ಈ ಡೆಬಿಟ್‌, ಕ್ರೆಡಿಟ್‌ ಕಾರ್ಡ್‌ಗಳು ಜ.1ರಿಂದ ಕೆಲಸ ಮಾಡುವುದಿಲ್ಲ!

0
480

ಹೊಸ ವರ್ಷದ ಜ.1ರಿಂದ ಕೆಲವು ಡೆಬಿಟ್‌ ಮತ್ತು ಕ್ರೆಡಿಟ್‌ ಕಾರ್ಡ್‌ಗಳು ಕೆಲಸ ಮಾಡುವುದಿಲ್ಲ. ಹೀಗಾಗಿ, ಖಾತೆದಾರರು ಹಳೆಯ ಮ್ಯಾಗ್‌ಸ್ಟ್ರಿಪ್‌ ಕಾರ್ಡ್‌ ಹೊಂದಿದ್ದರೆ, ಹೊಸ ಕಾರ್ಡ್‌(ಇಎಂವಿ ಚಿಪ್‌) ಪಡೆಯಬೇಕು. ಈ ಬಗ್ಗೆ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ) ಸೇರಿದಂತೆ ಅನೇಕ ಬ್ಯಾಂಕ್‌ಗಳು ತಮ್ಮ ಗ್ರಾಹಕರಿಗೆ ಪದೇಪದೆ ಸೂಚನೆಗಳನ್ನು ನೀಡುತ್ತಿವೆ.

ಹೊಸದಿಲ್ಲಿ: ಹೊಸ ವರ್ಷದ ಜ.1ರಿಂದ ಕೆಲವು ಡೆಬಿಟ್‌ ಮತ್ತು ಕ್ರೆಡಿಟ್‌ ಕಾರ್ಡ್‌ಗಳು ಕೆಲಸ ಮಾಡುವುದಿಲ್ಲ. ಹೀಗಾಗಿ, ಖಾತೆದಾರರು ಹಳೆಯ ಮ್ಯಾಗ್‌ಸ್ಟ್ರಿಪ್‌ ಕಾರ್ಡ್‌ ಹೊಂದಿದ್ದರೆ, ಹೊಸ ಕಾರ್ಡ್‌(ಇಎಂವಿ ಚಿಪ್‌) ಪಡೆಯಬೇಕು. ಈ ಬಗ್ಗೆ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ) ಸೇರಿದಂತೆ ಅನೇಕ ಬ್ಯಾಂಕ್‌ಗಳು ತಮ್ಮ ಗ್ರಾಹಕರಿಗೆ ಪದೇಪದೆ ಸೂಚನೆಗಳನ್ನು ನೀಡುತ್ತಿವೆ. 

ರಿಸರ್ವ್‌ ಬ್ಯಾಂಕ್‌ನ ಹಳೆಯ ನಿರ್ದೇಶನದ ಪ್ರಕಾರ, ಬ್ಯಾಂಕ್‌ಗಳು ಡಿ.31ರ ಒಳಗೆ ಹಳೆಯ ಮ್ಯಾಗ್‌ಸ್ಟ್ರಿಪ್‌ನ ಕಾರ್ಡ್‌ಗಳನ್ನು ಗ್ರಾಹಕರಿಂದ ಹಿಂಪಡೆದು, ಇಎಂವಿ ಚಿಪ್‌ನ ಪಿನ್‌ ಆಧಾರಿತ ಕಾರ್ಡ್‌ಗಳನ್ನು ನೀಡಬೇಕು. ಈಗಾಗಲೇ ಅನೇಕ ಗ್ರಾಹಕರು ಹೊಸ ಕಾರ್ಡ್‌ಗಳನ್ನು ಪಡೆದಿದ್ದು, ಇತರರು ಪಡೆಯಲು ಮುಂದಾಗಿದ್ದಾರೆ. 

ಏನಿದು ಇಎಂವಿ? 

