ಮುಂಬೈ ದಾಳಿ ಸಂಚುಕೋರ ಜಮಾತ್‌–ಉದ್‌–ದವಾ(ಜೆಯುಡಿ) ಸಂಘಟನೆ ಮುಖ್ಯಸ್ಥ ಹಫೀಜ್‌ ಸಯೀದ್‌ನನ್ನು
ಲಾಹೋರ್‌ನಿಂದ ಗುಜ್ರ್‌ನ್ವಾಲಾಗೆ ತೆರಳುತ್ತಿದ್ದಾಗ ಜುಲೈ 17 ರ ಬುಧವಾರ ಬಂಧಿಸಲಾಗಿದೆ.
ಲಾಹೋರ್‌(ಪಿಟಿಐ): ಮುಂಬೈ ದಾಳಿ ಸಂಚುಕೋರ ಜಮಾತ್‌–ಉದ್‌–ದವಾ(ಜೆಯುಡಿ) ಸಂಘಟನೆ ಮುಖ್ಯಸ್ಥ ಹಫೀಜ್‌ ಸಯೀದ್‌ನನ್ನು ಜುಲೈ 17 ರ ಬುಧವಾರ ಬಂಧಿಸಲಾಗಿದೆ.
ಭಯೋತ್ಪಾದನಾ ಚಟುವಟಿಕೆಗೆ ಹಣಕಾಸಿನ ನೆರವು ನೀಡಿದ ಆರೋಪಕ್ಕಾಗಿ ಪಂಜಾಬ್‌ ಪ್ರಾಂತ್ಯದ ಭಯೋತ್ಪಾ
ದನಾ ನಿಗ್ರಹ ಇಲಾಖೆ ಈ ಕ್ರಮ ಕೈಗೊಂಡಿದೆ. ಲಾಹೋರ್‌ನಿಂದ ಗುಜ್ರ್‌ನ್ವಾಲಾಗೆ ತೆರಳುತ್ತಿದ್ದಾಗ ಹಫೀಜ್‌ನನ್ನು ಬಂಧಿಸಲಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಗುಜ್ರ್‌ನ್ವಾಲಾ ಭಯೋತ್ಪಾದನಾ ನಿಗ್ರಹ ನ್ಯಾಯಾಲಯದಲ್ಲಿ ಹಫೀಜ್‌ನನ್ನು ಹಾಜರುಪಡಿಸಲಾಯಿತು.
ನ್ಯಾಯಾಲಯ ಹಫೀಜ್‌ನನ್ನು ನ್ಯಾಯಾಂಗ ವಶಕ್ಕೆ ನೀಡಿದ ಬಳಿಕ ಬಿಗಿ ಭದ್ರತೆಯಲ್ಲಿ ಲಾಹೋರ್‌ನ ಕೋಟ್‌ ಲಖ್ಪತ್‌ ಜೈಲಿಗೆ ಕರೆದೊಯ್ಯಲಾಯಿತು. ಇದೇ ಜೈಲಿನಲ್ಲಿ ಮಾಜಿ ಪ್ರಧಾನಿ ನವಾಜ್‌ ಷರೀಫ್‌ ಭ್ರಷ್ಟಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಏಳು ವರ್ಷ ಶಿಕ್ಷೆ ಅನುಭವಿಸುತ್ತಿದ್ದಾರೆ.
ಹಫೀಜ್‌ ಸಯೀದ್‌ ಸೇರಿದಂತೆ 13 ಜೆಯುಡಿ ನಾಯಕರ ವಿರುದ್ಧ 23 ಆರೋಪಪಟ್ಟಿಗಳನ್ನು ಭಯೋತ್ಪಾದನಾ ನಿಗ್ರಹ ಇಲಾಖೆ ದಾಖಲಿಸಿದೆ.
ಈ ಸಂಘಟನೆಗಳು ಟ್ರಸ್ಟ್‌ಗಳ ಮೂಲಕ ಸಂಗ್ರಹಿಸುವ ಹಣವನ್ನು ಭಯೋತ್ಪಾದನಾ ಚಟುವಟಿಕೆಗೆ ಬಳಸುತ್ತಿವೆ ಎನ್ನುವ ಆರೋಪದ ಬಗ್ಗೆ ತನಿಖೆ ಕೈಗೊಳ್ಳಲಾಗಿದೆ. ಲಾಹೋರ್‌, ಗುಜ್ರ್‌ನ್ವಾಲಾ ಮತ್ತು ಮುಲ್ತಾನ್‌ನಲ್ಲಿ ಈ ಬಗ್ಗೆ ಪ್ರಕರಣಗಳನ್ನು ದಾಖಲಿಸಲಾಗಿದೆ.
ಪುಲ್ವಾಮಾ ದಾಳಿ ಬಳಿಕ ಅಂತರರಾಷ್ಟ್ರೀಯ ಸಮುದಾಯದ ಒತ್ತಡಕ್ಕೆ ಮಣಿದು ಜೆಯುಡಿ ಮತ್ತು ಎಫ್‌ಐಎಫ್‌ ಆಸ್ತಿಗಳನ್ನು ಪಾಕಿಸ್ತಾನ ಸರ್ಕಾರ ಈಗಾಗಲೇ ತನ್ನ ನಿಯಂತ್ರಣಕ್ಕೆ ತೆಗೆದುಕೊಂಡಿದೆ. ಲಾಹೋರ್‌ನಲ್ಲಿನ ಜೆಯುಡಿ ಪ್ರಧಾನ ಕಚೇರಿ ಪ್ರವೇಶಿಸಲು ಸಹ ಸಯೀದ್‌ಗೆ ಅವಕಾಶ ನಿರಾಕರಿಸಲಾಗಿದೆ.
