ಕೊನೆಗೂ ಪತ್ತೆಯಾಗಲಿಲ್ಲ “ಮಲೇಷ್ಯಾ” ವಿಮಾನ: ಪ್ರಕರಣದ ತನಿಖೆ ಅಂತ್ಯ

0
18

ನಾಲ್ಕು ವರ್ಷಗಳ ಹಿಂದೆ ನಿಗೂಢವಾಗಿ ನಾಪತ್ತೆಯಾಗಿದ್ದ ಮಲೇಷ್ಯಾದ ಎಂಎಚ್‌ 370 ವಿಮಾನದ ಕುರಿತು ತನಿಖೆ ನಡೆಸಿದ ತನಿಖಾ ತಂಡ ತನ್ನ 1500 ಪುಟಗಳ ವರದಿ ಸಲ್ಲಿಸಿದ್ದು, ವಿಮಾನ ನಾಪತ್ತೆಗೆ ನಿಖರವಾದ ಕಾರಣ ತಿಳಿಸಿಲ್ಲ.

ಪುತ್ರಜಯ: ನಾಲ್ಕು ವರ್ಷಗಳ ಹಿಂದೆ ನಿಗೂಢವಾಗಿ ನಾಪತ್ತೆಯಾಗಿದ್ದ ಮಲೇಷ್ಯಾದ ಎಂಎಚ್‌ 370 ವಿಮಾನದ ಕುರಿತು ತನಿಖೆ ನಡೆಸಿದ ತನಿಖಾ ತಂಡ ತನ್ನ 1500 ಪುಟಗಳ ವರದಿ ಸಲ್ಲಿಸಿದ್ದು, ವಿಮಾನ ನಾಪತ್ತೆಗೆ ನಿಖರವಾದ ಕಾರಣ ತಿಳಿಸಿಲ್ಲ. 

239 ಪ್ರಯಾಣಿಕರನ್ನು ಹೊತ್ತು ಬೀಜಿಂಗ್‌ನಿಂದ ಕೌಲಾಲಂಪುರಕ್ಕೆ ಹೊರಟಿದ್ದ ಮಲೇಷ್ಯಾ ಏರ್‌ಲೈನ್ಸ್‌ನ ಬೋಯಿಂಗ್‌ 777 ವಿಮಾನ 2014ರ ಮಾರ್ಚ್‌ 8ರಂದು ನಾಪತ್ತೆಯಾಗಿತ್ತು. ತನಿಖಾ ತಂಡ ತನ್ನ ವರದಿಯಲ್ಲಿ ವಾಯು ಸಂಚಾರ ನಿಯಂತ್ರಕರ ತಪ್ಪುಗಳನ್ನು ಎತ್ತಿ ತೋರಿದೆ. ತಾಂತ್ರಿಕ ಸಮಸ್ಯೆ ಕಾರಣವಲ್ಲದೇ ವಿಮಾನದ ಹಾದಿಯನ್ನು ಹಸ್ತಚಾಲಿತವಾಗಿ ಬೇರೆಡೆಗೆ ವರ್ಗಾಯಿಸಲಾಗಿತ್ತು. ವಿಮಾನದ ಅವಶೇಷಗಳು ಪತ್ತೆಯಾದಲ್ಲಿ ಮಾತ್ರ ಘಟನೆಗೆ ನಿಖರ ಕಾರಣ ತಿಳಿಸಬಹುದು ಎಂದು ವರದಿಯಲ್ಲಿ ಹೇಳಲಾಗಿದೆ. 

ಮೇ 29ರಂದು ಈ ವಿಮಾನದ ಅವಶೇಷಗಳನ್ನು ಪತ್ತೆ ಹಚ್ಚಲು ನಡೆಸಲಾಗುತ್ತಿದ್ದ ಕಾರ್ಯಾಚರಣೆಯನ್ನು ನಿಲ್ಲಿಸಲಾಗಿತ್ತು. ಅಮೆರಿಕದ ಓಶಿಯನ್‌ ಇನ್ಫಿನಿಟಿ ಸಂಸ್ಥೆ 1,12,000 ಚದರ ಕಿ.ಮೀ. ವಿಸ್ತೀರ್ಣದಲ್ಲಿ ವ್ಯಾಪಿಸಿರುವ ಹಿಂದೂ ಮಹಾಸಾಗರದ ದಕ್ಷಿಣ ಭಾಗದಲ್ಲಿ ಮೂರು ತಿಂಗಳ ಶೋಧ ನಡೆಸಿದರೂ ವಿಮಾನ ಪತ್ತೆಹಚ್ಚಲು ಸಾಧ್ಯವಾಗಲಿಲ್ಲ. ಇದಕ್ಕೂ ಮುನ್ನ ಆಸ್ಪ್ರೇಲಿಯಾ, ಚೀನಾ ಮತ್ತು ಮಲೇಷ್ಯಾ ಸರಕಾರಗಳು 200 ದಶಲಕ್ಷ ಡಾಲರ್‌ ವೆಚ್ಚದಲ್ಲಿ ಶೋಧ ಕಾರ್ಯಾಚರಣೆ ನಡೆಸಿದ್ದವು. 

ಸಂಬಂಧಿಗಳಿಗೆ ಮಾಹಿತಿ

ಈ ಪ್ರಕರಣದ ಅಂತಿಮ ವರದಿಯ ಕುರಿತು ವಿಮಾನದಲ್ಲಿದ್ದ ಪ್ರಯಾಣಿಕರ ಸಂಬಂಧಿಕರಿಗೆ ಮಲೇಷ್ಯಾದ ಸಾರಿಗೆ ಸಚಿವರು ಸೋಮವಾರ ಮಾಹಿತಿ ನೀಡಿದರು. ಆದರೆ ವಿಮಾನ ನಾಪತ್ತೆಗೆ ನಿಖರ ಕಾರಣ ತಿಳಿಯದ ಸಂಬಂಧಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸಂಬಂಧಿಕರು ಕೇಳಿದ ಪ್ರಶ್ನೆಗಳಿಗೆ ಉತ್ತರಿಸಲಾಗದೇ ಸಾರಿಗೆ ಸಚಿವರು ಮತ್ತು ಅಧಿಕಾರಿಗಳು ತಮ್ಮ ಅಸಹಾಯಕತೆ ವ್ಯಕ್ತಪಡಿಸಿದರು. ”ಇದು ತುಂಬ ನಿರಾಶಾದಾಯಕ. ವರದಿಯಲ್ಲಿ ಹೊಸ ವಿಷಯ ಏನೂ ಇಲ್ಲ,” ಎಂದು ಅವಘಡದಲ್ಲಿ ಮೃತಪಟ್ಟವರ ಸಂಬಂಧಿಕರೊಬ್ಬರು ಬೇಸರ ವ್ಯಕ್ತಪಡಿಸಿದ್ದಾರೆ.