“ರಾಜೀವ್ ಗಾಂಧಿ ಖೇಲ್‌ ರತ್ನ ಪ್ರಶಸ್ತಿ”ಗೆ ಕೊಹ್ಲಿ, ಚಾನು ಹೆಸರು ಶಿಫಾರಸು

0
809

ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿ ಮತ್ತು ವಿಶ್ವ ಚಾಂಪಿಯನ್‌ ವೇಟ್‌ಲಿಫ್ಟರ್‌ ಮೀರಾಬಾಯಿ ಚಾನು ಅವರನ್ನು ದೇಶದ ಅತ್ಯುನ್ನತ ಕ್ರೀಡಾ ಗೌರವ ರಾಜೀವ್‌ ಗಾಂಧಿ ಖೇಲ್‌ ರತ್ನ ಪ್ರಶಸ್ತಿಗೆ ಸೋಮವಾರ ಜಂಟಿಯಾಗಿ ಶಿಫಾರಸು ಮಾಡಲಾಗಿದೆ.

ಹೊಸದಿಲ್ಲಿ: ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿ ಮತ್ತು ವಿಶ್ವ ಚಾಂಪಿಯನ್‌ ವೇಟ್‌ಲಿಫ್ಟರ್‌ ಮೀರಾಬಾಯಿ ಚಾನು ಅವರನ್ನು ದೇಶದ ಅತ್ಯುನ್ನತ ಕ್ರೀಡಾ ಗೌರವ ರಾಜೀವ್‌ ಗಾಂಧಿ ಖೇಲ್‌ ರತ್ನ ಪ್ರಶಸ್ತಿಗೆ ಸೆಪ್ಟೆಂಬರ್ 17 ರ ಸೋಮವಾರ ಜಂಟಿಯಾಗಿ ಶಿಫಾರಸು ಮಾಡಲಾಗಿದೆ. 
ಈ ಮಧ್ಯೆ, ಜಾವೆಲಿನ್‌ ಎಸೆತಗಾರ ನೀರಜ್‌ ಚೋಪ್ರಾ, ಡಬಲ್ಸ್‌ ತಜ್ಞ ಕರ್ನಾಟಕದ ರೋಹನ್‌ ಬೋಪಣ್ಣ ಸೇರಿ 20 ಕ್ರೀಡಾಪಟುಗಳನ್ನು ಅರ್ಜುನ ಪ್ರಶಸ್ತಿಗೆ ಪ್ರಸಕ್ತ ವರ್ಷ ಆಯ್ಕೆ ಮಾಡಲಾಗಿದೆ. ಜೂನಿಯರ್‌ ವಿಶ್ವ ಚಾಂಪಿಯನ್‌ ಸ್ಟ್ರಿಂಟರ್‌ ಹಿಮಾ ದಾಸ್‌ ಮತ್ತು ಏಷ್ಯನ್‌ ಗೇಮ್ಸ್‌ ಚಿನ್ನದ ಪದಕ ವಿಜೇತ ಜಿನ್ಸನ್‌ ಜಾನ್ಸನ್‌, ಕ್ರಿಕೆಟ್‌ ಆಟಗಾರ್ತಿ ಸ್ಮೃತಿ ಮಂಧನಾ, ಹಾಕಿ ಆಟಗಾರ್ತಿಯರಾದ ಮನ್‌ಪ್ರೀತ್‌ ಸಿಂಗ್‌ ಮತ್ತು ಸವಿತಾ ಪೂನಿಯಾ ಮತ್ತು ಟೇಬಲ್‌ ಟೆನಿಸ್‌ ಆಟಗಾರ್ತಿ ಮನಿಕಾ ಬಾತ್ರಾ ಸೇರಿ ಹಲವು ಪ್ರಮುಖರು ಈ ಪಟ್ಟಿಯಲ್ಲಿದ್ದಾರೆ. 

