ಭಾರತದಿಂದ ಆಮದು ಹೆಚ್ಚಿಸಲು ಚೀನಾ ಸಮ್ಮತಿ

0
369

ಭಾರತ ಇತರ ಯಾವುದೇ ದೇಶಕ್ಕಿಂತಲೂ ಹೆಚ್ಚು ವ್ಯಾಪಾರ ಕೊರತೆಯನ್ನು ಚೀನಾದ ಜತೆ ಹೊಂದಿದೆ. ಅಂದರೆ ರಫ್ತಿಗೆ ಹೋಲಿಸಿದರೆ, ಭಾರತ ಅತಿ ಹೆಚ್ಚು ಉತ್ಪನ್ನಗಳನ್ನು ಚೀನಾದಿಂದ ಖರೀದಿಸುತ್ತಿದೆ.

ಹೊಸದಿಲ್ಲಿ: ಭಾರತದಿಂದ ಆಮದನ್ನು ಹೆಚ್ಚಿಸಲು  ಚೀನಾ ಸಮ್ಮತಿಸಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಸುರೇಶ್‌ ಪ್ರಭು ತಿಳಿಸಿದ್ದಾರೆ. 

”ಜಾಗತಿಕ ಮಟ್ಟದ ವಿದ್ಯಮಾನಗಳ ಪರಿಣಾಮ ಭಾರತೀಯ ರಫ್ತು ಹೆಚ್ಚಳಕ್ಕೆ ಅವಕಾಶ ಸೃಷ್ಟಿಯಾಗಿದೆ” ಎಂದು ವಾಣಿಜ್ಯ ಸಂಘಟನೆ ಕಾನ್ಫಡರೇಷನ್‌ ಆಫ್‌ ಇಂಡಿಯನ್‌ ಇಂಡಸ್ಟ್ರೀಸ್‌ (ಸಿಐಐ) ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಅವರು ಹೇಳಿದರು.

ಚೀನಿ ಅಧಿಕಾರಿಗಳು ನವೆಂಬರ್‌ನಲ್ಲಿ ಭಾರತೀಯ ಅಧಿಕಾರಿಗಳ ಜತೆಗೆ ಮಾತುಕತೆ ನಡೆಸಲಿದ್ದಾರೆ. ಭಾರತೀಯ ರಫ್ತುದಾರರು ಚೀನಾದ ಮಾರುಕಟ್ಟೆ ಪ್ರವೇಶದ ಬಗ್ಗೆ ಎದುರಿಸುತ್ತಿರುವ ಅಡಚಣೆಗಳ ಬಗ್ಗೆ ಅಲ್ಲಿನ ಅಧಿಕಾರಿಗಳ ಜತೆಗೆ ಚರ್ಚಿಸಲಿದ್ದಾರೆ ಎಂದರು. 

ಭಾರತಇತರ ಯಾವುದೇ ದೇಶಕ್ಕಿಂತಲೂ ಹೆಚ್ಚು ವ್ಯಾಪಾರ ಕೊರತೆಯನ್ನು ಚೀನಾದ ಜತೆ ಹೊಂದಿದೆ. ಅಂದರೆ ರಫ್ತಿಗೆ ಹೋಲಿಸಿದರೆ, ಭಾರತ ಅತಿ ಹೆಚ್ಚು ಉತ್ಪನ್ನಗಳನ್ನು ಚೀನಾದಿಂದ ಖರೀದಿಸುತ್ತಿದೆ. ಭಾರಿ ಸಂಖ್ಯೆಯಲ್ಲಿ ಚೀನಾದ ಎಲೆಕ್ಟ್ರಾನಿಕ್ಸ್‌ ಮತ್ತು ಇತರ ಉತ್ಪನ್ನಗಳು ಭಾರತಕ್ಕೆ ಆಮದಾಗುತ್ತಿವೆ. ಭಾರತದ ರಫ್ತು ಹೆಚ್ಚಳವಾದಾಗ ಈ ಅಂತರ ಕಡಿಮೆಯಾದೀತು. 

200 ಉತ್ಪನ್ನಗಳ ರಫ್ತು ಹೆಚ್ಚಳಕ್ಕೆ ಯೋಜನೆ 

ಭಾರತವು ಚೀನಾಕ್ಕೆ ಸುಮಾರು 200 ವಿಧದ ಉತ್ಪನ್ನಗಳ ರಫ್ತು ಹೆಚ್ಚಿಸಲು ಯೋಜನೆ ಹಮ್ಮಿಕೊಂಡಿದೆ ಎಂದು ಮೂಲಗಳು ತಿಳಿಸಿವೆ. ಆಮದು-ರಫ್ತು ಅಂತರವನ್ನು ತಗ್ಗಿಸುವುದು ಇದರ ಉದ್ದೇಶ. 

ಏಷ್ಯಾ ಪೆಸಿಫಿಕ್‌ ವ್ಯಾಪಾರ ಒಪ್ಪಂದದ ಅಡಿಯಲ್ಲಿ ಹಲವಾರು ಉತ್ಪನ್ನಗಳಿಗೆ ಸುಂಕ ಮನ್ನಾವನ್ನೂ ಭಾರತ ನಿರೀಕ್ಷಿಸಿದೆ. ಹತ್ತಿಯ ಉತ್ಪನ್ನಗಳು, ಹರಳೆಣ್ಣೆ, ಗ್ರಾನೈಟ್‌, ವಜ್ರ, ವಜ್ರಾಭರಣಗಳು, ಗ್ಲಾಸ್‌ ಎನ್ವಲಪ್‌ ಇತ್ಯಾದಿ ವಸ್ತುಗಳಿಗೆ ಸುಂಕ ವಿನಾಯಿತಿಯನ್ನು ಭಾರತ ನಿರೀಕ್ಷಿಸಿದೆ. 

ರಫ್ತು ಹೆಚ್ಚಳ
 

ಭಾರತದ ರಫ್ತು ಕಳೆದ 6 ವರ್ಷಗಳಲ್ಲಿಯೇ ಗರಿಷ್ಠ ಮಟ್ಟಕ್ಕೆ ಏರಿಕೆಯಾಗಿದೆ. ವಲಯಾವಾರು ರಫ್ತು ಹೆಚ್ಚಳಕ್ಕೆ ತೆಗೆದುಕೊಂಡಿರುವ ಉಪಕ್ರಮಗಳು, ರಫ್ತು ಉತ್ತೇಜನಾ ಯೋಜನೆಗಳು, ಪಾರದರ್ಶಕತೆಯ ಪರಿಣಾಮ 2017-18ರ ಅಕ್ಟೋಬರ್‌-ಸೆಪ್ಟೆಂಬರ್‌ ಅವಧಿಯಲ್ಲಿ ರಫ್ತು ಶೇ.14.76ರಷ್ಟು ವೃದ್ಧಿಸಿದೆ ಎಂದು ವಾಣಿಜ್ಯ ಇಲಾಖೆ ತಿಳಿಸಿದೆ.