ತಿಂಗಳಲ್ಲಿ 150 ಯುವಜನರಿಗೆ ಹಾರ್ಟ್‌ ಅಟ್ಯಾಕ್‌

0
8

ಪ್ರತಿ ತಿಂಗಳೂ 150 ಯುವಜನರು ಹೃದಯಾಘಾತಕ್ಕೆ ಒಳಗಾಗಿ ಬೆಂಗಳೂರು ನಗರದಲ್ಲಿರುವ ಆಸ್ಪತ್ರೆಗಳಿಗೆ ಸೇರುತ್ತಿದ್ದಾರೆ ಎಂದು ಏಷ್ಯಾ ಫೆಸಿಫಿಕ್‌ ವಲಯದ ಅತಿ ದೊಡ್ಡ ಹೃದ್ರೋಗ ಸಂಸ್ಥೆ ಜಯದೇವದ ಸಂಶೋಧನಾ ಸಂಸ್ಥೆ ಹೇಳಿದೆ.

ಬೆಂಗಳೂರು: ಪ್ರತಿ ತಿಂಗಳೂ 150 ಯುವಜನರು ಹೃದಯಾಘಾತಕ್ಕೆ ಒಳಗಾಗಿ ಬೆಂಗಳೂರು ನಗರದಲ್ಲಿರುವ ಆಸ್ಪತ್ರೆಗಳಿಗೆ ಸೇರುತ್ತಿದ್ದಾರೆ ಎಂದು ಏಷ್ಯಾ ಫೆಸಿಫಿಕ್‌ ವಲಯದ ಅತಿ ದೊಡ್ಡ ಹೃದ್ರೋಗ ಸಂಸ್ಥೆ ಜಯದೇವದ ಸಂಶೋಧನಾ ಸಂಸ್ಥೆ ಹೇಳಿದೆ. 

16-40 ವರ್ಷದೊಳಗಿನವರಲ್ಲಿ ಹೃದಯಾಘಾತ ಹೆಚ್ಚುತ್ತಿದೆ. ಹೃದಯಾಘಾತದಿಂದ ತಿಂಗಳಲ್ಲಿ ಆಸ್ಪತ್ರೆಗೆ ದಾಖಲಾಗುತ್ತಿರುವ 150 ಯುವಕರಲ್ಲಿ ಎಂಟು ಮಂದಿ 25 ವರ್ಷದೊಳಗಿನವರಾಗಿರುತ್ತಾರೆ ಎಂದು ಹೃದ್ರೋಗ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ. 

2017ರ ಏಪ್ರಿಲ್‌ನಿಂದ ಈವರೆಗೆ 1,864 ಯುವಕರು ಹೃದಯಾಘಾತದಿಂದ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಆಗಸ್ಟ್ 10 ರ ಶುಕ್ರವಾರ ಒಂದೇ ದಿನ ಆರು ಮಂದಿ ದಾಖಲಾಗಿದ್ದಾರೆ ಎಂದು ಅಧ್ಯಯನ ವರದಿ ಹೇಳಿದೆ. 

ಬೆಂಗಳೂರು ನಿವಾಸಿಯಾಗಿರುವ ಆಂಧ್ರಪ್ರದೇಶದ 16 ವರ್ಷದ ವಿದ್ಯಾರ್ಥಿ ಹೃದಯಾಘಾತದಿಂದ ಆಸ್ಪತ್ರೆ ಸೇರಿದ್ದು, ಆರಂಭದಲ್ಲಿ ಗ್ಯಾಸ್ಟ್ರಿಕ್‌ ಲಕ್ಷಣವೆಂದು ನಿರ್ಲಕ್ಷಿಸಿದ್ದರು. ಇದೇ ರೀತಿ ಹೆಚ್ಚಿನವರು ಹೃದಯಾಘಾತದ ಮುನ್ಸೂಚನೆಗಳನ್ನು ನಿರ್ಲಕ್ಷಿಸುತ್ತಾರೆ. ತೀವ್ರಗೊಂಡಾಗಲೇ ಅರಿವಿಗೆ ಬರುವುದು ಎಂದು ಡಾ. ರಾಹುಲ್‌ ಪಾಟೀಲ್‌ ಹೇಳುತ್ತಾರೆ. 

