ಗ್ರೀನ್‌ಕಾರ್ಡ್‌ ವಿಧೇಯಕಕ್ಕೆ ಅಸ್ತು, ಭಾರತೀಯರಿಗೆ ಲಾಭ

0
27

ಅಮೆರಿಕದ ಗ್ರೀನ್‌ಕಾರ್ಡ್‌ ವಿತರಣೆಗೆ ರಾಷ್ಟ್ರಗಳ ಕೋಟಾವನ್ನು ರದ್ದುಪಡಿಸುವ ವಿಧೇಯಕವನ್ನು ಸಂಸತ್ತಿನ ಜನಪ್ರತಿನಿಧಿ ಸಭೆ (ಹೌಸ್‌ ಆಫ್‌ ರೆಪ್ರೆಸೆಂಟೇಟಿವ್ಸ್‌-ಕೆಳ ಮನೆ) ಭಾರಿ ಬಹುಮತದೊಂದಿಗೆ ಅಂಗೀಕರಿಸಿದೆ. ಇದರಿಂದ 3 ಲಕ್ಷಕ್ಕೂ ಹೆಚ್ಚು ಭಾರತೀಯರಿಗೆ ಅನುಕೂಲವಾಗುವ ನಿರೀಕ್ಷೆ ಇದೆ.

ವಾಷಿಂಗ್ಟನ್‌ : ಅಮೆರಿಕದ ಗ್ರೀನ್‌ಕಾರ್ಡ್‌ ವಿತರಣೆಗೆ ರಾಷ್ಟ್ರಗಳ ಕೋಟಾವನ್ನು ರದ್ದುಪಡಿಸುವ ವಿಧೇಯಕವನ್ನು ಸಂಸತ್ತಿನ ಜನಪ್ರತಿನಿಧಿ ಸಭೆ (ಹೌಸ್‌ ಆಫ್‌ ರೆಪ್ರೆಸೆಂಟೇಟಿವ್ಸ್‌-ಕೆಳ ಮನೆ) ಭಾರಿ ಬಹುಮತದೊಂದಿಗೆ ಅಂಗೀಕರಿಸಿದೆ. ಇದರಿಂದ 3 ಲಕ್ಷಕ್ಕೂ ಹೆಚ್ಚು ಭಾರತೀಯರಿಗೆ ಅನುಕೂಲವಾಗುವ ನಿರೀಕ್ಷೆ ಇದೆ. 

ಒಟ್ಟು 435 ಸದಸ್ಯರಿರುವ ಕೆಳಮನೆಯಲ್ಲಿ 365-65 ಮತಗಳಿಂದ ಜುಲೈ 10 ರ ಬುಧವಾರ ವಿಧೇಯಕ ಅಂಗೀಕಾರವಾಗಿದೆ. ‘ಉನ್ನತ ಮಟ್ಟದ ಕೌಶಲ ಹೊಂದಿರುವ ವಲಸಿಗರಿಗೆ ನ್ಯಾಯಸಮ್ಮತ ನೀತಿ’ (ಎಚ್‌ಆರ್‌ 1044) ಎಂಬ ಶೀರ್ಷಿಕೆಯ ವಿಧೇಯಕವು ಗ್ರೀನ್‌ಕಾರ್ಡ್‌ ವಿತರಣೆಯಲ್ಲಿ ರಾಷ್ಟ್ರಗಳಿಗೆ ವಿಧಿಸಿರುವ ಶೇ.7ರ ಮಿತಿಯನ್ನು ರದ್ದುಪಡಿಸಿದೆ. 

ಮುಂದೇನು? 

