ಕ್ರಿಮಿನಲ್‌ ಕೇಸ್‌ ಸಂತ್ರಸ್ತರಿಗೂ ಮೇಲ್ಮನವಿ ಅವಕಾಶ :ಸುಪ್ರೀಂ ಕೋರ್ಟ್‌ ಮಹತ್ವದ ತೀರ್ಪು

0
360

ಕ್ರಿಮಿನಲ್‌ ಅಪರಾಧ ಪ್ರಕರಣಗಳಲ್ಲಿ ಸರಕಾರದ ಜತೆಗೆ, ಸಂತ್ರಸ್ತರೂ ಆರೋಪಿಗಳ ಖುಲಾಸೆಯನ್ನು ಪ್ರಶ್ನಿಸಿ ಯಾವುದೇ ಪ್ರಾಧಿಕಾರದ ಅನುಮತಿ ಇಲ್ಲದೆಯೇ ಮೇಲ್ಮನವಿ ಸಲ್ಲಿಸಬಹುದೆಂದು ಸುಪ್ರೀಂ ಕೋರ್ಟ್‌ ಮಹತ್ವದ ತೀರ್ಪು ನೀಡಿದೆ.

ಹೊಸದಿಲ್ಲಿ: ಕ್ರಿಮಿನಲ್‌ ಅಪರಾಧ ಪ್ರಕರಣಗಳಲ್ಲಿ ಸರಕಾರದ ಜತೆಗೆ, ಸಂತ್ರಸ್ತರೂ ಆರೋಪಿಗಳ ಖುಲಾಸೆಯನ್ನು ಪ್ರಶ್ನಿಸಿ ಯಾವುದೇ ಪ್ರಾಧಿಕಾರದ ಅನುಮತಿ ಇಲ್ಲದೆಯೇ ಮೇಲ್ಮನವಿ ಸಲ್ಲಿಸಬಹುದೆಂದು ಸುಪ್ರೀಂ ಕೋರ್ಟ್‌ ಮಹತ್ವದ ತೀರ್ಪು ನೀಡಿದೆ. 
ಕ್ರಿಮಿನಲ್‌ ದಂಡ ಸಂಹಿತೆ (ಸಿಆರ್‌ಪಿಸಿ) ಅಡಿಯಲ್ಲಿ ಇದಕ್ಕೆ ಅವಕಾಶವಿದೆ ಎಂದು ನ್ಯಾಯಮೂರ್ತಿ ಎಂ.ಬಿ. ಲೋಕುರ್‌ ನೇತೃತ್ವದ ತ್ರಿಸದಸ್ಯ ಪೀಠವು 2:1 ಬಹುಮತದ ತೀರ್ಪು ನೀಡಿದೆ. 

ನ್ಯಾಯಮೂರ್ತಿ ಲೋಕುರ್‌ ಮತ್ತು ನ್ಯಾ. ಅಬ್ದುಲ್‌ ನಜೀರ್‌ ಅವರು ಸಂತ್ರಸ್ತರಿಗೆ ಇಂತಹ ಅವಕಾಶ ಕಲ್ಪಿಸುವುದಕ್ಕೆ ಬೆಂಬಲಿಸಿ ತೀರ್ಪು ನೀಡಿದರು. ”ಸಿಆರ್‌ಪಿಸಿ’ಯ 372ನೇ ನಿಯಮದ ಅಡಿ ಅಪರಾಧ ಪ್ರಕರಣದ ಸಂತ್ರಸ್ತರಿಗೆ ಅನುಕೂಲ ಒದಗಿಸುಬೇಕೆಂಬುದರಲ್ಲಿ ಯಾವುದೇ ಅನುಮಾನವಿಲ್ಲ,” ಎಂದರು. 

”ಶಾಸಕಾಂಗ, ನ್ಯಾಯಾಂಗ ಮತ್ತು ನಾಗರಿಕ ಸಮಾಜವು ಅಪರಾಧ ಪ್ರಕರಣವೊಂದರ ಸಂತ್ರಸ್ತರತ್ತ ಅತಿ ಕಡಿಮೆ ಗಮನ ಹರಿಸಿವೆ. ಈ ನಿಟ್ಟಿನಲ್ಲಿ ಇನ್ನೂ ಮಾಡಬೇಕಾದ್ದು ಬಹಳವಿದೆ,” ಎಂದು ನ್ಯಾಯಪೀಠದ ದ್ವಿಸದಸ್ಯರು ಅಭಿಪ್ರಾಯಪಟ್ಟರು. 

ಇದೇ ವೇಳೆ, ಅಪರಾಧಿಗಳ ಖುಲಾಸೆ ವಿರುದ್ಧ ಮೇಲ್ಮನವಿ ಸಲ್ಲಿಸಲು ಸರಕಾರ ಮಾತ್ರವಲ್ಲದೆ, ಪ್ರಕರಣದ ಸಂತ್ರಸ್ತರಿಗೂ ಅವಕಾಶ ನೀಡಬೇಕು ಎಂಬ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ನಿರ್ಣಯವನ್ನು ನ್ಯಾಯಮೂರ್ತಿಗಳು ಉಲ್ಲೇಖಿಸಿದರು. 

ಈ ಮಧ್ಯೆ, ನ್ಯಾಯಪೀಠದ ಮತ್ತೊಬ್ಬ ಸದಸ್ಯರಾದ ನ್ಯಾ.ದೀಪಕ್‌ ಗುಪ್ತಾ ಅವರು ಕೇವಲ ಒಂದು ವಿಚಾರದಲ್ಲಿ ಭಿನ್ನ ನಿಲುವು ವ್ಯಕ್ತಪಡಿಸಿದರು. ಸಂತ್ರಸ್ತರಿಗೂ ವೈಯಕ್ತಿಕ ಮೇಲ್ಮನವಿ ಅವಕಾಶ ಕಲ್ಪಿಸುವುದು ಸರಿಯಾದರೂ, ಅದಕ್ಕೆ ಪೂರ್ವಭಾವಿಯಾಗಿ ಸಮಕ್ಷಮ ಪ್ರಾಧಿಕಾರದ ಅನುಮತಿ ಪಡೆಯುವುದು ಅಗತ್ಯ,” ಎಂದು ಗುಪ್ತಾ ಹೇಳಿದರು. 

ಈವರೆಗೆ ಕ್ರಿಮಿನಲ್‌ ಅಪರಾಧ ಪ್ರಕರಣಗಳಲ್ಲಿ ಅಪರಾಧಿಗಳು ಖುಲಾಸೆಗೊಂಡರೆ ಇದನ್ನು ಪ್ರಶ್ನಿಸಿ ನೇರವಾಗಿ ಮೇಲ್ಮನವಿ ಸಲ್ಲಿಸಲು ಸಂತ್ರಸ್ತರಿಗೆ ಅವಕಾಶವಿರಲಿಲ್ಲ. ಸರಕಾರ ಅಥವಾ ಕಾನೂನು ಇಲಾಖೆ ಮುಖಾಂತರವೇ ಮೇಲ್ಮನವಿ ಸಲ್ಲಿಸಬೇಕಾಗಿತ್ತು.