ಭಾರತದ 50 ಉತ್ಪನ್ನಗಳ ಆಮದಿಗೆ ಅಮೆರಿಕದ ವಿನಾಯಿತಿ ರದ್ದು

0
492

ಮಹತ್ವದ ಬೆಳವಣಿಗೆಯಲ್ಲಿ ಅಮೆರಿಕ ಗುರುವಾರ ಭಾರತದ ಕನಿಷ್ಠ 50 ಉತ್ಪನ್ನಗಳಿಗೆ ಆಮದು ಸುಂಕ ವಿನಾಯಿತಿಯನ್ನು ರದ್ದುಪಡಿಸಿದೆ. ಈ ಬಹುತೇಕ ಉತ್ಪನ್ನಗಳು ಕೃಷಿ ಹಾಗೂ ಕೈಮಗ್ಗ ವಲಯದ ವಸ್ತುಗಳಾಗಿದ್ದು, ಭಾರತದಿಂದ ಅಮೆರಿಕಕ್ಕೆ ರಫ್ತು ಮಾಡಲು ಸಮಸ್ಯೆಯಾಗಲಿದೆ.

ವಾಷಿಂಗ್ಟನ್‌ : ಮಹತ್ವದ ಬೆಳವಣಿಗೆಯಲ್ಲಿ ಅಮೆರಿಕ ನವೆಂಬರ್ 1 ರ ಗುರುವಾರ ಭಾರತದ ಕನಿಷ್ಠ 50 ಉತ್ಪನ್ನಗಳಿಗೆ ಆಮದು ಸುಂಕ ವಿನಾಯಿತಿಯನ್ನು ರದ್ದುಪಡಿಸಿದೆ. ಈ ಬಹುತೇಕ ಉತ್ಪನ್ನಗಳು ಕೃಷಿ ಹಾಗೂ ಕೈಮಗ್ಗ ವಲಯದ ವಸ್ತುಗಳಾಗಿದ್ದು, ಭಾರತದಿಂದ ಅಮೆರಿಕಕ್ಕೆ ರಫ್ತು ಮಾಡಲು ಸಮಸ್ಯೆಯಾಗಲಿದೆ. 

ಇದರೊಂದಿಗೆ ಭಾರತದ ಜತೆಗೂ ವಾಣಿಜ್ಯಸಮರವನ್ನು ತೀವ್ರಗೊಳಿಸಲು ಅಮೆರಿಕದ ಟ್ರಂಪ್‌ ಸರಕಾರ ನಿರ್ಧರಿಸಿದೆ. ಟ್ರಂಪ್‌ ಸರಕಾರವು ಇದುವರೆಗೆ ಭಾರತದ 90 ವಸ್ತುಗಳಿಗೆ ತೆರಿಗೆಯಲ್ಲಿ ವಿನಾಯಿತಿ ಕೊಟ್ಟಿತ್ತು. 

ಅರ್ಜೆಂಟೀನಾ, ಬ್ರೆಜಿಲ್‌, ಪಾಕಿಸ್ತಾನ, ಥಾಯ್ಲೆಂಡ್‌, ಟರ್ಕಿಯಿಂದಲೂ ಅಮೆರಿಕಕ್ಕೆ ರಫ್ತಿಗೆ ಸುಂಕ ವಿನಾಯಿತಿ ರದ್ದುಪಡಿಸಲಾಗಿದೆ. ಜಿಎಸ್‌ಪಿ ಅಡಿಯಲ್ಲಿ ಅಡಕೆ, ಮಾವು, ಟರ್ಪಂಟೈನ್‌ ಗಮ್‌, ವಿನೇಗರ್‌, ಸೀಮೆ ಸುಣ್ಣ, ಉಪ್ಪು ಇತ್ಯಾದಿ ವಸ್ತುಗಳ ರಫ್ತಿಗೆ ಅಮೆರಿಕದಿಂದ ಸುಂಕ ವಿನಾಯಿತಿ ರದ್ದಾಗಿದೆ. 