ಡೆಬಿಟ್‌ ಮತ್ತು ಕ್ರೆಡಿಟ್‌ ಕಾರ್ಡ್‌ನ ಸುರಕ್ಷತೆ ಹೆಚ್ಚಿಸುವ ನಿಟ್ಟಿನಲ್ಲಿ ಇಎಂವಿ ಚಿಪ್‌ನ ಕಾರ್ಡ್‌ಗಳು ಆಧುನಿಕ ಆವಿಷ್ಕಾರಗಳಾಗಿವೆ. ಯುರೊಪೇ, ಮಾಸ್ಟರ್‌ಕಾರ್ಡ್‌ ಮತ್ತು ವೀಸಾ ಕಾರ್ಡ್‌ ಅನ್ನುವುದನ್ನು ಇಎಂವಿ ಬಿಂಬಿಸುತ್ತದೆ. ಇಂಥ ಹೊಸ ಕಾರ್ಡ್‌ಗಳು ವಂಚನೆಗೆ ಒಳಗಾಗುವ ಸಾಧ್ಯತೆಗಳು ಕಡಿಮೆ. 

ನಿಮ್ಮಲ್ಲಿ ಇಎಂವಿ ಕಾರ್ಡ್‌ ಇದೆಯೇ? 

ಇಎಂವಿ ಪತ್ತೆ ಹಚ್ಚುವುದು ಸುಲಭ. ಇಎಂವಿ ಕಾರ್ಡ್‌ಗಳು ಚಿನ್ನದ ಬಣ್ಣದ ಚಿಪ್‌ ಅನ್ನು ಹೊಂದಿರುತ್ತದೆ. ಬಹುತೇಕ ಎಡಭಾಗದಲ್ಲಿ ಎಂಬೆಡ್‌ ಆಗಿರುತ್ತದೆ. 

ಏನಿದು ಮ್ಯಾಗ್ನೆಟಿಕ್‌ ಸ್ಟ್ರಿಪ್‌? 

ತೆಳುವಾದ ಕಬ್ಬಿಣದ ಹಾಳೆಯ ಮ್ಯಾಗ್ನೆಟಿಕ್‌ ಪಾರ್ಟಿಕಲ್ಸ್‌ನಲ್ಲಿ ಡೇಟಾವನ್ನು ಸಂಗ್ರಹಿಸಲಾಗಿರುತ್ತದೆ. ಇದು ಹಳೆಯ ತಂತ್ರಜ್ಞಾನ ಆಧಾರಿತ ಕಾರ್ಡ್‌ ಆಗಿದ್ದು, ಇದು ಸೈಬರ್‌ ಖದೀಮರ ವಂಚನೆಗೆ ಸುಲಭವಾಗಿ ತುತ್ತಾಗುವಂತಿದೆ. ಕಾರ್ಡ್‌ ಸ್ಕಿಮ್ಮಿಂಗ್‌ ಮೂಲಕ ಮಾಹಿತಿಯನ್ನು ಕಳವು ಮಾಡುವ ಅವಕಾಶಗಳಿವೆ. 

ಹೊಸ ಕಾರ್ಡ್‌ ಪಡೆಯುವುದು ಹೇಗೆ? 

ಎಸ್‌ಬಿಐ ಜಾಲತಾಣದಲ್ಲಿ ನೆಟ್‌ ಬ್ಯಾಂಕಿಂಗ್‌ ಮೂಲಕ ಹೊಸ ಕಾರ್ಡ್‌ಗೆ ಕೋರಿಕೆ ಸಲ್ಲಿಸಬಹುದು. ಇಲ್ಲವೇ, ನೇರವಾಗಿ ತಮ್ಮ ಬ್ಯಾಂಕ್‌ ಶಾಖೆಗೆ ತೆರಳಿ ಸಂಬಂಧಿಸಿದ ಅರ್ಜಿ ತುಂಬಿಕೊಡಬಹುದು. ಇಎಂವಿ ಚಿಪ್‌ ಆಧಾರಿತ ಕಾರ್ಡ್‌ ಅನ್ನು ನಿಮ್ಮ ನೋಂದಾಯಿತ ವಿಳಾಸಕ್ಕೆ ಬ್ಯಾಂಕ್‌ಗಳು ರವಾನಿಸುತ್ತವೆ. ಇತರೆ ಬ್ಯಾಂಕ್‌ಗಳಿಗೂ ಇದೇ ನಿಯಮಗಳು ಅನ್ವಯವಾಗುತ್ತವೆ. 

ಶುಲ್ಕ ತೆರಬೇಕೇ? 

ಹೊಸ ಕಾರ್ಡ್‌ಗೆ ಯಾವುದೇ ರೀತಿಯ ಶುಲ್ಕ ಇಲ್ಲ. ಉಚಿತವಾಗಿ ಬದಲಾಯಿಸಿಕೊಳ್ಳಬಹುದು ಎಂದು ಎಸ್‌ಬಿಐ ತಿಳಿಸಿದೆ. ನಿರ್ದಿಷ್ಟ ದಿನಾಂಕದ ಬಳಿಕ ಹೊಸ ಕಾರ್ಡ್‌ಗೆ ಅರ್ಜಿ ಸಲ್ಲಿಸಿದರೆ, ಶುಲ್ಕ ತೆರಬೇಕಾಗುತ್ತದೆ. 

