ಜುಲೈ 16ರಿಂದ ಪೆಟ್ರೋಲ್‌, ಡೀಸೆಲ್‌ ತುಟ್ಟಿ

0
33

ಸಿಎಂ ಎಚ್‌.ಡಿ. ಕುಮಾರಸ್ವಾಮಿ ಬಜೆಟ್‌ ಘೋಷಣೆಯಂತೆ ಪೆಟ್ರೋಲ್‌, ಡೀಸೆಲ್‌ ದರ ಜುಲೈ 16 ರಿಂದ ಹೆಚ್ಚಳವಾಗಲಿದೆ. ಜತೆಗೆ ಕರೆಂಟ್‌ ಶಾಕ್‌ ಹೊಡೆಯಲಿದ್ದು ಲಿಕ್ಕರ್‌ ಬೆಲೆಯೂ ಏರಲಿದೆ.

ಬೆಂಗಳೂರು: ಸಿಎಂ ಎಚ್‌.ಡಿ.  ಕುಮಾರಸ್ವಾಮಿ  ಬಜೆಟ್‌ ಘೋಷಣೆಯಂತೆ ಪೆಟ್ರೋಲ್‌, ಡೀಸೆಲ್‌ ದರ ಜುಲೈ 16 ರಿಂದ ಹೆಚ್ಚಳವಾಗಲಿದೆ. ಜತೆಗೆ ಕರೆಂಟ್‌ ಶಾಕ್‌ ಹೊಡೆಯಲಿದ್ದು ಲಿಕ್ಕರ್‌ ಬೆಲೆಯೂ ಏರಲಿದೆ. 

ರೈತರ ಸಾಲ ಮನ್ನಾಕ್ಕೆ ಸಂಪನ್ಮೂಲ ಹೊಂದಿಸುವ ಉದ್ದೇಶದಿಂದ ಪೆಟ್ರೋಲ್‌ ಮೇಲಿನ ತೆರಿಗೆಯನ್ನು ಶೇ. 30 ರಿಂದ 32 ಕ್ಕೆ ಹಾಗೂ ಡೀಸೆಲ್‌ ಮೇಲಿನ ತೆರಿಗೆಯನ್ನು ಶೇ. 19 ರಿಂದ ಶೇ. 21 ಕ್ಕೆ ಏರಿಸಲು ಬಜೆಟ್‌ನಲ್ಲಿ ಸಿಎಂ ಅವಕಾಶ ಮಾಡಿಕೊಂಡಿದ್ದಾರೆ. ಅದರಂತೆ ಪ್ರತಿ ಲೀಟರ್‌ ಪೆಟ್ರೋಲ್‌ಗೆ 1.14 ರೂ., ಪ್ರತಿ ಲೀಟರ್‌ ಡೀಸೆಲ್‌ ದರದಲ್ಲಿ 1.12 ರೂ. ಹೆಚ್ಚಳವಾಗಲಿದೆ. 

ವಿದ್ಯುತ್‌ ಬಳಕೆ ಮೇಲಿನ ತೆರಿಗೆಯನ್ನು ಶೇ.6 ರಿಂದ ಶೇ. 9 ಕ್ಕೆ ಹೆಚ್ಚಿಸುವ ನಿರ್ಧಾರದಿಂದ ಪ್ರತಿ ಯುನಿಟ್‌ ವಿದ್ಯುತ್‌ ದರದಲ್ಲಿ 10 ಪೈಸೆಯಿಂದ 20 ಪೈಸೆಗೆ ಹೆಚ್ಚಳವಾಗಲಿದೆ. ಮದ್ಯದ ಎಲ್ಲ 18 ಘೋಷಿತ ಸ್ಪ್ಯಾಬ್‌ಗಳ ಮೇಲೆ ಶೇ. 4 ರಷ್ಟು ತೆರಿಗೆ ಜಾಸ್ತಿ ಮಾಡಿದ್ದರಿಂದ ಮದ್ಯ ಪ್ರಿಯರ ಜೇಬಿಗೆ ಕತ್ತರಿ ಬೀಳಲಿದೆ. ಖಾಸಗಿ ವಾಹನಗಳ ಸೇವಾ ತೆರಿಗೆಯಲ್ಲಿ ಪ್ರತಿ ಚದರ ಮೀಟರ್‌ಗೆ ಶೇ. 50 ರಷ್ಟು ಹೆಚ್ಚಳದ ನಿರ್ಧಾರ ಕೈಗೊಳ್ಳಲಾಗಿದೆ. ಇದರಿಂದ ಖಾಸಗಿ ವಾಹನ ಸಂಸ್ಥೆಗಳು ದೊಡ್ಡ ಮಟ್ಟದ ತೆರಿಗೆ ಪಾವತಿಸುವ ಸಂದರ್ಭ ಬರಲಿದೆ. 

ಈ ಎಲ್ಲ ತೆರಿಗೆ ಹೆಚ್ಚಳ ಪ್ರಸ್ತಾವ ಸೇರಿದಂತೆ 2018-19 ರ ವಿತ್ತ ವರ್ಷಕ್ಕೆ ಸಂಬಂಧಿಸಿ ಮೈತ್ರಿ ಸರಕಾರ ಮಂಡಿಸಿದ ಬಜೆಟ್‌ಗೆ ವಿಧಾನಮಂಡಲದ ಉಭಯ ಸದನಗಳಲ್ಲಿ ಅಂಗೀಕಾರ ನೀಡಲಾಗಿದೆ. ಈ ಕುರಿತ ಧನ ವಿನಿಯೋಗ ವಿಧೇಯಕಕ್ಕೆ ರಾಜ್ಯಪಾಲರು ಅಂಕಿತ ಹಾಕುತ್ತಿದ್ದಂತೆ ಗೆಜೆಟ್‌ ಅಧಿಸೂಚನೆ ಹೊರಡಿಸಲಾಗುತ್ತದೆ. ಜತೆಗೆ ದರ ಹೆಚ್ಚಳವೂ ತಕ್ಷಣದಿಂದ ಜಾರಿಯಾಗುತ್ತದೆ. 

ಉಭಯ ಸದನಗಳಲ್ಲಿ ಪಾಸಾಗಿರುವ ಧನ ವಿನಿಯೋಗ ವಿಧೇಯಕವನ್ನು ರಾಜ್ಯಪಾಲರ ಅಂಕಿತಕ್ಕಾಗಿ ರಾಜಭವನಕ್ಕೆ ಶುಕ್ರವಾರ ಕಳುಹಿಸಿ ಕೊಡಲಾಗಿದೆ. ಶನಿವಾರ, ಭಾನುವಾರ ಸರಕಾರಿ ರಜೆ ಇರುವುದರಿಂದ ಜುಲೈ16 ರ  ಸೋಮವಾರದ ವೇಳೆಗೆ ರಾಜ್ಯಪಾಲರ ಅಂಕಿತ ಬಿದ್ದು ಅಧಿಕೃತ ಅಧಿಸೂಚನೆ ಹೊರಬೀಳಲಿದೆ ಎಂದು ನಿರೀಕ್ಷಿಸಲಾಗಿದೆ.