ಆದರೆ ನವೆಂಬರ್‌ 1ರಿಂದ ಅನ್ವಯವಾಗುವಂತೆ ಕನಿಷ್ಠ 50 ವಸ್ತುಗಳಿಗೆ ಈ ಸುಂಕ ವಿನಾಯಿತಿಯ ಅವಕಾಶ ರದ್ದಾಗಿದೆ. 2018ರ ನವೆಂಬರ್‌ನಿಂದ ಜಿಎಸ್‌ಪಿ ಕಾರ್ಯಕ್ರಮದ ಅಡಿಯಲ್ಲಿ ಈ ಎಲ್ಲ ವಸ್ತುಗಳಿಗೆ ಸುಂಕ ವಿನಾಯಿತಿ ಇರುವುದಿಲ್ಲ ಎಂದು ಅಮೆರಿಕದ ವಾಣಿಜ್ಯ ಇಲಾಖೆ ತಿಳಿಸಿದೆ. 

ಭವಿಷ್ಯದಲ್ಲಿ ಭಾರತದ ಮತ್ತಷ್ಟು ಉತ್ಪನ್ನಗಳಿಗೆ ಅಮೆರಿಕ ಸರಕಾರ ಸುಂಕ ವಿನಾಯಿತಿಯನ್ನು ರದ್ದುಪಡಿಸುವ ಸಾಧ್ಯತೆ ಇದೆ. ಅಮೆರಿಕದ ಜನರಲೈಸ್ಡ್‌ ಸಿಸ್ಟಮ್‌ ಆಫ್‌ ಪ್ರಿಫರೆನ್ಸ್‌ (ಜಿಎಸ್‌ಪಿ) ಕಾರ್ಯಕ್ರಮದ ಅಡಿಯಲ್ಲಿ ಭಾರತಕ್ಕೆ ಇದುವರೆಗೆ ಲಾಭ ದೊರಕಿತ್ತು. ಅಮೆರಿಕ ನೇರವಾಗಿ ಯಾವುದೇ ದೇಶದ ಹೆಸರನ್ನು ಪ್ರಸ್ತಾಪಿಸದಿದ್ದರೂ, ಇದರಿಂದ ಭಾರತಕ್ಕೆ ಹೊಡೆತ ಬೀಳಲಿದೆ. ಯಾಕೆಂದರೆ ಪಟ್ಟಿಯಲ್ಲಿರುವ ಬಹುತೇಕ ಉತ್ಪನ್ನಗಳು ಭಾರತದಿಂದ ಅಮೆರಿಕಕ್ಕೆ ರಫ್ತಾಗುತ್ತಿವೆ. ಜಿಎಸ್‌ಪಿ ಎನ್ನುವುದು ಅಮೆರಿಕದ ಹಳೆಯ ಪದ್ಧತಿಯಾಗಿದ್ದು, ಇದರಡಿಯಲ್ಲಿ ಅಮೆರಿಕಕ್ಕೆ ಸಾವಿರಾರು ಉತ್ಪನ್ನಗಳ ರಫ್ತಿಗೆ ಅನುಕೂಲವಾಗುತ್ತಿತ್ತು. ಯಾಕೆಂದರೆ ಸುಂಕದಲ್ಲಿ ವಿನಾಯಿತಿ ಇರುತ್ತಿತ್ತು. 2017ರಲ್ಲಿ ಭಾರತ ಈ ಜಿಎಸ್‌ಪಿ ಅಡಿಯಲ್ಲಿ 560 ಕೋಟಿ ಡಾಲರ್‌ಗೂ ಅಧಿಕ ಉತ್ಪನ್ನಗಳನ್ನು ಯಾವುದೇ ತರಿಗೆ ಇಲ್ಲದೆ ರಫ್ತು ಮಾಡಿತ್ತು. 

ಅಮೆರಿಕದ ಈ ನಿರ್ಧಾರದಿಂದ ಭಾರತದ ಸಣ್ಣ ಮತ್ತು ಮಧ್ಯಮ ವಲಯದ ಉದ್ದಿಮೆಗಳಿಗೆ ತೊಂದರೆಯಾಗಲಿದೆ. ಮುಖ್ಯವಾಗಿ ಕೈಮಗ್ಗ ವಲಯಕ್ಕೆ ಇದು ಸಮಸ್ಯೆಯಾಗಲಿದೆ. ಕೃಷಿ ವಲಯದ ಉತ್ಪನ್ನಗಳ ರಫ್ತಿಗೆ ಕೂಡ ಅಡಚಣೆ ಆಗಲಿದೆ.