ಎಸ್‌ಬಿಐ ಇ-ಬ್ಯಾಂಕಿಂಗ್‌ ಬಂದ್‌ ಆಗಬಹುದು, ಗಮನಿಸಿ… 

ಸರಕಾರಿ ಸ್ವಾಮ್ಯದ ಅತಿದೊಡ್ಡ ಬ್ಯಾಂಕ್‌ ಆದ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ(ಎಸ್‌ಬಿಐ) ತನ್ನ ನೆಟ್‌ ಬ್ಯಾಂಕಿಂಗ್‌ ಬಳಕೆದಾರರಿಗೆ ನ.30ರ ಡೆಡ್‌ಲೈನ್‌ ನೀಡಿದೆ. ಆ ಅವಧಿಯೊಳಗೆ ನೆಟ್‌ ಬ್ಯಾಕಿಂಗ್‌ ಬಳಕೆದಾರರು ತಮ್ಮ ಮೊಬೈಲ್‌ ಸಂಖ್ಯೆಯನ್ನು ಬ್ಯಾಂಕ್‌ನಲ್ಲಿ ನೋಂದಾಯಿಸಿಕೊಳ್ಳದಿದ್ದರೆ ಆನ್‌ಲೈನ್‌ ಸೇವೆಗಳನ್ನು ಸ್ಥಗಿತಗೊಳಿಸುವುದಾಗಿ ಮತ್ತೊಮ್ಮೆ ಎಚ್ಚರಿಕೆ ನೀಡಿದೆ. 

ಡಿಸೆಂಬರ್‌ 1ರಿಂದ ಹೊಸ ನಿಯಮಗಳು ಜಾರಿಗೆ ಬರಲಿದ್ದು, ನವೆಂಬರ್‌ 30ರ ಒಳಗೆ ಮೊಬೈಲ್‌ ಸಂಖ್ಯೆಯನ್ನು ನೋಂದಾಯಿಸಿಕೊಳ್ಳಬೇಕೆಂದು ಬಳಕೆದಾರರಿಗೆ ಬ್ಯಾಂಕ್‌ ಸೂಚಿಸಿದೆ. ಬಳಕೆದಾರರು ಆಗಾಗ್ಗೆ ತಮ್ಮ ಬ್ಯಾಂಕ್‌ ವಹಿವಾಟನ್ನು ತಿಳಿದುಕೊಳ್ಳಬೇಕೆಂದು ಬಯಸುತ್ತಾರೆ. ಹಾಗಾಗಿ ಎಲ್ಲ ಬ್ಯಾಂಕ್‌ಗಳು ಕಡ್ಡಾಯವಾಗಿ ಖಾತೆದಾರರ ಮೊಬೈಲ್‌ ಸಂಖ್ಯೆಯನ್ನು ಅವರ ಖಾತೆಯೊಂದಿಗೆ ಲಿಂಕ್‌ ಮಾಡಬೇಕೆಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ ಆದೇಶಿಸಿರುವ ಹಿನ್ನೆಲೆಯಲ್ಲಿ ಎಸ್‌ಬಿಐ ತನ್ನ ನೆಟ್‌ ಬ್ಯಾಂಕ್‌ ಬಳಕೆದಾರರಿಗೆ ಸೂಚಿಸಿದೆ. 

ಬ್ಯಾಂಕ್‌ ಖಾತೆಗೆ ಮೊಬೈಲ್‌ ಸಂಖ್ಯೆ ಲಿಂಕ್‌ ಮಾಡದ ಖಾತೆದಾರರು ನೇರವಾಗಿ ಬ್ಯಾಂಕ್‌ಗೆ ಹೋಗಿ ಅಥವಾ ಎಟಿಎಂ ಮೂಲಕ ತಮ್ಮ ಮೊಬೈಲ್‌ ಸಂಖ್ಯೆಯನ್ನು ಲಿಂಕ್‌ ಮಾಡಿಕೊಳ್ಳುವ ಸೌಲಭ್ಯವನ್ನು ಎಸ್‌ಬಿಐ ನೀಡಿದೆ.