ಸಮಿತಿಯ ಶಿಫಾರಸನ್ನು ಕ್ರೀಡಾ ಸಚಿವ ರಾಜ್ಯವರ್ಧನ್‌ ಸಿಂಗ್‌ ರಾಥೋಡ್‌ ಅಧಿಕೃತವಾಗಿ ಸಮ್ಮತಿಸಿದ್ದಾರೆ. ಇದರೊಂದಿಗೆ ದಿಗ್ಗಜ ಸಚಿನ್‌ ತೆಂಡೂಲ್ಕರ್‌(1997) ಮತ್ತು ಮಾಜಿ ನಾಯಕ ಮಹೇಂದ್ರ ಸಿಂಗ್‌ ಧೋನಿ (2007) ನಂತರ ವಿರಾಟ್‌ ಕೊಹ್ಲಿ ಈ ಗೌರವ ಪಡೆಯಲಿರುವ 3ನೇ ಭಾರತೀಯ ಕ್ರಿಕೆಟಿಗ ಎನಿಸಲಿದ್ದಾರೆ. 

”ಹೌದು, ವಿರಾಟ್‌ ಕೊಹ್ಲಿ ಮತ್ತು ಮೀರಾಬಾಯಿ ಚಾನು ಹೆಸರನ್ನು ಖೇಲ್‌ ರತ್ನ ಪ್ರಶಸ್ತಿಗೆ ಸಮಿತಿಯು ಶಿಫಾರಸು ಮಾಡಿದೆ,” ಎಂದು ಸಚಿವಾಲಯ ತಿಳಿಸಿದೆ. ಇದರೊಂದಿಗೆ ಕಳೆದ ವರ್ಷ ಸೂಪರ್‌ ಸೀರಿಸ್‌ ಟೂರ್ನಿಗಳಲ್ಲಿ ಶ್ರೇಷ್ಠ ಪ್ರದರ್ಶನ ಹೊರಹಾಕಿದ್ದ ಭಾರತದ ಅಗ್ರಮಾನ್ಯ ಸಿಂಗಲ್ಸ್‌ ಬ್ಯಾಡ್ಮಿಂಟನ್‌ ಆಟಗಾರ ಕಿಡಂಬಿ ಶ್ರೀಕಾಂತ್‌ ಪ್ರಶಸ್ತಿ ರೇಸ್‌ನಿಂದ ಹೊರಬಿದ್ದರೆ, 48ಕೆಜಿ ವಿಭಾಗದಲ್ಲಿ ವಿಶ್ವ ದಾಖಲೆ ನಿರ್ಮಿಸಿರುವ ಹಾಲಿ ವಿಶ್ವ ಚಾಂಪಿಯನ್‌ ಚಾನುಗೆ ಅದೃಷ್ಟ ಕೈ ಹಿಡಿದಿದೆ. 

ಐಸಿಸಿ ಟೆಸ್ಟ್‌ ರ‍್ಯಾಂಕಿಂಗ್ನಲ್ಲಿ ವಿಶ್ವದ ನಂ.1 ಬ್ಯಾಟ್ಸ್‌ಮನ್‌ ಕೊಹ್ಲಿ, ಕಳೆದ ಮೂರು ವರ್ಷಗಳಿಂದ ಅಮೋಘ ಪ್ರದರ್ಶನ ತೋರಿದ್ದಾರೆ. ಆದಾಗ್ಯೂ 2016 ಮತ್ತು 2017ರಲ್ಲಿ ನಾಮನಿರ್ದೇಶನಗೊಳ್ಳುವಲ್ಲಿ ವಿಫಲಗೊಂಡಿದ್ದರು. 29 ವರ್ಷದ ದಿಲ್ಲಿ ಡ್ಯಾಷರ್‌ ಕೊಹ್ಲಿ 71 ಟೆಸ್ಟ್‌ಗಳಲ್ಲಿ 23 ಶತಕದಂದಿಗೆ 6,147 ರನ್‌ ಕಲೆಹಾಕಿದ್ದಾರೆ. ಇದಲ್ಲದೆ 211 ಏಕದಿನ ಪಂದ್ಯಗಳಲ್ಲಿ 35 ಬಾರಿ ಶತಕ ವೀರನಾಗಿದ್ದು, 9, 779 ರನ್‌ ಸಂಪಾದಿಸಿದ್ದಾರೆ. ಭಾರತದ ಪರ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಒಟ್ಟು 58 ಶತಕ ಸಿಡಿಸಿರುವ ದಿಲ್ಲಿ ಬ್ಯಾಟ್ಸ್‌ಮನ್‌ ಶತಕ ದಾಖಲೆಯಲ್ಲಿ ಸಚಿನ್‌(100) ನಂತರ ದ್ವಿತೀಯ ಸ್ಥಾನದಲ್ಲಿದ್ದಾರೆ. 

