ಫೇಸ್‌ಬುಕ್‌ ಷೇರು ‘ಮಹಾ’ಪತನ

0
20

ಸಾಮಾಜಿಕ ಜಾಲತಾಣ ದಿಗ್ಗಜ ಫೇಸ್‌ಬುಕ್‌ನ ಷೇರು ದರ ಜುಲೈ26 ರ ಗುರುವಾರ ಶೇ.20ರಷ್ಟು ದಿಢೀರ್‌ ಕುಸಿತಕ್ಕೀಡಾಗಿದ್ದು, ಹೂಡಿಕೆದಾರರನ್ನು ತಲ್ಲಣಗೊಳಿಸಿದೆ.

ನ್ಯೂಯಾರ್ಕ್‌ : ಸಾಮಾಜಿಕ ಜಾಲತಾಣ ದಿಗ್ಗಜ ಫೇಸ್‌ಬುಕ್‌ನ ಷೇರು ದರ ಗುರುವಾರ ಶೇ.20ರಷ್ಟು ದಿಢೀರ್‌ ಕುಸಿತಕ್ಕೀಡಾಗಿದ್ದು, ಹೂಡಿಕೆದಾರರನ್ನು ತಲ್ಲಣಗೊಳಿಸಿದೆ. 

ಫೇಸ್‌ಬುಕ್‌ ತನ್ನ ಬಳಕೆದಾರರ ಸಂಖ್ಯೆಯ ಬೆಳವಣಿಗೆಯಲ್ಲಿ ಗಣನೀಯ ಇಳಿಕೆ ಹಾಗೂ ಭವಿಷ್ಯದಲ್ಲಿ ಆದಾಯ ಕುಸಿತದ ಎಚ್ಚರಿಕೆಯ ಮುನ್ನೋಟವನ್ನು ಬಹಿರಂಗಪಡಿಸಿದ ಬೆನ್ನಲ್ಲೇ, ಷೇರು ದರ ನೆಲಕಚ್ಚಿತು. ಕೆಲವೇ ಗಂಟೆಗಳಲ್ಲಿ ಕಂಪನಿಯ ಷೇರುಗಳ ಒಟ್ಟು ಮಾರುಕಟ್ಟೆ ಮೌಲ್ಯದಲ್ಲಿ 1,200 ಕೋಟಿ ಡಾಲರ್‌ನಷ್ಟು ನಷ್ಟವಾಯಿತು. 

ಪತನವಾಗಿದ್ದು ಹೇಗೆ? 

ಫೇಸ್‌ಬುಕ್‌ನ ಮುಖ್ಯ ಹಣಕಾಸು ಅಧಿಕಾರಿ ಡೇವಿಡ್‌ ವೆಹ್ನರ್‌ ಬುಧವಾರ ಸುದ್ದಿಗೋಷ್ಠಿಯಲ್ಲಿ, ಕಂಪನಿಯ ಭವಿಷ್ಯಕ್ಕೆ ಸಂಬಂಧಿಸಿ ಕೆಟ್ಟ ಸುದ್ದಿಯನ್ನು ಹೇಳಿದರು. ಕಂಪನಿಯ ಆದಾಯದಲ್ಲಿ ತೀವ್ರ ಕುಸಿತವಾಗುವ ಸಾಧ್ಯತೆ ಇದೆ, ವೆಚ್ಚಗಳು ಏರಿಕೆಯಾಗಬಹುದು ಎಂಬ ಮುನ್ನೆಚ್ಚರಿಕೆ ನೀಡಿದರು. ಇದು ಗುರುವಾರ ಷೇರುಗಳ ದರ ಪ್ರಪಾತಕ್ಕೆ ಕುಸಿಯಲು ಕಾರಣವಾಯಿತು. ಮೊದಲೇ ಬಳಕೆದಾರರ ಮಾಹಿತಿ ಗೌಪ್ಯತೆಗೆ ಧಕ್ಕೆಯ ಆರೋಪಕ್ಕೆ ಗುರಿಯಾಗಿದ್ದ ಫೇಸ್‌ಬುಕ್‌ಗೆ, ಆದಾಯ ಇಳಿಕೆಯ ಅಪಾಯ ತಟ್ಟಿದೆ. 

