ಪಾಕಿಸ್ತಾನಕ್ಕೆ ಮಾಹಿತಿ ನೀಡಿದ ಡಿಆರ್‌ಡಿಒ ಎಂಜಿನಿಯರ್‌ ಸೆರೆ

0
539

ದೇಶದ ಸೇನಾ ಬತ್ತಳಿಕೆಯಲ್ಲಿರುವ ಅತ್ಯಂತ ಪ್ರಮುಖ ವ್ಯೂಹಾತ್ಮಕ ಕ್ಷಿಪಣಿಯೆಂದು ಗುರುತಿಸಿಕೊಂಡಿರುವ ಸೂಪರ್‌ಸಾನಿಕ್‌ ಬ್ರಹ್ಮೋಸ್‌ ಕ್ಷಿಪಣಿಯ ಅತ್ಯಂತ ಸೂಕ್ಷ್ಮ ತಾಂತ್ರಿಕ ಮಾಹಿತಿಗಳನ್ನು ಪಾಕಿಸ್ತಾನಕ್ಕೆ ಒದಗಿಸಿದ ಆರೋಪದಲ್ಲಿ ರಕ್ಷಣಾ ಸಂಶೋಧನಾ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಉದ್ಯೋಗಿಯನ್ನು ಸೋಮವಾರ ಬಂಧಿಸಲಾಗಿದೆ. (ಡಿಆರ್‌ಡಿಒ)

ಹೊಸದಿಲ್ಲಿ: ದೇಶದ ಸೇನಾ ಬತ್ತಳಿಕೆಯಲ್ಲಿರುವ ಅತ್ಯಂತ ಪ್ರಮುಖ ವ್ಯೂಹಾತ್ಮಕ ಕ್ಷಿಪಣಿಯೆಂದು ಗುರುತಿಸಿಕೊಂಡಿರುವ ಸೂಪರ್‌ಸಾನಿಕ್‌ ಬ್ರಹ್ಮೋಸ್‌ ಕ್ಷಿಪಣಿಯ ಅತ್ಯಂತ ಸೂಕ್ಷ್ಮ ತಾಂತ್ರಿಕ ಮಾಹಿತಿಗಳನ್ನು ಪಾಕಿಸ್ತಾನಕ್ಕೆ ಒದಗಿಸಿದ ಆರೋಪದಲ್ಲಿ ರಕ್ಷಣಾ ಸಂಶೋಧನಾ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ)  ಉದ್ಯೋಗಿಯನ್ನು ಸೋಮವಾರ ಬಂಧಿಸಲಾಗಿದೆ. 

ಡಿಆರ್‌ಡಿಒ ಎಂಜಿನಿಯರ್‌ ನಿಶಾಂತ್‌ ಅಗರ್‌ವಾಲ್‌ನನ್ನು ಮಹಾರಾಷ್ಟ್ರ ಮತ್ತು ಉತ್ತರ ಪ್ರದೇಶದ ಉಗ್ರ ನಿಗ್ರಹ ದಳ ಜಂಟಿ ಕಾರ್ಯಾಚರಣೆ ನಡೆಸಿ ನಾಗಪುರದಲ್ಲಿ ಸೋಮವಾರ ಬಂಧಿಸಿವೆ. ಇವರು ಪಾಕ್‌ ಜತೆಗೆ ಅಮೆರಿಕಕ್ಕೂ ಕ್ಷಿಪಣಿಯ ತಾಂತ್ರಿಕ ಮಾಹಿತಿಗಳನ್ನು ರವಾನಿಸಿದ್ದಾರೆ ಎನ್ನಲಾಗಿದೆ. ಬ್ರಹ್ಮೋಸ್‌ ಕ್ಷಿಪಣಿ ದೇಶದ ಭದ್ರತೆಯಲ್ಲಿ ಅತ್ಯಂತ ಮಹತ್ವದ್ದೆನಿಸಿದೆ. ನಿಶಾಂತ್‌ ಐಎಸ್‌ಐ ಜತೆಗೆ ಹಂಚಿಕೊಂಡಿರುವ ಮಾಹಿತಿಗಳು ಏನು ಎಂಬುದರ ಬಗ್ಗೆ ಅಧಿಕಾರಿಗಳ ತಂಡ ತೀವ್ರ ವಿಚಾರಣೆ ನಡೆಸುತ್ತಿದೆ. 

ಕ್ಷಿಪಣಿಯ ತಾಂತ್ರಿಕ ವಿವರಗಳು ಐಎಸ್‌ಐ ಪಾಲಾಗಿರುವ ಹಿನ್ನೆಲೆಯಲ್ಲಿ ಮುಂದೆ ಅದು ಉಗ್ರರಿಗೆ ವಿವಿಧ ರೀತಿಯಲ್ಲಿ ನೆರವಾಗುವ ಸಾಧ್ಯತೆಗಳಿರುವುದರಿಂದ ದೇಶದ ಭದ್ರತೆಯ ವಿಚಾರದಲ್ಲಿ ಆತಂಕ ಸೃಷ್ಟಿಯಾಗಿದೆ. 