ಕಳೆದ ಮೂರು ವರ್ಷಗಳಿಂದ ಖೇಲ್‌ ರತ್ನಗೆ ವಿರಾಟ್‌ ಕೊಹ್ಲಿ ಹೆಸರನ್ನು ಬಿಸಿಸಿಐ ನಾಮನಿರ್ದೇಶನ ಮಾಡಿತ್ತಾದರೂ ರಿಯೊ ಒಲಿಂಪಿಕ್‌ ಗೇಮ್ಸ್‌ನಲ್ಲಿ ಶ್ರೇಷ್ಠ ಪ್ರದರ್ಶನ ನೀಡಿದ ಸಾಕ್ಷಿ ಮಲಿಕ್‌, ಪಿ.ವಿ.ಸಿಂಧೂ ಮತ್ತು ದೀಪಾ ಕರ್ಮಕಾರ್‌ಗೆ 2016ರಲ್ಲಿ ಈ ಗೌರವ ನೀಡಲಾಗಿದೆ. ಕಳೆದ ವರ್ಷ ಭಾರತ ಹಾಕಿ ತಂಡದ ಮಾಜಿ ನಾಯಕ ಸರ್ದಾರ್‌ ಸಿಂಗ್‌ ಮತ್ತು ಪ್ಯಾರಾ ಅಥ್ಲೀಟ್‌ ದೇವೇಂದ್ರ ಝಾಝರಿಯಾಗೆ ಈ ಗೌರವ ಒಲಿಯಿತು. ಖೇಲ್‌ ರತ್ನ ಪ್ರಶಸ್ತಿಗೂ ಮುನ್ನ 2017ರಲ್ಲಿ ಪದ್ಮ ಶ್ರೀ ಗೌರವಕ್ಕೆ ಪಾತ್ರರಾಗಿರುವ ಕೊಹ್ಲಿ ಅತಿ ವಿರಳ ಕ್ರೀಡಾಪಟುಗಳಲ್ಲಿ ಒಬ್ಬರೆನಿಸಿದ್ದಾರೆ. ತವರಿನಲ್ಲಿ ಇಂಗ್ಲೆಂಡ್‌ ಮತ್ತು ಆಸ್ಪ್ರೇಲಿಯಾ ವಿರುದ್ಧ ಭಾರತ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸಿರುವ ಬಲಗೈಬ್ಯಾಟ್ಸ್‌ಮನ್‌ ತವರಿನಾಚೆಗೂ ವೆಸ್ಟ್‌ ಇಂಡೀಸ್‌ ಮತ್ತು ಶ್ರೀಲಂಕಾ ವಿರುದ್ಧ ಸರಣಿ ಗೆದ್ದುಕೊಟ್ಟಿದ್ದಾರೆ. 

ಇತ್ತೀಚೆಗೆ ಜಕಾರ್ತದಲ್ಲಿ ನಡೆದ ಏಷ್ಯನ್‌ ಗೇಮ್ಸ್‌ನಿಂದ ಹೊರಗುಳಿದಿದ್ದ ಮೀರಾಬಾಯಿ ಚಾನು ಸದ್ಯ ಬೆನ್ನು ನೋವಿನಿಂದ ಚೇತರಿಸಿಕೊಳ್ಳುತ್ತಿದ್ದಾರೆ. ಇದೀಗ ಖೇಲ್‌ ರತ್ನ ಗೌರವ ಅವರ ಆತ್ಮಸ್ಥೈರ್ಯವನ್ನು ಇಮ್ಮಡಿಗೊಳಿಸಿದೆ. ಹಾಲಿ ಕಾಮನ್‌ವೆಲ್ತ್‌ ಗೇಮ್ಸ್‌ ಪದಕ ವಿಜೇತೆ ಚಾನು 2020ರ ಟೋಕಿಯೊ ಒಲಿಂಪಿಕ್ಸ್‌ನ ವೇಟ್‌ಲಿಫ್ಟಿಂಗ್‌ನಲ್ಲಿ ಪದಕದ ಏಕೈಕ ನಿರೀಕ್ಷೆಯಾಗಿದ್ದಾರೆ. 

