ಐಐಟಿ-ಹೈದರಾಬಾದ್ ವಿದ್ಯಾರ್ಥಿನಿಗೆ 1.2 ಕೋಟಿ ರೂ. ವೇತನ ನೀಡಿದ ಗೂಗಲ್‌

0
22

ದೇಶದಾದ್ಯಂತ ಗೂಗಲ್ ನಡೆಸಿದ ಕ್ಯಾಂಪಸ್ ಸೆಲೆಕ್ಷನ್‌ನಲ್ಲಿ ಐದು ಮಂದಿ ಪ್ರತಿಭಾವಂತರು ಆಯ್ಕೆಯಾಗಿದ್ದಾರೆ. ಇವರಲ್ಲಿ ಒಬ್ಬೊಬ್ಬರಿಗೆ 1.2 ಕೋಟಿ ರೂ. ವಾರ್ಷಿಕ ಪ್ಯಾಕೇಜ್‌‌ನಿಂದ ಕೂಡಿರುವ ಉದ್ಯೋಗವನ್ನು ಗೂಗಲ್ ನೀಡಿದೆ.

ಹೈದರಾಬಾದ್: ದೇಶದಾದ್ಯಂತ ಗೂಗಲ್ ನಡೆಸಿದ ಕ್ಯಾಂಪಸ್ ಸೆಲೆಕ್ಷನ್‌ನಲ್ಲಿ ಐದು ಮಂದಿ ಪ್ರತಿಭಾವಂತರು ಆಯ್ಕೆಯಾಗಿದ್ದಾರೆ. ಇವರಲ್ಲಿ ಒಬ್ಬೊಬ್ಬರಿಗೆ 1.2 ಕೋಟಿ ರೂ. ವಾರ್ಷಿಕ ಪ್ಯಾಕೇಜ್‌‌ನಿಂದ ಕೂಡಿರುವ ಉದ್ಯೋಗವನ್ನು ಗೂಗಲ್ ನೀಡಿದೆ. 

ಕೆಲಸ ಗಿಟ್ಟಿಸಿರುವ ಐದು ಮಂದಿಯಲ್ಲಿ ಆಂಧ್ರದ ಯುವತಿಯೂ ಇದ್ದಾರೆ. ಐಐಟಿ ಹೈದರಾಬಾದ್‌ನಲ್ಲಿ ಶಿಕ್ಷಣ ಪಡೆದಿರುವ ಕುಡುಗುಂಟ ಸ್ನೇಹಾ ರೆಡ್ಡಿಯನ್ನು ಕೃತಿಕ ಬುದ್ಧಿಮತ್ತೆಗೆ (AI) ಸಂಬಂಧಿಸಿದ ಪ್ರತಿಷ್ಠಿತ ಪ್ರಾಜೆಕ್ಟ್‌ಗೆ ಆಯ್ಕೆ ಮಾಡಲಾಗಿದೆ. 

ವಿಕಾರಾಬಾದ್ ಮೂಲದ ಸ್ನೇಹಾ ರೆಡ್ಡಿ ಐಐಟಿ ಹೈದರಾಬಾದ್‌ನಿಂದ ಇತ್ತೀಚೆಗಷ್ಟೇ ಕಂಪ್ಯೂಟರ್ ಸೈನ್ಸ್‌ನಲ್ಲಿ ಬಿ.ಟೆಕ್ ಪದವಿ ಪಡೆದಿದ್ದರು. ಶೈಕ್ಷಣಿಕ ಮತ್ತು ಪಠ್ಯೇತರ ಚಟುವಟಿಕೆಗಳಲ್ಲಿ ಅತ್ಯುತ್ತಮ ಪ್ರತಿಭೆ ತೋರಿದ್ದಕ್ಕೆ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಅವರಿಂದ ಪ್ರಶಸ್ತಿ ಸ್ವೀಕರಿಸಿದ್ದಾರೆ. ಇದರ ಜತೆಗೆ ನಾಲ್ಕು ಚಿನ್ನದ ಪದಕಗಳನ್ನೂ ಗಳಿಸಿದ್ದಾರೆ. 

ಓದಿನ ಜತೆಗೆ ಪಠ್ಯೇತರ ಚಟುವಟಿಕೆಗಳಲ್ಲೂ ಕ್ರಿಯಾಶೀಲವಾಗಿರುವ ಸ್ನೇಹಾ ರೆಡ್ಡಿ ಪಿಯುಸಿಯಲ್ಲಿ ಶೇ.98.4ರಷ್ಟು ಅಂಕಗಳನ್ನು ಪಡೆದಿದ್ದಾರೆ. ಐಐಟಿ ಪ್ರವೇಶಕ್ಕಾಗಿ ನಡೆಸುವ ಜಾಯಿಂಟ್ ಎಂಟ್ರಸ್ ಎಕ್ಸಾಮ್ (ಜೆಇಇ) 2014ರಲ್ಲಿ (ಮೇಯಿನ್ಸ್) ಆಲ್‍ ಇಂಡಿಯಾ 15ನೇ ರ‍್ಯಾಂಕ್, ಜೆಇಇ (ಅಡ್ವಾನ್ಸ್‌ಡ್)ನಲ್ಲಿ 677 ರ‍್ಯಾಂಕ್ ಪಡೆದಿದ್ದಾರೆ. 