ಈ ವಿಧೇಯಕಕ್ಕೆ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಸಹಿ ಹಾಕುವ ಮುನ್ನ ಸಂಸತ್ತಿನ ಸೆನೆಟ್‌ನಲ್ಲೂ (ಮೇಲ್ಮನೆ) ಅಂಗೀಕಾರವಾಗಬೇಕಿದೆ. ರಿಪಬ್ಲಿಕ್‌ ಮತ್ತು ಡೆಮಾಕ್ರಾಟ್ಸ್‌ ಪಕ್ಷಗಳ ಸದಸ್ಯರು ವಿಧೇಯಕವನ್ನು ಬೆಂಬಲಿಸಿದ್ದಾರೆ. ಸೆನೆಟ್‌ನಲ್ಲಿ ಆಡಳಿತಾರೂಢ ರಿಪಬ್ಲಿಕನ್‌ ಪಕ್ಷ ಬಹುಮತವನ್ನು ಹೊಂದಿದೆ. ಇದರಿಂದ ಭಾರತೀಯ ಮೂಲದ ಟೆಕ್ಕಿಗಳಿಗೆ, ತಂತ್ರಜ್ಞರಿಗೆ ಗ್ರೀನ್‌ ಕಾರ್ಡ್‌ ಪಡೆಯಲು ಹತ್ತಾರು ವರ್ಷ ಕಾಯುವುದು ತಪ್ಪಲಿದೆ ಎಂಬ ನಿರೀಕ್ಷೆ ಇದೆ.

ಅಮೆರಿಕದಲ್ಲಿ ಸೇವೆ ಸಲ್ಲಿಸುತ್ತಿರುವ ಭಾರತೀಯ ಮೂಲದ ಟೆಕ್ಕಿಗಳು ಮುಖ್ಯವಾಗಿ ಎಚ್‌-1ಬಿ ವೀಸಾ ಅಡಿಯಲ್ಲಿ ಬರುತ್ತಾರೆ. ಆದರೆ ಸದ್ಯಕ್ಕೆ ಅಮೆರಿಕದ ವಲಸೆ ವ್ಯವಸ್ಥೆಯಲ್ಲಿ ಗ್ರೀನ್‌ಕಾರ್ಡ್‌ ವಿತರಿಸಲು ಪ್ರತಿ ರಾಷ್ಟ್ರಕ್ಕೆ ಶೇ.7ರ ಮಿತಿ ಇರುವುದರಿಂದ ಎಚ್‌-1ಬಿ ವೀಸಾದಾರರು ಗ್ರೀನ್‌ ಕಾರ್ಡ್ ಅಥವಾ ಅಮೆರಿಕದ ಕಾಯಂ ನಿವಾಸಿಗಳ ಅರ್ಹತೆ ಹೊಂದಲು ಸುದೀರ್ಘ ಕಾಯಬೇಕಾಗುತ್ತದೆ. 435 ಸದಸ್ಯ ಬಲದ ಹೌಸ್‌ ಆಫ್‌ ರೆಪ್ರೆಸೆಂಟೇಟಿವ್ಸ್‌ ನಲ್ಲಿ ರಿಪಬ್ಲಿಕನ್‌ ಪಕ್ಷ ಮತ್ತು ಡೆಮಾಕ್ರಟಿಕ್‌ ಪಕ್ಷದ ಸಂಸದರು ಈ ವಿಧೇಯಕವನ್ನು ಬೆಂಬಲಿಸಿದ್ದಾರೆ. ವಿಧೇಯಕವನ್ನು ತಿದ್ದುಪಡಿ ಇಲ್ಲದೆ ಶೀಘ್ರ ಅಂಗೀಕರಿಸಲು 290 ಮತಗಳ ಅಗತ್ಯ ಇತ್ತು. 

ಶೇ.90ರಷ್ಟು ವೃತ್ತಿಪರ ಗ್ರೀನ್‌ಕಾರ್ಡ್‌ ಭಾರತೀಯರ ಪಾಲು? 