ಬಳಕೆದಾರರ ಸಂಖ್ಯೆ ಕುಸಿತ: 

ಫೇಸ್‌ಬುಕ್‌ನ ಬಳಕೆದಾರರ ಮಾಸಿಕ ಸರಾಸರಿ ಬೆಳವಣಿಗೆ ಏಪ್ರಿಲ್‌-ಜೂನ್‌ ಅವಧಿಯಲ್ಲಿ ಕೇವಲ ಶೇ.1.54ರಷ್ಟು ವೃದ್ಧಿಸಿದ್ದು, ಇದಕ್ಕೂ ಹಿಂದಿನ ತ್ರೈಮಾಸಿಕದಲ್ಲಿ ಶೇ.3.14ರಷ್ಟಿತ್ತು. 

ಮೊದಲ ಬಾರಿಗೆ ಯುರೋಪ್‌ನಲ್ಲಿ ಫೇಸ್‌ಬುಕ್‌ ಬಳಕೆದಾರರ ಸಂಖ್ಯೆ ಕುಸಿಯತೊಡಗಿದೆ. ಅಲ್ಲಿ 37.7 ಕೋಟಿಯಿಂದ 37.6 ಕೋಟಿಗೆ ತಗ್ಗಿದೆ. ಅಮೆರಿಕದಲ್ಲಿ 24.1 ಕೋಟಿಗೆ ನಿಂತಿದ್ದು, ನಂತರ ಬೆಳವಣಿಗೆಯಾಗಿಲ್ಲ. ಕೆನಡಾದಲ್ಲೂ ಇದೇ ಪರಿಸ್ಥಿತಿ ಇದೆ. ಅಮೆರಿಕ ಹಾಗೂ ಯುರೋಪ್‌, ಫೇಸ್‌ಬುಕ್‌ಗೆ ಆದಾಯದ ದೃಷ್ಟಿಯಿಂದ ಎರಡು ಆಕರ್ಷಕ ಮಾರುಕಟ್ಟೆಗಳಾಗಿದೆ. ಅಮರಿಕದಲ್ಲಿ ಪ್ರತಿ ಬಳಕೆದಾರನಿಂದ ಸರಾಸರಿ 25 ಡಾಲರ್‌ ಆದಾಯ ಇದ್ದರೆ, ಯುರೋಪ್‌ನಲ್ಲಿ 8.76 ಡಾಲರ್‌ ಆದಾಯ ಇದೆ. ಆದರೆ ಜಗತ್ತಿನ ಇತರ ಕಡೆಗಳಲ್ಲಿ ಪ್ರತಿ ಬಳಕೆದಾರನಿಗೆ ಸಿಗುವುದು ಶೇ.1.91 ಡಾಲರ್‌ ಮಾತ್ರ. ಹೀಗಾಗಿ ಅಮೆರಿಕ ಹಾಗೂ ಯುರೋಪ್‌ನಲ್ಲಿ ಬಳಕೆದಾರರ ಸಂಖ್ಯೆ ನಿಂತ ನೀರಾಗಿರುವುದು ಫೇಸ್‌ಬುಕ್‌ನ ಭವಿಷ್ಯವನ್ನು ಅತಂತ್ರಗೊಳಿಸಿದೆ. 

ಕಳೆದ ಒಂದೂವರೆ ವರ್ಷಗಳಿಂದ ಫೇಸ್‌ಬುಕ್‌ ಒಂದಿಲ್ಲೊಂದು ವಿವಾದಗಳಲ್ಲಿ ಸಿಲುಕಿದೆ. ಜತೆಗೆ ಬಳಕೆದಾರರೂ ಕ್ರಮೇಣ ದೂರವಾಗುತ್ತಿದ್ದಾರೆ. ಇದು ಭವಿಷ್ಯದಲ್ಲಿ ಭಾರಿ ಆದಾಯ ಕುಸಿತದ ಅಪಾಯವನ್ನೂ ತಂದೊಡ್ಡಿದೆ. ಸ್ವತಃ ಕಂಪನಿಯ ವರದಿಯೇ ಆದಾಯ ಇಳಿಕೆಯ ವರದಿ ನೀಡಿದ್ದು, ಹೂಡಿಕೆದಾರರ ಆತಂಕಕ್ಕೆ ಕಾರಣವಾಗಿದೆ.