ಕೃತಕ ಬುದ್ಧಿಮತ್ತೆಯ ಭಾಗವಾಗಿರುವ ‘ನ್ಯಾಚುರಲ್ ಲಾಂಗ್ವೇಜ್ ಅಂಡರ್‌ಸ್ಟ್ಯಾಂಡಿಂಗ್’ ಪ್ರಾಜೆಕ್ಟ್‌ಗಾಗಿ ಗೂಗಲ್ ಕಂಪೆನಿ ಪ್ರತಿಭಾವಂತರನ್ನು ಆಯ್ಕೆ ಮಾಡಲು ಹುಡುಕಾಟ ಆರಂಭಿಸಿತ್ತು. ಇದಕ್ಕಾಗಿ ಆನ್‌ಲೈನ್ ಮೂಲಕ ಆಯ್ಕೆ ಮಾಡಲಾಯಿತು. ಇದರಲ್ಲಿ ಸ್ನೇಹಾ ರೆಡ್ಡಿ ಸಹ ಪಾಲ್ಗೊಂಡು ಮೊದಲ ನಾಲ್ಕು ಸುತ್ತುಗಳನ್ನು ಯಶಸ್ವಿಯಾಗಿ ಪೂರೈಸಿದರು. ಅಂತಿಮ ಆಯ್ಕೆಯಾಗಿ ಅಮೆರಿಕಾಗೆ ಹೋಗಬೇಕಾಗಿದ್ದ ಕಾರಣ ಮತ್ತೊಂದು ಮುಖ್ಯವಾದ ಪರೀಕ್ಷೆ ಇದ್ದ ಕಾರಣ ಹೋಗಲು ಸಾಧ್ಯವಾಗಿರಲಿಲ್ಲ. 

ಆದರೆ ಆಕೆಯ ಪ್ರತಿಭೆಯನ್ನು ಗುರುತಿಸಿದ ಗೂಗಲ್ ಅಂತಿಮ ಪರೀಕ್ಷೆಯನ್ನು ಆನ್‌ಲೈನ್‌ನಲ್ಲಿ ನಿರ್ವಹಿಸಿ ಆಯ್ಕೆ ಮಾಡಿದೆ. ಐಐಟಿ ಹೈದರಾಬಾದ್‌ ಇತಿಹಾಸದಲ್ಲಿ ಅತ್ಯಧಿಕ ವೇತನದಿಂದ ಕೂಡಿದ ಉದ್ಯೋಗ ಪಡೆದ ವಿದ್ಯಾರ್ಥಿನಿಯಾಗಿ ಸ್ನೇಹಾ ರೆಡ್ಡಿ ದಾಖಲಾಗಿದ್ದಾರೆ. 

ವಿದ್ಯಾರ್ಥಿಗಳನ್ನು ಪ್ರಯೋಗಗಳಲ್ಲಿ ತೊಡಗಿಕೊಳ್ಳುವಂತೆ ಅಧ್ಯಾಪಕರು ಪ್ರೋತ್ಸಾಹಿಸುತ್ತಿದ್ದ ಕಾರಣಕ್ಕೇ ತನಗೆ ಈ ಉದ್ಯೋಗ ಸಿಗುವಂತಾಯಿತು. ಬಿ.ಟೆಕ್ ಶಿಕ್ಷಣ ಪಡೆಯುತ್ತಿರುವಾಗಲೇ ಅಮೆರಿಕ ಮೂಲದ ಖ್ಯಾತ ಸಂಶೋಧನಾ ಸಂಸ್ಥೆಗಳಲ್ಲಿ ಕೆಲಸ ಮಾಡುವ ಅವಕಾಶ ಸಹ ಸಿಕ್ಕಿದ್ದು ನನ್ನ ಅದೃಷ್ಟ ಎಂದಿದ್ದಾರೆ ಸ್ನೇಹಾ. 

ಸ್ನೇಹಾ ಬ್ಯಾಚ್‌ನಲ್ಲಿ ಟಾಪರ್ ಆಗಿರುವ ಇಬ್ರಾಹಿಂ ದಲಾಲ್ ಎಂಬ ವಿದ್ಯಾರ್ಥಿಗೆ 35 ಲಕ್ಷ ರೂ. ವಾರ್ಷಿಕ ವೇತನ ನೀಡಲಾಗಿದೆ. ಸ್ನೇಹ ರೆಡ್ಡಿ ಜತೆಗೆ ಗೂಗಲ್‌ಗೆ ಆಯ್ಕೆಯಾಗಿರುವವರಲ್ಲಿ ಐಐಐಟಿ ಬೆಂಗಳೂರು ವಿದ್ಯಾರ್ಥಿನಿ ಸಹ ಇರುವುದು ಗಮನಾರ್ಹ.