“ಉಮಂಗ್” (UMANG) ಆ್ಯಪ್‌ ಮೂಲಕ ಪಿಎಫ್‌ ವಿವರವನ್ನೂ ತಿಳಿಯಿರಿ

0
571

ಕೇಂದ್ರ ಸರಕಾರ ಬಿಡುಗಡೆಗೊಳಿಸಿರುವ ಉಚಿತ ಮೊಬೈಲ್‌ ಆ್ಯಪ್‌ ‘ಉಮಂಗ್‌’ ಮೂಲಕ ನೀವು ಕೇಂದ್ರ ಹಾಗೂ ರಾಜ್ಯ ಸರಕಾರಗಳ ಹಲವು ಯೋಜನೆಗಳ ವಿವರಗಳನ್ನು ಪಡೆಯಬಹುದು.

ಹೊಸದಿಲ್ಲಿ: ಕೇಂದ್ರ ಸರಕಾರ ಬಿಡುಗಡೆಗೊಳಿಸಿರುವ ಉಚಿತ ಮೊಬೈಲ್‌ ಆ್ಯಪ್‌ ‘ಉಮಂಗ್‌’ ಮೂಲಕ ನೀವು ಕೇಂದ್ರ ಹಾಗೂ ರಾಜ್ಯ ಸರಕಾರಗಳ ಹಲವು ಯೋಜನೆಗಳ ವಿವರಗಳನ್ನು ಪಡೆಯಬಹುದು.

ಯಾವ ಮೊಬೈಲ್‌ ಆ್ಯಪ್‌:  ‘ಯುನಿಫೈಡ್‌ ಮೊಬೈಲ್‌ ಅಪ್ಲಿಕೇಶನ್‌ ಫಾರ್‌ ನ್ಯೂ ಏಜ್‌ ಗವರ್ನೆನ್ಸ್‌-ಉಮಂಗ್‌’ ಎಂಬ ಹೆಸರಿನ ಈ ಮೊಬೈಲ್‌ ಆ್ಯಪ್‌ ಮೂಲಕ ಮೊಬೈಲ್‌ ಫೋನಿನಲ್ಲಿಯೇ ಭವಿಷ್ಯನಿಧಿ (ಪಿಎಫ್‌) ವಿವರಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಪ್ಯಾನ್‌, ಆಧಾರ್‌, ಡಿಜಿಲಾಕರ್‌, ಗ್ಯಾಸ್‌ ಬುಕಿಂಗ್‌, ಮೊಬೈಲ್‌ ಬಿಲ್‌ ಪೇಮೆಂಟ್‌, ವಿದ್ಯುತ್‌ ಬಿಲ್‌ ಪೇಮೆಂಟ್‌ ಇತ್ಯಾದಿಗಳನ್ನು ನಿರ್ವಹಿಸಬಹುದು.

ಈ ಮೊಬೈಲ್‌ ಆ್ಯಪ್‌ ಅನ್ನು ಅಭಿವೃದ್ದಿಪಡಿಸಿದವರು:  ಎಲೆಕ್ಟ್ರಾನಿಕ್ಸ್‌ ಮತ್ತು ಮಾಹಿತಿ ತಂತ್ರಜ್ಞಾನ ಇಲಾಖೆ ಮತ್ತು ನ್ಯಾಶನಲ್‌ ಇ-ಗವರ್ನೆನ್ಸ್‌ ವಿಭಾಗ ಜಂಟಿಯಾಗಿ ಈ ಮೊಬೈಲ್‌ ಅಪ್ಲಿಕೇಷನ್‌ ಅನ್ನು ಅಭಿವೃದ್ಧಿಪಡಿಸಿದೆ. ಪ್ರತ್ಯೇಕ ಮೊಬೈಲ್‌ ಆ್ಯಪ್‌ಗಳನ್ನು ಡೌನ್‌ಲೋಡ್‌ ಮಾಡಿಕೊಳ್ಳದೆಯೇ, ಕೇವಲ ಉಮಂಗ್‌ ಒಂದೇ ಆ್ಯಪ್‌ ಮೂಲಕ ಅನೇಕ ಸೌಲಭ್ಯಗಳನ್ನು ಪಡೆಯಬಹುದು. ಇಪಿಎಫ್‌ ಕುರಿತ ಸೇವೆಗಳಿಗೆ ಸಂಬಂಧಿಸಿ ಇದು ಬಹೂಪಯೋಗಿಯಾಗಿದೆ. 

