ಜೆಇಇ ಮುಖ್ಯ ಪರೀಕ್ಷೆಯಲ್ಲಿ ಕೆವಿನ್‌ ಮಾರ್ಟಿನ್‌ ಕರ್ನಾಟಕ ರಾಜ್ಯಕ್ಕೆ ಪ್ರಥಮ

0
766

ದೇಶದ ಪ್ರತಿಷ್ಠಿತ ಐಐಟಿಗಳಿಗೆ ಪ್ರವೇಶಾವಕಾಶ ಕಲ್ಪಿಸುವ 2019ನೇ ಸಾಲಿನ ಜೆಇಇ ಮುಖ್ಯ ಪರಿಕ್ಷೆಯಲ್ಲಿ ಜಯನಗರದ ಬೆಂಗಳೂರು ಇಂಟರ್‌ ನ್ಯಾಷನಲ್‌ ಅಕಾಡೆಮಿಯ ವಿದ್ಯಾರ್ಥಿ ಕೆವಿನ್‌ ಮಾರ್ಟಿನ್‌ ಶೇ.100ರಷ್ಟು ಅಂಕಗಳನ್ನು ಪಡೆದು ರಾಜ್ಯಕ್ಕೆ ಮೊದಲ ಸ್ಥಾನ ಪಡೆದಿದ್ದಾರೆ.

ಬೆಂಗಳೂರು: ದೇಶದ ಪ್ರತಿಷ್ಠಿತ ಐಐಟಿಗಳಿಗೆ ಪ್ರವೇಶಾವಕಾಶ ಕಲ್ಪಿಸುವ 2019ನೇ ಸಾಲಿನ ಜೆಇಇ ಮುಖ್ಯ ಪರಿಕ್ಷೆಯಲ್ಲಿ ಜಯನಗರದ ಬೆಂಗಳೂರು ಇಂಟರ್‌ ನ್ಯಾಷನಲ್‌ ಅಕಾಡೆಮಿಯ ವಿದ್ಯಾರ್ಥಿ ಕೆವಿನ್‌ ಮಾರ್ಟಿನ್‌ ಶೇ.100ರಷ್ಟು ಅಂಕಗಳನ್ನು ಪಡೆದು ರಾಜ್ಯಕ್ಕೆ ಮೊದಲ ಸ್ಥಾನ ಪಡೆದಿದ್ದಾರೆ. 

ನ್ಯಾಷನಲ್‌ ಟೆಸ್ಟಿಂಗ್‌ ಏಜೆನ್ಸಿ (ಎನ್‌ಟಿಇ) 2019 ಜನೇವರಿ 19 ರ ಶನಿವಾರ ಜೆಇಇ ಮುಖ್ಯ ಪರೀಕ್ಷೆ ಫಲಿತಾಂಶವನ್ನು ಪ್ರಕಟಿಸಿತು. ಈ ಬಾರಿ ದೇಶಾದ್ಯಂತ ಒಟ್ಟು 15 ಮಂದಿ ಶೇ.100ರಷ್ಟು ಅಂಕಗಳನ್ನು ಗಳಿಸಿದ್ದು, ಇವರಲ್ಲಿ ಕೆವಿನ್‌ ಮಾರ್ಟಿನ್‌ ಸಹ ಒಬ್ಬರಾಗಿದ್ದಾರೆ. ಕೆವಿನ್‌ ಅವರು ಜೆಇಇ ಮುಖ್ಯ ಪರೀಕ್ಷೆಗೆ ನಗರದ ‘ಆಲೆನ್‌ ಕೆರಿಯರ್‌ ಇನ್‌ಸ್ಟಿಇನ್ಸ್‌ಟಿಟ್ಯೂಟ್‌’ನಲ್ಲಿ ತರಬೇತಿ ಪಡೆದಿದ್ದರು. 

ಫಲಿತಾಂಶದ ಬಗ್ಗೆ ಸಂತಸ ವ್ಯಕ್ತಪಡಿಸಿರುವ ಕೆವಿನ್‌ ಮಾರ್ಟಿನ್‌, ”ಈ ಫಲಿತಾಂಶದಿಂದ ತುಂಬಾ ಖುಷಿ ತಂದಿದ್ದು, ಇದರ ಎಲ್ಲಾ ಶ್ರೇಯಸ್ಸು ನಮ್ಮ ಪೋಷಕರು ಮತ್ತು ಶಿಕ್ಷಕರಿಗೆ ಸಲ್ಲಬೇಕು. ಹಾಗಾಗಿ, ನನ್ನ ಪೋಷಕರಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ. ಹಾಗೂ, ಈ ಪರೀಕ್ಷೆಗೆ ಉತ್ತಮವಾಗಿ ತರಬೇತಿ ನಿಡಿದ ಎಲ್ಲಾ ಉಪನ್ಯಾಸಕರಿಗೂ ಧನ್ಯವಾದ ಅರ್ಪಿಸುತ್ತೇನೆ. ಜೆಇಇ ಮುಖ್ಯ ಪರೀಕ್ಷೆಯಲ್ಲಿ ಕ್ಲಿಷ್ಟ ಸಮಸ್ಯೆಗಳನ್ನು ಸುಲಭವಾಗಿ ಬಿಡಿಸುವುದನ್ನು ನನಗೆ ಹೇಳಿಕೊಟ್ಟರು. ಜತೆಗೆ, ನನ್ನ ಯೋಚನಾ ಮಟ್ಟ ವೃದ್ಧಿಯಾಗಲು ಅವರ ಸಹಕಾರ ಅತ್ಯಂತ ಮಹತ್ವಪೂರ್ಣವಾಗಿತ್ತು,” ಎಂದು ಸ್ಮರಿಸಿದರು. 