ಹೃದಯಾಘಾತಕ್ಕೆ ಒಳಗಾಗುವ ಕೆಲವು ಯುವಕರಲ್ಲಿ ಕೊಲೆಸ್ಟ್ರಾಲ್‌, ಡಯಾಬಿಟಿಸ್‌, ಸ್ಥೂಲಕಾಯ ಸೇರಿದಂತೆ ಹೃದಯಾಘಾತಕ್ಕೆ ಕಾರಣವಾಗುವ ಯಾವುದೇ ಲಕ್ಷಣಗಳು ಕಂಡು ಬರುವುದಿಲ್ಲ ಜೀವನಶೈಲಿ, ಒತ್ತಡ, ವಾಯುಮಾಲಿನ್ಯವು ಕಾರಣವಿರಬಹುದು. ಯುವಜನರಲ್ಲಿ ಹೃದಯಾಘಾತಕ್ಕೆ ಒಳಗಾಗುವವರಲ್ಲಿ 45%ರಷ್ಟು ಮಂದಿ ಬೆಂಗಳೂರು ನಿವಾಸಿಗಳು. ಅವರಲ್ಲಿ 25% ಮಂದಿ ಕ್ಯಾಬ್‌ ಚಾಲಕರು. ಉಳಿದಂತೆ ದಿನದಲ್ಲಿ ಟ್ರಾಫಿಕ್‌ ಮಧ್ಯೆ ಒಂದು ಗಂಟೆಗೂ ಹೆಚ್ಚು ಟ್ರಾವೆಲ್‌ ಮಾಡುವವರು ಆಗಿರುತ್ತಾರೆ ಎಂದು ತಜ್ಞ , ಜಯದೇವದ ನಿರ್ದೇಶಕ ಡಾ. ಮಂಜುನಾಥ್‌ ವಿಶ್ಲೇಷಿಸುತ್ತಾರೆ. 

ಯುವಜನತೆ ಮಹತ್ವಾಕಾಂಕ್ಷೆಯ ಬೆನ್ನು ಹತ್ತಿ ಬಹಳಷ್ಟು ಒತ್ತಡಕ್ಕೆ ಒಳಗಾಗುವುದು ಮತ್ತು ವಾಯುಮಾಲಿನ್ಯದಿಂದ ಹೃದ್ರೋಗ ಹೆಚ್ಚುತ್ತಿದೆ. ಅವಿಭಕ್ತ ಕುಟುಂಬಗಳಿಲ್ಲದ ಕಾರಣ ಒತ್ತಡ ನಿವಾರಣೆಗೆ ನೆರವಾಗುವ ಸಾಮಾಜಿಕ ವ್ಯವಸ್ಥೆ ಕೂಡ ಇಲ್ಲ. ಹೀಗೆ ಹಲವು ಕಾರಣಗಳಿಂದ ಯುವಜನತೆ ಬಹಳಷ್ಟು ಸಮಸ್ಯೆಗಳನ್ನು ಎದುರಿಸಬೇಕಾದ ಸನ್ನಿವೇಶವಿದೆ ಎಂದು ಅವರು ಹೇಳುತ್ತಾರೆ. 

ಮೂರು ತಿಂಗಳ ಹಿಂದೆ ಯುಪಿಎಸ್‌ಸಿಗೆ ಓದುತ್ತಿದ್ದ 20 ಯುವಕ ಹೃದಯಾಘಾತದಿಂದ ಆಸ್ಪತ್ರೆ ಸೇರಿದ್ದ. ಯುವಜನತೆ ಹೃದಯಾಘಾತಕ್ಕೆ ಒಳಗಾಗುವುದನ್ನು ಗಮನಿಸಿದರೆ ಶೇ 92 ಪುರುಷರು. ಮಹಿಳೆಯರಲ್ಲಿ ಪ್ರಜನನ ಹಾರ್ಮೋನ್‌ ಇರುವ ಕಾರಣ ಸಹಜವಾಗಿಯೇ ಅವರಿಗೆ ಹೃದಯಾಘಾತದಿಂದ ರಕ್ಷಣೆ ದೊರೆಯುತ್ತದೆ ಎಂದು ಡಾ. ಮಂಜುನಾಥ್‌ ಹೇಳುತ್ತಾರೆ. 

ಇತ್ತೀಚೆಗೆ ಮಹಿಳೆಯರು ಬಹಳ ಬೇಗ ಮೊನೊಪಾಸ್ ಹಂತ ತಲುಪುತ್ತಿದ್ದು, ಹಾರ್ಮೋನ್‌ ಅಸಮತೋಲನವು ಹೃದ್ರೋಗದಂಥ ಆರೋಗ್ಯ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತದೆ ಎಂದೂ ಅವರು ವಿವರಿಸುತ್ತಾರೆ.