ಅರ್ಜುನ ಪ್ರಶಸ್ತಿಗೆ ಆಯ್ಕೆ 

ನೀರಜ್‌ ಚೋಪ್ರಾ (ಅಥ್ಲೆಟಿಕ್ಸ್‌), ಜಿನ್ಸನ್‌ ಜಾನ್ಸನ್‌ (ಅಥ್ಲೆಟಿಕ್ಸ್‌), ಹಿಮಾದಾಸ್‌ (ಅಥ್ಲೆಟಿಕ್ಸ್‌), ಎನ್‌. ಸಿಕ್ಕಿ ರೆಡ್ಡಿ (ಬ್ಯಾಡ್ಮಿಂಟನ್‌), ಸತೀಶ್‌ ಕುಮಾರ್‌ (ಬಾಕ್ಸಿಂಗ್‌), ಸ್ಮೃತಿ ಮಂಧನಾ (ಕ್ರಿಕೆಟ್‌), ಶುಭಾಂಕರ್‌ ಶರ್ಮಾ (ಗಾಲ್ಫ್‌), ಮನ್‌ಪ್ರೀತ್‌ ಸಿಂಗ್‌ (ಹಾಕಿ), ಸವಿತಾ (ಹಾಕಿ), ರವಿ ರಾಥೋರ್‌ (ಪೋಲೊ), ರಾಹಿ ಸರ್ನೊಬಾಟ್‌(ಶೂಟಿಂಗ್‌), ಅಂಕುರ್‌ ಮಿತ್ತಲ್‌(ಶೂಟಿಂಗ್‌), ಶ್ರೇಯಸಿ ಸಿಂಗ್‌ (ಶೂಟಿಂಗ್‌), ಮನಿಕಾ ಬಾತ್ರಾ (ಟೇಬಲ್‌ ಟೆನಿಸ್‌), ಜಿ. ಸತಿಯನ್‌ (ಟೇಬಲ್‌ ಟೆನಿಸ್‌), ರೋಹನ್‌ ಬೋಪಣ್ಣ (ಟೆನಿಸ್‌), ಸುಮಿತ್‌ ಕುಮಾರ್‌ (ಕುಸ್ತಿ), ಪೂಜಾ ಕಡಿಯನ್‌ (ವು ಶು), ಅಂಕುರ್‌ ಧಾಮಾ (ಪ್ಯಾರಾ ಅಥ್ಲೆಟಿಕ್ಸ್‌), ಮನೋಜ್‌ ಸರ್ಕಾರ್‌ (ಪ್ಯಾರಾ ಬ್ಯಾಡ್ಮಿಂಟನ್‌). 

ಪ್ರಶಸ್ತಿ ಪ್ರದಾನ ಯಾವಾಗ? 

ಇದೇ ಸೆಪ್ಟೆಂಬರ್ 25ರಂದು ರಾಷ್ಟ್ರಪತಿ ಭವನದಲ್ಲಿ ನಡೆಯಲಿರುವ ವರ್ಣ ರಂಜಿತ ಸಮಾರಂಭದಲ್ಲಿ ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ. ಸಾಮಾನ್ಯವಾಗಿ ಆಗಸ್ಟ್‌ 29ರ ರಾಷ್ಟ್ರೀಯ ಕ್ರೀಡಾ ದಿನದಂದು ಪ್ರಸಸ್ತಿ ಪ್ರದಾನ ಮಾಡಲಾಗುತ್ತದೆ. ಆದರೆ ಇಂಡೊನೇಷ್ಯಾದಲ್ಲಿ ಏಷ್ಯನ್‌ ಗೇಮ್ಸ್‌ ನಡೆಯುತ್ತಿದ್ದ ಕಾರಣ ಪ್ರಶಸ್ತಿ ಪ್ರದಾನವನ್ನು ಇದೇ ಸೆಪ್ಟೆಂಬರ್ 25ಕ್ಕೆ ಮುಂದೂಡಲಾಗಿತ್ತು. ಖೇಲ್‌ ರತ್ನ ಪ್ರಶಸ್ತಿ ಸ್ವೀಕರಿಸುವವರು 7.5 ಲಕ್ಷ ರೂ. ಪಡೆಯಲಿದ್ದರೆ, ಅರ್ಜುನ ಗೌರವಕ್ಕೆ ಭಾಜನರಾದವರು 5 ಲಕ್ಷ ರೂ. ಸ್ವೀಕರಿಸಲಿದ್ದಾರೆ.