ಜಾಗತಿಕ ತಾಪಮಾನ ಏರಿಕೆ: ಹತ್ತೇ ವರ್ಷಗಳಲ್ಲಿ ಬ್ಯಾಂಕಾಕ್‌ ಮುಳುಗಡೆ ಭೀತಿ

0
450

ಜಾಗತಿಕ ತಾಪಮಾನ ಏರಿಕೆ ಹಾಗೂ ಹವಾಮಾನ ಬದಲಾವಣೆಯ ಪರಿಣಾಮ 10 ಲಕ್ಷ ಜನಸಂಖ್ಯೆಯುಳ್ಳ ಬ್ಯಾಂಕಾಕ್‌ ನಗರ ಇನ್ನು ಹತ್ತೇ ವರ್ಷಗಳಲ್ಲಿ ಭಾಗಶಃ ಜಲಸಮಾಧಿಯಾಗಲಿದೆ ಎಂದು ಹವಾಮಾನ ತಜ್ಞರು ಎಚ್ಚರಿಸಿದ್ದಾರೆ.

ಬ್ಯಾಂಕಾಕ್‌: ಜಾಗತಿಕ ತಾಪಮಾನ ಏರಿಕೆ ಹಾಗೂ ಹವಾಮಾನ ಬದಲಾವಣೆಯ ಪರಿಣಾಮ 10 ಲಕ್ಷ ಜನಸಂಖ್ಯೆಯುಳ್ಳ ಬ್ಯಾಂಕಾಕ್‌ ನಗರ ಇನ್ನು ಹತ್ತೇ ವರ್ಷಗಳಲ್ಲಿ ಭಾಗಶಃ ಜಲಸಮಾಧಿಯಾಗಲಿದೆ ಎಂದು ಹವಾಮಾನ ತಜ್ಞರು ಎಚ್ಚರಿಸಿದ್ದಾರೆ. 

ವಿಶ್ವಸಂಸ್ಥೆಯ ಹವಾಮಾನ ಶೃಂಗಸಭೆಗೆ ಪೂರ್ವಭಾವಿಯಾಗಿ ಥಾಯ್ಲೆಂಡ್‌ನ ರಾಜಧಾನಿಯಲ್ಲಿ ಕಳೆದ ಆಗಸ್ಟ್ 28 ರ ಮಂಗಳವಾರ ನಡೆದ ಸಭೆಯಲ್ಲಿ, ಹಸಿರು ಮನೆ ಅನಿಲಗಳ ಪರಿಣಾಮ ತಗ್ಗಿಸುವ ನಿಟ್ಟಿನಲ್ಲಿ ಹೊಸ ನಿಯಮಗಳ ರೂಪುರೇಷೆ ಸಿದ್ಧಪಡಿಸಿಲಾಯಿತು. 

ತಾಪಮಾನ ಏರಿಕೆಯಿಂದ ಹವಾಮಾನದಲ್ಲಿ ಅಸಾಧಾರಣ ಬದಲಾವಣೆಯಾಗುತ್ತಿದ್ದು, ಭಾರೀ ಬಿರುಗಾಳಿ, ಮಹಾ ಮಳೆ, ತೀವ್ರ ಬರಗಾಲ ಹಾಗೂ ಪ್ರವಾಹಗಳಂತಹ ವೈರುಧ್ಯಗಳು ಉಂಟಾಗುತ್ತಿವೆ. ಈ ಬದಲಾವಣೆಗಳು ಮನುಕುಲಕ್ಕೆ ತೀವ್ರ ಸವಾಲೊಡ್ಡುತ್ತಿವೆ. 

ಸಮುದ್ರ ಮಟ್ಟದಿಂದ 1.5 ಮೀಟರ್‌ ಎತ್ತರದಲ್ಲಿ ಜವುಗು ನೆಲದಲ್ಲಿ ನಿರ್ಮಾಣವಾದ ಬ್ಯಾಂಕಾಕ್‌ ನಗರ ತೀವ್ರ ಪ್ರಾಕೃತಿಕ ವಿಕೋಪಗಳಿಗೆ ತುತ್ತಾಗುವ ಭೀತಿಯಿದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ. 

2030ರ ವೇಳೆಗೆ ಬ್ಯಾಂಕಾಕ್‌ನ ಶೇ 40ರಷ್ಟು ಭಾಗ ಸಮುದ್ರದಲ್ಲಿ ಮುಳುಗಡೆಯಾಗಲಿದೆ ಎಂದು ವಿಶ್ವಬ್ಯಾಂಕ್‌ ವರದಿ ಅಂದಾಜಿಸಿದೆ. 

ಪ್ರಸ್ತುತ ಈ ನಗರ ಪ್ರತಿ ವರ್ಷ ನಾಲ್ಕು ಮಿಲಿಮೀಟರ್‌ನಷ್ಟು ಮುಳುಗಡೆಯಾಗುತ್ತಿದೆ. ಸದ್ಯೋಭವಿಷ್ಯದಲ್ಲಿ ಉಂಟಾಗುವ ಭಾರೀ ಮಳೆ ಹಾಗೂ ಪ್ರವಾಹದಿಂದ ರಾಜಧಾನಿ ನಗರ ಮುಳುಗಡೆಯಾಗುವ ಭೀತಿ ಎದುರಿಸುತ್ತಿದೆ ಎಂದು ಗ್ರೀನ್‌ಪೀಸ್‌ ಸಂಸ್ಥೆಯ ತಾರಾ ಬೌಕಾಂಸ್ರಿ ಹೇಳುತ್ತಾರೆ. 

ಥಾಯ್ಲೆಂಡ್‌ನ ಕೊಲ್ಲಿ ಪ್ರದೇಶಗಳಲ್ಲಿ ಸಮುದ್ರದ ಮಟ್ಟ ಪ್ರತಿ ವರ್ಷ ಜಾಗತಿಕ ಸರಾಸರಿಗಿಂತ 4 ಮಿಲಿ ಮೀಟರ್‌ನಷ್ಟು ಹೆಚ್ಚು ಮುಳುಗಡೆಯಾಗುತ್ತಿದೆ.