ಫೋಕ್ಸ್ವ್ಯಾಗನ್ ಕಂಪನಿಯ ಎಮಿಷನ್ ಸಾಫ್ಟ್ವೇರ್ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸೋಮವಾರ ಸೋದರ ಆಡಿ ಕಂಪನಿಯ ಮುಖ್ಯಸ್ಥ ರುಪರ್ಟ್ ಸ್ಟ್ಯಾಂಡ್ಲರ್ ಅವರನ್ನು ಜರ್ಮನಿ ತನಿಖಾ ಸಂಸ್ಥೆ ಅಧಿಕಾರಿಗಳು ಬಂಧಿಸಿದ್ದಾರೆ.
ಫ್ರಾಂಕ್ಫರ್ಟ್: ಫೋಕ್ಸ್ವ್ಯಾಗನ್ ಕಂಪನಿಯ ಎಮಿಷನ್ ಸಾಫ್ಟ್ವೇರ್ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜೂನ್ 18 ರ ಸೋಮವಾರ ಆಡಿ ಕಂಪನಿಯ ಮುಖ್ಯಸ್ಥ ರುಪರ್ಟ್ ಸ್ಟ್ಯಾಂಡ್ಲರ್ ಅವರನ್ನು ಜರ್ಮನಿ ತನಿಖಾ ಸಂಸ್ಥೆ ಅಧಿಕಾರಿಗಳು ಬಂಧಿಸಿದ್ದಾರೆ.
ಪ್ರಕರಣಕ್ಕೆ ಸಂಬಂಧಿತ ಸಾಕ್ಷ್ಯಗಳನ್ನು ರುಪರ್ಟ್ ನಾಶಪಡಿಸುವ ಸಾಧ್ಯತೆಯಿರುವುದರಿಂದ ಈ ಕ್ರಮಕ್ಕೆ ಮುಂದಾಗಿದ್ದೇವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಫೋಕ್ಸ್ವ್ಯಾಗನ್ ಕಂಪನಿ ಡೀಸೆಲ್ ವಾಹನಗಳಲ್ಲಿ ಎಮಿಷನ್ ಸಾಫ್ಟ್ವೇರ್ನಲ್ಲಿ ಬದಲಾವಣೆ ಮಾಡುವ ಮೂಲಕ ಎಮಿಷನ್ ಮಾನದಂಡಗಳ ಪರೀಕ್ಷೆಯಲ್ಲಿ ಕಾರುಗಳು ಪಾಸ್ ಆಗುವಂತೆ ಮಾಡಿತ್ತು. 2015ರಲ್ಲಿ ಫೋಕ್ಸ್ವ್ಯಾಗನ್ ಕಂಪನಿ ವಂಚನೆ ಪ್ರಕರಣವನ್ನು ಒಪ್ಪಿಕೊಂಡಿತ್ತು.
ಜತೆಗೆ ಕಳೆದ ತಿಂಗಳು ಯೂರೋಪ್ನಾದ್ಯಂತ ಫೋಕ್ಸ್ವ್ಯಾಗನ್ ಕಂಪನಿ ಒಡೆತನದ ಆಡಿ ಎ6 ಮತ್ತು ಎ7 ಮಾದರಿಯ ಸುಮಾರು 60 ಸಾವಿರ ಕಾರುಗಳನ್ನು ವಾಪಸ್ ಕರೆಸಿಕೊಂಡಿತ್ತು. ಕಳೆದ ವರ್ಷ ಕೂಡ 8.5 ಲಕ್ಷ ಕಾರುಗಳನ್ನು ಫೋಕ್ಸ್ವ್ಯಾಗನ್ ಕಂಪನಿ ವಾಪಸ್ ಕರೆಸಿಕೊಂಡಿತ್ತು. ಡೀಸೆಲ್ ಎಮಿಷನ್ ವಂಚನೆಗೆ ಸಂಬಂಧಿಸಿದಂತೆ ಜರ್ಮನಿ ಸರ್ಕಾರ ಕಂಪನಿಗೆ 8,164 ಕೋಟಿ ರೂ. ದಂಡ ವಿಧಿಸಿದೆ.
