ವಿಜಯ್‌ ಮಲ್ಯ ಬೆಂಗಳೂರು ಆಸ್ತಿ ಜಪ್ತಿ ಮಾಡಿ: ದಿಲ್ಲಿ ಕೋರ್ಟ್‌ ಆದೇಶ

0
550

ಮದ್ಯದ ದೊರೆ ವಿಜಯ್‌ ಮಲ್ಯರ ಬೆಂಗಳೂರಿನಲ್ಲಿರುವ ಆಸ್ತಿಗಳನ್ನು ಜಪ್ತಿ ಮಾಡಲು ದಿಲ್ಲಿ ಕೋರ್ಟ್‌ ಅಕ್ಟೋಬರ್ 11 ರ ಗುರುವಾರ ಆದೇಶಿಸಿದೆ.

ಹೊಸದಿಲ್ಲಿ:ಮದ್ಯದ ದೊರೆ ವಿಜಯ್‌ ಮಲ್ಯರ ಬೆಂಗಳೂರಿನಲ್ಲಿರುವ ಆಸ್ತಿಗಳನ್ನು ಜಪ್ತಿ ಮಾಡಲು ದಿಲ್ಲಿ ಕೋರ್ಟ್‌ ಅಕ್ಟೋಬರ್ 11 ರ ಗುರುವಾರ ಆದೇಶಿಸಿದೆ.

ವಿದೇಶಿ ವಿನಿಮಯ ನಿಯಂತ್ರಣ ಕಾಯ್ದೆ(ಫೆರಾ) ಉಲ್ಲಂಘನೆಯಾಗಿರುವ ಹಿನ್ನೆಲೆಯಲ್ಲಿಆಸ್ತಿ ಜಪ್ತಿಗೆ ಮುಖ್ಯ ಮೆಟ್ರೊಪಾಲಿಟನ್‌ ಮ್ಯಾಜಿಸ್ಪ್ರೇಟ್‌ ದೀಪಕ್‌ ಶರಾವತ್‌ ಅವರು ಹೊಸ ಆದೇಶವನ್ನು ನೀಡಿದ್ದಾರೆ. ಈ ಮೊದಲು ಬೆಂಗಳೂರು ಪೊಲೀಸರು ಈ ಬಗ್ಗೆ ವಿವರ ಸಲ್ಲಿಸಲು ಹೆಚ್ಚಿನ ಸಮಯ ಕೋರಿದ್ದದರು. 

ಮಲ್ಯಗೆ ಸೇರಿದ 159 ಆಸ್ತಿಗಳನ್ನು ಗುರುತಿಸಲಾಗಿದ್ದು, ಅವುಗಳಲ್ಲಿ ಯಾವೊಂದನ್ನೂ ಜಪ್ತಿ ಮಾಡಿಲ್ಲ ಎಂದು ಈ ಹಿಂದೆ ಬೆಂಗಳೂರು ಪೊಲೀಸರು ಕೋರ್ಟ್‌ಗೆ ತಿಳಿಸಿದ್ದರು. 

ಸಾಲದ ಸುಳಿಯಲ್ಲಿ ಸಿಲುಕಿ ದೇಶ ಬಿಟ್ಟು ಪರಾರಿಯಾಗಿರುವ ಮಲ್ಯರನ್ನು ಫೆರಾ ಉಲ್ಲಂಘನೆ ಪ್ರಕರಣದಲ್ಲಿ ‘ಘೋಷಿತ ಅಪರಾಧಿ’ ಎಂದು ಕೋರ್ಟ್‌ ಜ.4ರಂದು ಹೇಳಿತ್ತು. ಸಮನ್ಸ್‌ಗಳನ್ನು ಉಲ್ಲಂಘಿಸಿದ್ದ ಮಲ್ಯರ ಆಸ್ತಿಗಳನ್ನು ಬೆಂಗಳೂರು ಪೊಲೀಸ್‌ ಕಮಿಷನರ್‌ ಮುಖಾಂತರ ಜಪ್ತಿ ಮಾಡಲು ಮೇ 8ರಂದು ಕೋರ್ಟ್‌ ಆದೇಶಿಸಿ, ಈ ಬಗ್ಗೆ ವರದಿಯನ್ನು ಕೇಳಿತ್ತು. 

ಭಾರತೀಯ ಬ್ಯಾಂಕ್‌ಗಳಿಂದ ಸುಮಾರು 9000 ಕೋಟಿ ರೂ. ಸಾಲ ಪಡೆದು ಸುಸ್ತಿದಾರನಾಗಿರುವ ವಿಜಯ್‌ ಮಲ್ಯ ಲಂಡನ್‌ಗೆ ಪರಾರಿಯಾಗಿದ್ದಾರೆ. ಈ ಸಂಬಂಧ ಏಪ್ರಿಲ್‌ 12ರಂದು ಜಾಮೀನು ರಹಿತ ವಾರಂಟ್‌ ಜಾರಿ ಮಾಡಲಾಗಿತ್ತು. ಬ್ರಿಟನ್‌ ನ್ಯಾಯಾಲಯದಲ್ಲೂ ಮಲ್ಯ ವಿರುದ್ಧ ಭಾರತ ಮೊಕದ್ದಮೆ ಹೂಡಿದೆ.