ಚಿನ್ನದ ಪದಕ ವೀರ: ನಾಗಪುರದ ವರ್ಧಾ ರಸ್ತೆಯಲ್ಲಿರುವ ಬ್ರಹ್ಮೋಸ್‌ ಏರೋಸ್ಪೇಸ್‌ ಪ್ರೈವೇಟ್‌ ಲಿಮಿಟೆಡ್‌ ಕಂಪನಿಯಲ್ಲಿ 4 ವರ್ಷಗಳಿಂದ ಕೆಲಸ ಮಾಡುತ್ತಿದ್ದ ನಿಶಾಂತ್‌ ಅಗರ್‌ವಾಲ್‌ ರೂರ್ಕೆ ಮೂಲದವ. ಕುರುಕ್ಷೇತ್ರದ ನ್ಯಾಷನಲ್‌ ಇನ್ಸಿಟ್ಯೂಟ್‌ ಆಫ್‌ ಟೆಕ್ನಾಲಜಿಯಲ್ಲಿ ಓದಿದ ಈತ ಚಿನ್ನದ ಪದಕ ಪಡೆದಿದ್ದ. ಎರಡು ತಿಂಗಳ ಹಿಂದಷ್ಟೇ ಮದುವೆಯಾಗಿದ್ದ ಈತ ಬಾಡಿಗೆ ಮನೆಯಲ್ಲಿ ಪತ್ನಿ ಜತೆ ವಾಸವಿದ್ದ. ಖಚಿತ ಮಾಹಿತಿ ಮೇರೆಗೆ ಎಟಿಎಸ್‌ ಅಧಿಕಾರಿಗಳ ತಂಡವು ಈ ಬಾಡಿಗೆ ಮನೆಗೆ ಹೋಗಿ ಅಗರ್‌ವಾಲ್‌ ಅವರನ್ನು ಬಂಧಿಸಿದೆ. 

ಪಾಕ್‌ ಐಡಿ ರಚಿಸಿ ಮಾಹಿತಿ ರವಾನೆ 

ನಿಶಾಂತ್‌ ಅಗರ್‌ವಾಲ್‌ ಪಾಕಿಸ್ತಾನ ಮೂಲದ ಐಡಿಯಿಂದ ಫೇಸ್‌ಬುಕ್‌ನಲ್ಲಿ ಬ್ರಹ್ಮೋಸ್‌ ಕ್ಷಿಪಣಿಯ ಅತ್ಯಂತ ಸೂಕ್ಷ್ಮ ತಾಂತ್ರಿಕ ವಿವರಗಳನ್ನು ಐಎಸ್‌ಐ ಜತೆಗೆ ಹಂಚಿಕೊಂಡಿರುವುದು ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ. ಐಎಸ್‌ಐನ ಹನಿಟ್ರ್ಯಾಪ್‌ ಬಲೆಗೆ ಬಿದ್ದಿರುವ ಸಾಧ್ಯತೆಯೂ ಇದೆ. ಈತನ ಕಚೇರಿ ಮತ್ತು ಮನೆಯ ಕಂಪ್ಯೂಟರ್‌ಗಳು, ಹೆಚ್ಚುವರಿ ಹಾರ್ಡ್‌ಡಿಸ್ಕ್‌, ಪೆನ್‌ಡ್ರೈವ್‌ಗಳನ್ನು ವಶಕ್ಕೆ ಪಡೆದು ಅವುಗಳನ್ನು ಜಾಲಾಡಲಾಗುತ್ತಿದೆ ಎಂದು ಉತ್ತರ ಪ್ರದೇಶದ ಎಟಿಎಸ್‌ ಅಧಿಕಾರಿ ಅಸೀಮ್‌ ಅರುಣ್‌ ತಿಳಿಸಿದ್ದಾರೆ. ಅಧಿಕೃತ ರಹಸ್ಯ ಕಾಯಿದೆಯಡಿ ಪ್ರಕರಣ ದಾಖಲಿಸಲಾಗುವುದು ಎಂದು ಅವರು ಹೇಳಿದ್ದಾರೆ. 

ಏನಿದರ ವೈಶಿಷ್ಟ್ಯ? 

ಡಿಆರ್‌ಡಿಒ ಮತ್ತು ರಷ್ಯಾದ ಎನ್‌ಪಿಒಎಂ ಸಂಸ್ಥೆಗಳು ಜಂಟಿಯಾಗಿ ಅಭಿವೃದ್ಧಿಪಡಿಸಿದ 300 ಕಿ.ಮೀ ದಾಳಿ ವ್ಯಾಪ್ತಿ ಸಾಮರ್ಥ್ಯ‌ ಹೊಂದಿರುವ ಬ್ರಹ್ಮೋಸ್‌ ಒಂದು ವ್ಯೂಹಾತ್ಮಕ ಕ್ಷಿಪಣಿ. ಇದನ್ನು ಟ್ರಕ್‌ಗಳ ಮುಖಾಂತರ ಬೇಕಾದ ಕಡೆ ಹೊತ್ತೊಯ್ದು ಶತ್ರು ಪಾಳಯದ ಮೇಲೆ ಪ್ರಯೋಗಿಸಬಹುದು. ಇದಷ್ಟೇ ಅಲ್ಲದೇ ಯುದ್ಧ ನೌಕೆಗಳಲ್ಲಿ, ಜಲಾಂತರ್ಗಾಮಿಗಳಲ್ಲಿ ಮತ್ತು ಯುದ್ಧ ವಿಮಾನಗಳಲ್ಲಿ ಅಳವಡಿಸಿ ಪ್ರಯೋಗಿಸಬಹುದಾಗಿದ್ದು, ಇದು ಇದರ ವೈಶಿಷ್ಟ್ಯವಾಗಿದೆ. ಭೂಸೇನೆ, ನೌಕಾಪಡೆ ಮತ್ತು ವಾಯುಪಡೆಯ ಬತ್ತಳಿಕೆಯಲ್ಲಿ ಇದು ಸೇರಿದೆ.