ಮೂರನೇ ಆರ್ಥಿಕ ಶಕ್ತಿಯಾಗುವತ್ತ ಭಾರತ ದಾಪುಗಾಲು

0
17

ವಿಶ್ವಬ್ಯಾಂಕ್‌ ವರದಿಯ ಪ್ರಕಾರ ಭಾರತ ಜಗತ್ತಿನ 6ನೇ ಅತಿ ದೊಡ್ಡ ಆರ್ಥಿಕತೆಯಾಗಿ ಹೊರಹೊಮ್ಮಿದ್ದು, ಫ್ರಾನ್ಸ್‌ ಅನ್ನು ಹಿಂದಿಕ್ಕಿದೆ. ಇದರೊಂದಿಗೆ ಭಾರತ ಮುಂಬರುವ 10 ವರ್ಷಗಳಲ್ಲಿ ಮೂರನೇ ಸ್ಥಾನಕ್ಕೂ ಜಿಗಿಯುವ ನಿರೀಕ್ಷೆಯೂ ಉಂಟಾಗಿದೆ.

ಬೆಂಗಳೂರು:  ವಿಶ್ವಬ್ಯಾಂಕ್‌  ವರದಿಯ ಪ್ರಕಾರ ಭಾರತ ಜಗತ್ತಿನ 6ನೇ ಅತಿ ದೊಡ್ಡ ಆರ್ಥಿಕತೆಯಾಗಿ ಹೊರಹೊಮ್ಮಿದ್ದು, ಫ್ರಾನ್ಸ್‌ ಅನ್ನು ಹಿಂದಿಕ್ಕಿದೆ. ಇದರೊಂದಿಗೆ ಭಾರತ ಮುಂಬರುವ 10 ವರ್ಷಗಳಲ್ಲಿ ಮೂರನೇ ಸ್ಥಾನಕ್ಕೂ ಜಿಗಿಯುವ ನಿರೀಕ್ಷೆಯೂ ಉಂಟಾಗಿದೆ. 

2017ರಲ್ಲಿ ಭಾರತದ ಒಟ್ಟಾರೆ ರಾಷ್ಟ್ರೀಯ ಉತ್ಪನ್ನದ(ಜಿಡಿಪಿ) ಮೌಲ್ಯ 2.597 ಲಕ್ಷ ಕೋಟಿ ಡಾಲರ್‌ ಆಗಿದ್ದರೆ, ಬ್ರಿಟನ್‌ 2.622 ಲಕ್ಷ ಕೋಟಿ , ಜರ್ಮನಿ 3.677 ಲಕ್ಷ ಕೋಟಿ , ಜಪಾನ್‌ 4.872 ಲಕ್ಷ ಕೋಟಿ ಡಾಲರ್‌ ಮೌಲ್ಯವನ್ನು ಹೊಂದಿದೆ. ಅಂದರೆ ಭಾರತಕ್ಕೂ ಈ ಮೂರು ರಾಷ್ಟ್ರಗಳಿಗೂ ಭಾರಿ ಅಂತರ ಇಲ್ಲ. ಹೀಗಾಗಿ ಭಾರತವು ಮೂರನೇ ಸ್ಥಾನಕ್ಕೆ ಏರುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. 

ಅಮೆರಿಕದ ಬ್ಯಾಂಕ್‌ ಆಫ್‌ ಅಮೆರಿಕದ ಅಧೀನ ಸಂಸ್ಥೆಯಾದ ಮೆರಿಲಿ ಲಿಂಚ್‌ ಕಳೆದ ವರ್ಷ ನವೆಂಬರ್‌ನಲ್ಲಿ ಪ್ರಕಟಿಸಿದ್ದ ವರದಿಯ ಪ್ರಕಾರ 2028ರ ವೇಳೆಗೆ ಭಾರತ, ಮೂರನೇ ಅತಿ ದೊಡ್ಡ ಆರ್ಥಿಕ ಶಕ್ತಿಯಾಗಿ ನಿಲ್ಲಲಿದೆ. ಬ್ರಿಕ್ಸ್‌ ಗುಂಪಿನ ರಾಷ್ಟ್ರಗಳಲ್ಲಿ ಈಗಾಗಲೇ ಬ್ರೆಜಿಲ್‌ ಹಾಗೂ ರಷ್ಯಾವನ್ನು ಭಾರತ ಹಿಂದಿಕ್ಕಿದ್ದು, ಚೀನಾ ನಂತರದ ಅತಿ ದೊಡ್ಡ ಆರ್ಥಿಕತೆಯಾಗಿದೆ ಎಂದು ವರದಿ ತಿಳಿಸಿದೆ. 

”ಭಾರತ ಈಗಾಗಲೇ ಖರೀದಿಯ ಸಾಮರ್ಥ್ಯ‌ದ ದೃಷ್ಟಿಯಿಂದ ವಿಶ್ವದ ಮೂರನೇ ಅತಿ ದೊಡ್ಡ ಆರ್ಥಿಕತೆಯಾಗಿದೆ. ಸಾಮಾನ್ಯ ಜಿಡಿಪಿ ಲೆಕ್ಕದಲ್ಲೂ ಶೀಘ್ರ ಭಾರತ 5ನೇ ಸ್ಥಾನಕ್ಕೆ ಏರಲಿದೆ” ಎಂದು ಪ್ರಧಾನಿ ನರೇಂದ್ರ ಮೋದಿಯವರೂ ಈ ಹಿಂದೆ ಹೇಳಿದ್ದರು. 

ಭಾರತ ಮುಂದಿನ 10 ವರ್ಷದಲ್ಲಿ ಮೂರನೇ ದೊಡ್ಡ ಆರ್ಥಿಕತೆಯಾಗಲಿದೆ ಎಂದು ಎಚ್‌ಎಸ್‌ಬಿಸಿ ಕೂಡ ವರದಿ ಮಾಡಿದೆ. ಆದರೆ ಸಾಮಾಜಿಕ, ಆರ್ಥಿಕ, ಆರೋಗ್ಯ, ಶಿಕ್ಷಣ ಕ್ಷೇತ್ರದಲ್ಲಿ ನಿರಂತರ ಸುಧಾರಣೆಯ ಪ್ರಕ್ರಿಯೆ ಮತ್ತು ಹೂಡಿಕೆ ನಡೆಯಬೇಕು ಎಂದಿದೆ. 

ಭಾರತದ ಮುನ್ನಡೆಗೆ ಕಾರಣ 
-ಆರ್ಥಿಕತೆಯ ಬುನಾದಿ ಭದ್ರ 
-ನೋಟು ಅಮಾನ್ಯತೆ, ಜಿಎಸ್‌ಟಿಯ ಸಕಾರಾತ್ಮಕ ಪರಿಣಾಮ. 
-ಕೇಂದ್ರ ಸರಕಾರದ ಆರ್ಥಿಕ ಸುಧಾರಣೆ ಪ್ರಕ್ರಿಯೆ. 
-ವಾರ್ಷಿಕ ಸರಾಸರಿ ಶೇ.7.5ರ ಜಿಡಿಪಿ ಪ್ರಗತಿ 
-ಹಣದುಬ್ಬರದ ಇಳಿಕೆ 
-ರಫ್ತು ಚೇತರಿಕೆ 
-ವಿದೇಶಿ ನೇರ ಬಂಡವಾಳ ಹೂಡಿಕೆ ಹೆಚ್ಚಳ 
-ಗ್ರಾಮೀಣ ಭಾರತದಲ್ಲಿ ವರಮಾನ ಏರಿಕೆ