ಸದ್ಯದ ನಿಯಮಾವಳಿಗಳ ಪ್ರಕಾರ ಪ್ರತಿ ವರ್ಷ ವೃತ್ತಿಪರ ಉದ್ಯೋಗ ಸಂಬಂಧಿತ ಗ್ರೀನ್‌ ಕಾರ್ಡ್‌ ವಿತರಣೆಯ ಪೈಕಿ ಶೇ.25ರಷ್ಟು ಭಾರತೀಯ ನಾಗರಿಕರಿಗೆ ಸಲ್ಲುತ್ತದೆ. ಹೊಸ ವ್ಯವಸ್ಥೆಯಲ್ಲಿ ಮುಂದಿನ ಹತ್ತು ವರ್ಷಗಳ ಕಾಲ ಶೇ.90ರಷ್ಟು ಕಾರ್ಡ್‌ಗಳು ಭಾರತೀಯರ ಪಾಲಾಗಲಿವೆ ಎಂದು ಅಮೆರಿಕದ ವಲಸೆ ಇಲಾಖೆ (ಯುಎಸ್‌ಸಿಐಎಸ್‌) ಅಂದಾಜಿಸಿದೆ. ಇದು ಅಮೆರಿಕದಲ್ಲೇ ಉದ್ಯೋಗದಲ್ಲಿದ್ದು, ಅಲ್ಲಿನ ಕಾಯಂ ನಿವಾಸಿಗಳಾಗಲು ಬಯಸುವ ಭಾರತೀಯರಿಗೆ ಪ್ರಯೋಜನವಾಗಲಿದೆ. ಗ್ರೀನ್‌ ಕಾರ್ಡ್‌ ಸುಧಾರಣೆ ಕುರಿತ ವಿಧೇಯಕ ಜಾರಿಯಾದರೆ 3 ಲಕ್ಷಕ್ಕೂ ಹೆಚ್ಚು ಭಾರತೀಯ ಮೂಲದ ಉದ್ಯೋಗಿಗಳಿಗೆ ಅನುಕೂಲವಾಗಲಿದೆ ಎಂದು ಅಮೆರಿಕದ ಬ್ರೈಟ್‌ಬಾರ್ಟ್‌ ಸುದ್ದಿಸಂಸ್ಥೆ ಹೇಳಿತ್ತು. 

ಅಮೆರಿಕದ ಉದ್ದೇಶವೇನು? 

ಅಮೆರಿಕದ ಕಂಪನಿಗಳಿಗೆ ಹಾಗೂ ಹೂಡಿಕೆದಾರರಿಗೆ ವೃತ್ತಿಪರ ಉದ್ಯೋಗಿಗಳ ಅಗತ್ಯ ಇದೆ. ಇತರರಿಗೆ ಹೋಲಿಸಿದರೆ ಭಾರತೀಯ ಮೂಲದ ಟೆಕ್ಕಿಗಳು, ವೃತ್ತಿಪರರಿಗೆ ಕಡಿಮೆ ವೇತನ ಸಾಕು. 

ಭಾರತೀಯರಿಗೆ ಲಾಭ ಹೇಗೆ? 

ವಿಧೇಯಕವು ಕಾನೂನಾಗಿ ಜಾರಿಯಾದ ನಂತರ ಕುಟುಂಬ ಆಧಾರಿತ ವಲಸೆ ವೀಸಾದ ಮಿತಿಯು ಪ್ರತಿ ರಾಷ್ಟ್ರಕ್ಕೆ ಶೇ.7ರಿಂದ 15ಕ್ಕೆ ವಿಸ್ತರಣೆಯಾಗಲಿದೆ. ಉದ್ಯೋಗ ಆಧಾರಿತ ವಲಸೆ ವೀಸಾದ ಮಿತಿ ರದ್ದಾಗಲಿದೆ. 

ಗ್ರೀನ್‌ ಕಾರ್ಡ್‌ನಿಂದ ವಿದೇಶಿಯರಿಗೆ ಅಮೆರಿಕದಲ್ಲಿ ಕಾಯಂ ಆಗಿ ನೆಲಸಲು ಹಾಗೂ ಉದ್ಯೋಗ ಕಂಡುಕೊಳ್ಳಲು ಸಾಧ್ಯ. ಶೇ.7ರ ಮಿತಿಯ ಪರಿಣಾಮ ಎಚ್‌-1ಬಿ ವೀಸಾ ಅಡಿಯಲ್ಲಿ ಅಮೆರಿಕದಲ್ಲಿ ಉದ್ಯೋಗದಲ್ಲಿರುವ ಭಾರತೀಯ ಟೆಕ್ಕಿಗಳಿಗೆ, ಇತರ ವೃತ್ತಿಪರರಿಗೆ ಗ್ರೀನ್‌ ಕಾರ್ಡ್‌ ಪಡೆಯಲು ಸುದೀರ್ಘ ಕಾಯುವಿಕೆಯ ಅನಿವಾರ್ಯತೆ ಇರುತ್ತಿತ್ತು.