ಈ ಬಗ್ಗೆ ಮಾಧ್ಯಮಗಳೊಂದಿಗೆ ಮಾತನಾಡಿದ ಆಲೆನ್‌ ಕೆರಿಯರ್‌ ಇನ್ಸ್‌ಟಿಟ್ಯುಟ್‌ನ ಮುಖ್ಯಸ್ಥ ಮಹೇಶ್‌ ಯಾದವ್‌, 2019ನೇ ಸಾಲಿನ ಜೆಇಇ ಮುಖ್ಯ ಪರೀಕ್ಷೆಯಲ್ಲಿ ಅತ್ಯುತ್ತಮ ಸಾಧನೆ ಮಾಡಿರುವ ಕೆವಿನ್‌ ಮಾರ್ಟಿನ್‌ಗೆ ಧನ್ಯವಾದಗಳನ್ನು ತಿಳಿಸುತ್ತೇನೆ. ಕಳೆದ ಎರಡು ವರ್ಷಗಳ ಶ್ರಮಕ್ಕೆ ಇಂದು ಫಲ ಸಿಕ್ಕಿದೆ. ಅವನ ಭವಿಷ್ಯ ಉತ್ತಮವಾಗಿರಲಿ,” ಎಂದು ಹಾರೈಸಿದರು. 

ಎನ್‌ಟಿಎ ಪ್ರಸಕ್ತ ಸಾಲಿನಿಂದ ವರ್ಷಕ್ಕೆ ಎರಡು ಬಾರಿ ಜೆಇಇ ಮುಖ್ಯ ಪರೀಕ್ಷೆಗಳನ್ನು ನಡೆಸಲು ಕ್ರಮ ಕೈಗೊಂಡಿದೆ. ಇದು ಮೊದಲ ಪ್ರಯತ್ನದ (ಅಟೆಮ್ಟ್‌) ಮುಖ್ಯ ಪರೀಕ್ಷೆಯ ಫಲಿತಾಂಶವಾಗಿದೆ. ಎನ್‌ಟಿಇ 2019ರ ಜ.12ರಂದು ದೇಶ ಮತ್ತು ವಿದೇಶಗಳ ಒಟ್ಟು 467 ಪರೀಕ್ಷಾ ಕೇಂದ್ರಗಳಲ್ಲಿ ಮೊದಲ ಅಟೆಮ್ಟ್‌ ಪರೀಕ್ಷೆಗಳನ್ನು ನಡೆಸಿತ್ತು. ಈ ಬಾರಿ ಒಟ್ಟು 9,29,198 ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಎರಡನೇ ಪ್ರಯತ್ನದ ಮುಖ್ಯ ಪರೀಕ್ಷೆಯು ಏಪ್ರಿಲ್‌ ತಿಂಗಳಲ್ಲಿ ನಡೆಯಲಿದೆ. 

ಶೇ.99ರಷ್ಟು ಅಂಕಗಳಿಸಿದ ವಿದ್ಯಾರ್ಥಿಗಳು 

ಸುಂದರರಾಜನ್‌ ಶ್ರೀನಿವಾಸನ್‌ (ಶೇ.99.977), ಬೇಸ್‌ ಇನ್ಸ್‌ಟಿಟ್ಯೂಟ್‌, 

ಕೆ.ಜೆ.ಶಶಾಂಕ್‌ (ಶೇ.99.961), ಬೇಸ್‌ ಇನ್ಸ್‌ಟಿಟ್ಯೂಟ್‌, 

ಎನ್‌.ಚೇತನ್‌ ರೆಡ್ಡಿ (ಶೇ,99.929), ಬೇಸ್‌ ಇನ್ಸ್‌ಟಿಟ್ಯೂಟ್‌ 

ಎಂ.ಸುದೀಪ್‌ ಗೌಡ (ಶೇ.99.881), ಬೇಸ್‌ ಇನ್ಸ್‌ಟಿಟ್ಯೂಟ್‌ 

ಎಸ್‌.ಎಂ.ಶ್ರೀರಾಮ್‌ (ಶೇ.99.834), ಬೇಸ್‌ ಇನ್ಸ್‌ಟಿಟ್ಯೂಟ್‌ 

ಕೌತ್ಸುಬಾ ರಾಮ್‌ (ಶೇ.99.956)), ಎಫ್‌ಐಐಟಿಜೆಇಇ ಇನ್ಸ್‌ಟಿಟ್ಯೂಟ್‌ 

ಶತಾಕ್ಷಿ ಸಾರಂಗಿ (ಶೇ.99.916), ಎಫ್‌ಐಐಟಿಜೆಇಇ ಇನ್ಸ್‌ಟಿಟ್ಯೂಟ್‌