ಮಲೇಷ್ಯಾದಲ್ಲಿ ಇಂಟರ್‌ನೆಟ್‌ ಬಳಕೆ ನಿಷೇಧ ಚಿಂತನೆ

0
12

17 ವರ್ಷದೊಳಗಿನ ಯುವಪೀಳಿಗೆಯಲ್ಲಿ ವಿಡಿಯೊ ಗೇಮ್‌ ಮತ್ತು ಸಾಮಾಜಿಕ ಜಾಲತಾಣ ಬಳಕೆಯ ಚಟ ಹತ್ತಿಕ್ಕಲು ಮಧ್ಯಾಹ್ನ 12 ಗಂಟೆಯಿಂದ ಸಂಜೆ 6 ಗಂಟೆವರೆಗೆ ಇಂಟರ್‌ನೆಟ್‌ ಬಳಕೆ ನಿಷೇಧಿಸಲು ಮಲೇಷ್ಯಾ ಸರಕಾರ ಯೋಜಿಸುತ್ತಿದೆ.

ಕೌಲಾಲಂಪುರ: 17 ವರ್ಷದೊಳಗಿನ ಯುವಪೀಳಿಗೆಯಲ್ಲಿ ವಿಡಿಯೊ ಗೇಮ್‌ ಮತ್ತು  ಸಾಮಾಜಿಕ ಜಾಲತಾಣ  ಬಳಕೆಯ ಚಟ ಹತ್ತಿಕ್ಕಲು ಮಧ್ಯಾಹ್ನ 12 ಗಂಟೆಯಿಂದ ಸಂಜೆ 6 ಗಂಟೆವರೆಗೆ ಇಂಟರ್‌ನೆಟ್‌ ಬಳಕೆ ನಿಷೇಧಿಸಲು ಮಲೇಷ್ಯಾ  ಸರಕಾರ ಯೋಜಿಸುತ್ತಿದೆ. ಈ ಕುರಿತು ಮಲೇಷ್ಯಾ ಸಂಸತ್‌ಗೆ ಮಾಹಿತಿ ನೀಡಿದ ಉಪ ಆರೋಗ್ಯ ಸಚಿವ ಡಾ.ಲೀ ಬೂನ್‌ ಚೈ, ”ಹದಿಹರೆಯದವರ ಮಾನಸಿಕ ಆರೋಗ್ಯವನ್ನು ಗಮನದಲ್ಲಿಟ್ಟುಕೊಂಡು, ಅವರ ಆನ್‌ಲೈನ್‌ ವಿಡಿಯೋ ಗೇಮ್‌ ಮತ್ತು ಸಾಮಾಜಿಕ ಜಾಲತಾಣ ಆ್ಯಪ್‌ಗಳ ಬಳಕೆಯ ಚಟ ದೂರಮಾಡಲು, ಜಪಾನ್‌ ಮತ್ತು ದಕ್ಷಿಣ ಕೊರಿಯಾದಲ್ಲಿ ತೆಗೆದುಕೊಂಡಿರುವ ಕ್ರಮಗಳ ಮಾದರಿಯನ್ನು ಇಲ್ಲಿ ಅನುಷ್ಠಾನಗೊಳಿಸಲು ಚಿಂತಿಸಲಾಗುತ್ತಿದೆ,” ಎಂದು ತಿಳಿಸಿದರು. 

ಕಳೆದ ವರ್ಷ ನಡೆಸಿದ ಅಧ್ಯಯನದ ಪ್ರಕಾರ 13ರಿಂದ 17 ವರ್ಷದ ಮಲೇಷ್ಯನ್‌ ಮಕ್ಕಳಲ್ಲಿ ಶೇ.34.9ರಷ್ಟು ಮಕ್ಕಳಿಗೆ ಇಂಟರ್ನೆಟ್‌ ಚಟ ಇರುವುದು ತಿಳಿದುಬಂದಿದೆ. ವಿಡಿಯೋ ಗೇಮ್‌ ಮತ್ತು ಸಾಮಾಜಿಕ ಜಾಲತಾಣ ಆ್ಯಪ್‌ಗಳ ಅತಿಯಾದ ಬಳಕೆಯು ಮಕ್ಕಳ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು. ವಿಶ್ವ ಆರೋಗ್ಯ ಸಂಸ್ಥೆಯು ವಿಡಿಯೋ ಗೇಮ್‌ ಚಟವನ್ನು ಮಾನಸಿಕ ಆರೋಗ್ಯ ಕಾಯಿಲೆ ಎಂದು ವಿಭಾಗೀಕರಿಸಿದೆ ಎಂದು ಲೀ ಬೂನ್‌ ಚೈತಿಳಿಸಿದರು. 

ಕಳೆದ ವರ್ಷ ಮಲೇಷ್ಯನ್‌ ಕಮ್ಯುನಿಕೇಷನ್ಸ್‌ ಮತ್ತು ಮಲ್ಟಿಮೀಡಿಯಾ ಕಮಿಷನ್‌(ಎಂಸಿಎಂಸಿ) ನೀಡಿದ ಮಾಹಿತಿ ಪ್ರಕಾರ, ಮಲೇಷಿಯಾದ 24.1 ದಶಲಕ್ಷ ಇಂಟರ್ನೆಟ್‌ ಬಳಕೆದಾರರಲ್ಲಿ ಶೇ.80ರಷ್ಟು ಜನರು ಸಾಮಾಜಿಕ ಜಾಲತಾಣಗಳಿಗಾಗಿ ಇಂರ್ಟನೆಟ್‌ ಬಳಸುತ್ತಾರೆ.