ಎಸ್‌ಬಿಐಗೆ 4,876 ಕೋಟಿ ರೂ. ನಷ್ಟ

0
23

ದೇಶದ ಬೃಹತ್‌ ಬ್ಯಾಂಕ್‌ ಆದ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ), ಜೂನ್‌ ತ್ರೈಮಾಸಿಕದಲ್ಲಿ 4,876 ಕೋಟಿ ರೂ. ನಿವ್ವಳ ನಷ್ಟ ದಾಖಲಿಸಿದೆ. ನಷ್ಟದ ಹಾದಿ ಬದಲಿಸಿ, ಈ ತ್ರೈಮಾಸಿಕದಲ್ಲಿ ಕನಿಷ್ಠ 237 ಕೋಟಿ ರೂ. ಲಾಭ ಗಳಿಸಬಹುದು ಎನ್ನುವ ನಿರೀಕ್ಷೆಗಳು ಹುಸಿಯಾಗಿವೆ.

ಮುಂಬಯಿ: ದೇಶದ ಬೃಹತ್‌ ಬ್ಯಾಂಕ್‌ ಆದ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ), ಜೂನ್‌ ತ್ರೈಮಾಸಿಕದಲ್ಲಿ 4,876 ಕೋಟಿ ರೂ. ನಿವ್ವಳ  ನಷ್ಟ  ದಾಖಲಿಸಿದೆ. ನಷ್ಟದ ಹಾದಿ ಬದಲಿಸಿ, ಈ ತ್ರೈಮಾಸಿಕದಲ್ಲಿ ಕನಿಷ್ಠ 237 ಕೋಟಿ ರೂ. ಲಾಭ ಗಳಿಸಬಹುದು ಎನ್ನುವ ನಿರೀಕ್ಷೆಗಳು ಹುಸಿಯಾಗಿವೆ. 

ವಸೂಲಾಗದ ಸಾಲಗಳನ್ನು(ಎನ್‌ಪಿಎ) ನಿಭಾಯಿಸಲು ಹೆಚ್ಚಿನ ಹಣವನ್ನು ತೆಗೆದಿರಿಸಲಾಗಿದ್ದು, ಇದೇ ಬ್ಯಾಂಕ್‌ ನಷ್ಟಕ್ಕೆ ಕಾರಣವಾಗಿದೆ. ಶುಕ್ರವಾರ ತನ್ನ ಮೊದಲ ತ್ರೈಮಾಸಿಕ ವರದಿಯನ್ನು(ಏಪ್ರಿಲ್‌-ಜೂನ್‌) ಬ್ಯಾಂಕ್‌ ಬಿಡುಗಡೆ ಮಾಡಿದೆ. ಕಳೆದ ಆರ್ಥಿಕ ವರ್ಷದ ಇದೇ ವೇಳೆಯಲ್ಲಿ 2,006 ಕೋಟಿ ರೂ. ನಿವ್ವಳ ಲಾಭ ಹೊಂದಿತ್ತು. ಕಳೆದ ವಿತ್ತ ವರ್ಷದ ಕಡೆಯ ತ್ರೈಮಾಸಿಕದಲ್ಲಿ ಬ್ಯಾಂಕ್‌ 7,718 ಕೋಟಿ ರೂ. ನಷ್ಟ ದಾಖಲಿಸಿತ್ತು. 

ಆದಾಗ್ಯೂ, ಬ್ಯಾಂಕ್‌ನ ಒಟ್ಟು ಆದಾಯ ಮೊದಲ ತ್ರೈಮಾಸಿಕದಲ್ಲಿ 65,492 ಕೋಟಿ ರೂ.ಗೆ ಏರಿಕೆಯಾಗಿದೆ. ಕಳೆದ ವರ್ಷದ ಜೂನ್‌ ತ್ರೈಮಾಸಿಕದಲ್ಲಿ ಅದು 62,911 ಕೋಟಿ ರೂ. ಇತ್ತು. 

ನಿವ್ವಳ ಬಡ್ಡಿದರ ಆದಾಯ(ಎನ್‌ಐಐ) ಈ ತ್ರೈಮಾಸಿಕದಲ್ಲಿ 21,798 ಕೋಟಿ ರೂ. ಮುಟ್ಟಿದೆ. ಕಳೆದ ವರ್ಷ 17,606 ಕೋಟಿ ರೂ. ಇತ್ತು. 

ಎಸ್‌ಬಿಐ ನಷ್ಟದ ಫಲಿತಾಂಶ ಬಿಡುಗಡೆ ಹಿನ್ನೆಲೆಯಲ್ಲಿ ಬ್ಯಾಂಕ್‌ನ ಷೇರುಗಳು ಶೇ.3.79ರಷ್ಟು ಕುಸಿದಿದ್ದು ರೂ.304.45 ಗೆ ಇಳಿದಿದೆ. 

ನಷ್ಟಕ್ಕೆ ಏನು ಕಾರಣ? 

ಬ್ಯಾಂಕ್‌ನ ಎನ್‌ಪಿಎ 2018ರ ಜೂನ್‌ ತ್ರೈಮಾಸಿಕದಲ್ಲಿ 2.12 ಲಕ್ಷ ಕೋಟಿ ರೂ. ಮುಟ್ಟಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಅದು 1.88 ಲಕ್ಷ ಕೋಟಿ ರೂ. ಇತ್ತು. ವಸೂಲಾಗದ ಸಾಲಗಳ ಹೊರೆ ಹೆಚ್ಚುತ್ತಿದ್ದು, ಇದನ್ನು ನಿಭಾಯಿಸಲು ಆದಾಯದ ಹೆಚ್ಚು ಹಣವನ್ನು ಬ್ಯಾಂಕ್‌ ತೆಗೆದಿರಿಸುತ್ತಿದೆ.ಎನ್‌ಪಿಎ ನಿಭಾಯಿಸಲು ಕಳೆದ ವರ್ಷದ ಇದೇ ಅವಧಿಯಲ್ಲಿ 8,929 ಕೋಟಿ ರೂ. ಮೀಸಲಿಟ್ಟಿಟ್ಟರೇ, ಈಗ 19,228 ಕೋಟಿ ರೂ. ತೆಗೆದಿರಿಸಲಾಗಿದೆ. ಹೀಗಾಗಿ, ಬ್ಯಾಂಕ್‌ನ ಆದಾಯ ವೃದ್ಧಿಯಾದರೂ, ನಷ್ಟವೇ ಕಾಣಿಸುತ್ತಿದೆ. 

ಎಸ್‌ಬಿಐ ಲಾಭ-ನಷ್ಟದ ಹಾದಿ 

2017ರ ಜೂನ್‌ ತ್ರೈಮಾಸಿಕ 2,006 ಕೋಟಿ ರೂ. ನಿವ್ವಳ ಲಾಭ 
2017ರ ಡಿಸೆಂಬರ್‌ ತ್ರೈಮಾಸಿಕ 2,416 ಕೋಟಿ ರೂ. ನಿವ್ವಳ ನಷ್ಟ 
2018ರ ಮಾರ್ಚ್‌ ತ್ರೈಮಾಸಿಕ 7,718 ಕೋಟಿ ರೂ. ನಿವ್ವಳ ನಷ್ಟ 
2018ರ ಜೂನ್‌ ತ್ರೈಮಾಸಿಕ 4,876 ಕೋಟಿ ರೂ. ನಿವ್ವಳ ನಷ್ಟ