತ್ತಿಯಾಗಿದ್ದು, ಲಕ್ಷ್ಯ ಸೇನ್‌ ಸೇರಿದಂತೆ ಪ್ರತಿಷ್ಠಿತ ಚಾಂಪಿಯನ್‌ಷಿಪ್‌ನಲ್ಲಿ ಇಲ್ಲಿಯವರೆಗೆ ಭಾರತದ ಇಬ್ಬರು ಆಟಗಾರರು ಮಾತ್ರ ಪದಕ ವೇದಿಕೆ ಏರಿದ್ದಾರೆ. ಇದಕ್ಕೂ ಮೊದಲು 2008ರಲ್ಲಿ ಸೈನಾ ನೆಹ್ವಾಲ್‌ ಪುಣೆಯಲ್ಲಿ ನಡೆದ 10ನೇ ಆವೃತ್ತಿಯಲ್ಲಿ ಚಿನ್ನದ ಪದಕ ಗೆದ್ದಿದ್ದರು. 1992ರಲ್ಲಿ ಜಕಾರ್ತದಲ್ಲಿ ಚಾಂಪಿಯನ್‌ಷಿಪ್‌ ಆರಂಭಗೊಂಡಿತ್ತು.