ನಾನಾ ಕಂಪನಿಗಳಲ್ಲಿ ಉದ್ಯೋಗ ಮಾಡಿದ್ದರೂ, ಪಿಎಫ್‌ ಖಾತೆಗೆ ಎಷ್ಟು ಹಣ ಜಮೆಯಾಗಿದೆ ಎಂಬುದನ್ನು ಇದರ ಮೂಲಕ ತಿಳಿಯಬಹುದು. ಹೀಗಿದ್ದರೂ, ನೀವು ಸಕ್ರಿಯವಾದ ಯುಎಎನ್‌ (ಯುನಿವರ್ಸಲ್‌ ಅಕೌಂಟ್‌ ನಂಬರ್‌) ಪಡೆಯಬೇಕು. ಇಪಿಎಫ್‌ಒ ಜತೆ ನೋಂದಾಯಿತ ಮೊಬೈಲ್‌ ಸಂಖ್ಯೆ ಹೊಂದಿರಬೇಕು. ಆಗ ಕೆಳಕಂಡ ವಿಧಾನಗಳ ಮೂಲಕ ನೀವು ಇಪಿಎಫ್‌ ಬ್ಯಾಲೆನ್ಸ್‌ ಅನ್ನು ನೋಡಬಹುದು. 

1. ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ಉಮಂಗ್‌ ಆ್ಯಪ್‌ ಅನ್ನು ಡೌನ್‌ಲೋಡ್‌ ಮಾಡಿಟ್ಟುಕೊಳ್ಳಿ. ಆಂಡ್ರಾಯ್ಡ್‌ ತಂತ್ರಜ್ಞಾನ ಆಧಾರಿತ ಸ್ಮಾರ್ಟ್‌ಫೋನ್‌ ಬಳಕೆದಾರರು ಗೂಗಲ್‌ ಪ್ಲೇ ಸ್ಟೋರ್‌ ಮೂಲಕ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. 

2. ಆ್ಯಪ್‌ ಅನ್ನು ತೆರೆದ ನಂತರ ಇಪಿಎಫ್‌ಒ ಆಯ್ಕೆಯನ್ನು ಕ್ಲಿಕ್‌ ಮಾಡಿರಿ. 

3. ಈಗ ನೀವು ಇಪಿಎಫ್‌ಒ ಪೇಜ್‌ ಅನ್ನು ಕಾಣುತ್ತೀರಿ. ಎಂಪ್ಲಾಯಿ ಆ್ಯಂಡ್‌ ಎಂಪ್ಲಾಯರ್‌ ಸೆಂಟ್ರಿಕ್‌ ಸರ್ವಿಸ್‌, ಜನರಲ್‌ ಸರ್ವಿಸ್ ಆ್ಯಂಡ್‌ ಪೆನ್ಷನರ್‌ ಸರ್ವಿಸ್‌ ಸೌಲಭ್ಯದ ಆಯ್ಕೆಗಳು ಅಲ್ಲಿರುತ್ತವೆ. ನೀವು ‘ಎಂಪ್ಲಾಯಿ ಸೆಂಟ್ರಿಕ್‌ ಸರ್ವಿಸ್’ ಅನ್ನು ಕ್ಲಿಕ್‌ ಮಾಡಿ ಮುಂದುವರಿಯಿರಿ. 

4. ‘ಎಂಪ್ಲಾಯಿ ಸೆಂಟ್ರಿಕ್‌ ಸರ್ವಿಸ್‌’ ಅಡಿಯಲ್ಲಿ ‘ವ್ಯೂ ಪಾಸ್‌ಬುಕ್‌’ ಆಯ್ಕೆಯನ್ನು ಕ್ಲಿಕ್‌ ಮಾಡಿ. ನಿಮ್ಮ ಪಿಎಫ್‌ ಬ್ಯಾಲೆನ್ಸ್‌ ವಿವರಗಳನ್ನು ಅದರಲ್ಲಿ ತಿಳಿದುಕೊಳ್ಳಬಹುದು. 

5. ಒಂದು ಸಲ ವ್ಯೂ ಪಾಸ್‌ಬುಕ್‌ ಟ್ಯಾಬ್‌ ಅನ್ನು ಕ್ಲಿಕ್‌ ಮಾಡಿದ ನಂತರ, ನಿಮ್ಮ ಯುಎಎನ್‌ ಸಂಖ್ಯೆಯನ್ನು ನಮೂದಿಸಬೇಕು. ನಂತರ ‘ಗೆಟ್‌ ಒಟಿಪಿ’ ಒತ್ತಿರಿ. ನೋಂದಾಯಿತ ಮೊಬೈಲ್‌ನಲ್ಲಿ ಒಟಿಪಿ ಪಡೆಯುವಿರಿ. 

6. ನೀವು ಒಟಿಪಿಯನ್ನು ನಮೂದಿಸಿದ ನಂತರ ನಿಮ್ಮೆಲ್ಲ ಇಪಿಎಫ್‌ ಖಾತೆಗಳ ವಿವರ ಪಡೆಯಬಹುದು. ನೀವು ನಾನಾ ಕಂಪನಿಗಳಲ್ಲಿ ಕೆಲಸ ಮಾಡಿರಬಹುದು. ಆಗಿನ ಎಲ್ಲ ಇಪಿಎಫ್‌ ಖಾತೆಗಳ ವಿವರ ಪಡೆಯಬಹುದು.