ಕಾಳಧನ ನಿಗ್ರಹಕ್ಕೆ ಕೇಂದ್ರದ ಬಿಗಿ ಕ್ರಮ: ವಿದೇಶಿ ಬ್ಯಾಂಕ್‌ಗಳಲ್ಲಿನ ಭಾರತೀಯರ ಠೇವಣಿ ಇಳಿಕೆ

0
302

ತೆರಿಗೆ ತಪ್ಪಿಸಲು ಸಹಕರಿಸುವ ಸಾಗರೋತ್ತರ ರಾಷ್ಟ್ರಗಳಲ್ಲಿ ಕಳೆದ 4 ವರ್ಷಗಳಿಂದೀಚೆಗೆ ಭಾರತೀಯರು ಇಟ್ಟಿರುವ ಠೇವಣಿ ಗಣನೀಯವಾಗಿ ಇಳಿಕೆಯಾಗಿದೆ ಎಂದು ಸರಕಾರದ ಆಂತರಿಕ ವರದಿಯೊಂದರಲ್ಲಿ ಹೇಳಲಾಗಿದೆ.

ಹೊಸದಿಲ್ಲಿ: ತೆರಿಗೆ ತಪ್ಪಿಸಲು ಸಹಕರಿಸುವ ಸಾಗರೋತ್ತರ ರಾಷ್ಟ್ರಗಳಲ್ಲಿ ಕಳೆದ 4 ವರ್ಷಗಳಿಂದೀಚೆಗೆ ಭಾರತೀಯರು ಇಟ್ಟಿರುವ ಠೇವಣಿ ಗಣನೀಯವಾಗಿ ಇಳಿಕೆಯಾಗಿದೆ ಎಂದು ಸರಕಾರದ ಆಂತರಿಕ ವರದಿಯೊಂದರಲ್ಲಿ ಹೇಳಲಾಗಿದೆ. 

ವಿದೇಶಗಳಲ್ಲಿ ಹೊಸತಾಗಿ ಕಪ್ಪುಹಣ ಸಂಗ್ರಹವಾಗುವುದನ್ನು ತಡೆಯಲು ಕೇಂದ್ರ ಸರಕಾರ ಕ್ರಮ ತೆಗೆದುಕೊಂಡಿದೆ. ನೋಟು ಅಮಾನ್ಯತೆ ಸೇರಿದಂತೆ ಕಾಳಧನ ತಡೆಗೆ ಸರಕಾರ ನಾನಾ ಪ್ರಯತ್ನಗಳನ್ನು ನಡೆಸಿದೆ. ಇದರಿಂದ ಸಕಾರಾತ್ಮಕ ಬೆಳವಣಿಗೆ ಕಂಡು ಬಂದಿದೆ ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ. 

ಕೇಂದ್ರೀಯ ಬ್ಯಾಂಕ್‌ಗಳ ಜಾಗತಿಕ ಸಂಸ್ಥೆಯಾದ ಬ್ಯಾಂಕ್‌ ಆಫ್‌ ಇಂಟರ್‌ನ್ಯಾಷನಲ್‌ ಸೆಟ್ಲ್‌ಮೆಂಟ್ಸ್‌ನ ಅಂಕಿಅಂಶಗಳ ಆಧಾರದಲ್ಲಿ ನೋಡುವುದಾದರೆ, ಭಾರತೀಯರ ಠೇವಣಿ ಇಳಿಕೆಯಾಗಿರುವುದು ಸ್ಪಷ್ಟವಾಗಿದೆ. ‘ತೆರಿಗೆ ಸ್ವರ್ಗ’ಗಳು ಎನ್ನಲಾದ ಸಾಗರೋತ್ತರ ರಾಷ್ಟ್ರಗಳ ಬ್ಯಾಂಕ್‌ಗಳಲ್ಲಿ ಭಾರತೀಯರ ಠೇವಣಿಗಳು ಮತ್ತು ಬ್ಯಾಂಕೇತರ ಸಾಲಗಳೂ 2013ರಿಂದ 2017ರ ಅವಧಿಯಲ್ಲಿ ಕಡಿಮೆಯಾಗಿವೆ ಎಂದು ಸರಕಾರದ ವರದಿಯಲ್ಲಿ ಹೇಳಲಾಗಿದೆ. 

ವರದಿ ಪ್ರಕಾರ, ಐರೋಪ್ಯ ದೇಶವಾದ ಲಕ್ಸೆಂಬರ್ಗ್‌ನಲ್ಲಿನ ಬ್ಯಾಂಕ್‌ಗಳಲ್ಲಿನ ಭಾರತೀಯರ ಠೇವಣಿ ಮತ್ತು ಬ್ಯಾಂಕೇತರ ಸಾಲಗಳ ಪ್ರಮಾಣವು ಶೇ.62ರಷ್ಟು ಕಡಿಮೆಯಾಗಿದೆ. 2013ರಲ್ಲಿ 2.9 ಕೋಟಿ ಡಾಲರ್‌(ಸುಮಾರು 200 ಕೋಟಿ ರೂ.) ಹಣವನ್ನು ಇಲ್ಲಿ ಭಾರತೀಯರು ಇಟ್ಟಿಟ್ಟರು. ಅದು 2017ಕ್ಕೆ 1.1 ಕೋಟಿ ಡಾಲರ್‌ಗೆ(ಸುಮಾರು 76 ಕೋಟಿ ರೂ.) ಇಳಿದಿದೆ. ”ಇಂಥದ್ದೇ ಟ್ರೆಂಡ್‌ ಇತರೆ ಸಾಗರೋತ್ತರ ದೇಶಗಳಲ್ಲೂ ಕಂಡು ಬಂದಿದೆ,” ಎಂದು ಅಧಿಕಾರಿಗಳು ಹೇಳಿದ್ದಾರೆ. 

ಜೆರ್ಸಿಯಲ್ಲಿ 2017ರಲ್ಲಿ ಭಾರತೀಯರ ಠೇವಣಿಗಳು ಶೇ.17.6ರಷ್ಟು ಕಡಿಮೆಯಾಗಿವೆ. ಅಂದರೆ, 2017ರಲ್ಲಿ ಅದು 21.5 ಕೋಟಿ ಡಾಲರ್‌ಗೆ ಇಳಿಕೆಯಾಗಿದೆ. 2013ರಲ್ಲಿ ಅದು 26.1 ಕೋಟಿ ಡಾಲರ್‌ನಷ್ಟಿತ್ತು. ಇದೇ ರೀತಿ ಐಸ್ಲೆ ಆಫ್‌ ಮ್ಯಾನ್‌ನಲ್ಲೂ ಭಾರತೀಯರ ಹಣ ಶೇ.39.4ರಷ್ಟು ಇಳಿಕೆಯಾಗಿದೆ. 

ಕಳೆದ ತಿಂಗಳಷ್ಟೇ ಹಣಕಾಸು ಸಚಿವ ಪಿಯೂಶ್‌ ಗೋಯಲ್‌ ಅವರು, ಸ್ವಿಸ್‌ ಬ್ಯಾಂಕ್‌ನಲ್ಲಿ ಭಾರತೀಯ ಠೇವಣಿಗಳು ಇಳಿಕೆಯಾಗುತ್ತಿರುವ ಬಗ್ಗೆ ಲೋಕಸಭೆಗೆ ಮಾಹಿತಿ ನೀಡಿದ್ದರು. 2017ರಲ್ಲಿ ಭಾರತೀಯರ ಠೇವಣಿ ಶೇ.34.5ರಷ್ಟು ಇಳಿಕೆಯಾಗಿದೆ. ಮೋದಿ ಸರಕಾರದ ಕಳೆದ ನಾಲ್ಕು ವರ್ಷಗಳ ಅವಧಿಯಲ್ಲಿ ಶೇ.80ರಷ್ಟು ಇಳಿಕೆಯಾಗಿದೆ ಎಂದು ಪಿಯೂಶ್‌ ಹೇಳಿದ್ದರು.