ಇರಾನ್ ತೈಲಕ್ಕೆ ಭಾರತದಿಂದ ರೂಪಾಯಿಯಲ್ಲೇ ಪಾವತಿ

0
304

ಇರಾನ್‌ನಿಂದ ಆಮದು ಮಾಡಿಕೊಳ್ಳುವ ತೈಲಕ್ಕೆ ಇನ್ನು ಮುಂದೆ ಭಾರತ ಡಾಲರ್, ಯೂರೋ ಬದಲಾಗಿ ರೂಪಾಯಿಯಲ್ಲೇ ಪಾವತಿ ಮಾಡಲಿದೆ. ಇರಾನ್ ತೈಲ ಆಮದಿನ ಮೇಲೆ ಭಾರತಕ್ಕೆ ಅಮೆರಿಕ ನಿರ್ಬಂಧ ಹೇರಿರುವುದು ಮತ್ತು ಹಣಕಾಸು ಪಾವತಿ ವ್ಯವಸ್ಥೆಯನ್ನು ತಡೆಹಿಡಿದಿರುವ ಬೆನ್ನಲ್ಲೇ ಉಭಯ ರಾಷ್ಟ್ರಗಳು ಪ್ರತ್ಯೇಕವಾಗಿ ರೂಪಾಯಿ ಮೂಲಕವೇ ಪಾವತಿ ಮಾಡುವ ವ್ಯವಸ್ಥೆ ಜಾರಿಗೆ ಕ್ರಮ ಕೈಗೊಂಡಿವೆ.

ಹೊಸದಿಲ್ಲಿ: ಇರಾನ್‌ನಿಂದ ಆಮದು ಮಾಡಿಕೊಳ್ಳುವ ತೈಲಕ್ಕೆ ಇನ್ನು ಮುಂದೆ ಭಾರತ ಡಾಲರ್, ಯೂರೋ ಬದಲಾಗಿ ರೂಪಾಯಿಯಲ್ಲೇ ಪಾವತಿ ಮಾಡಲಿದೆ.

ಇರಾನ್ ತೈಲ ಆಮದಿನ ಮೇಲೆ ಭಾರತಕ್ಕೆ ಅಮೆರಿಕ ನಿರ್ಬಂಧ ಹೇರಿರುವುದು ಮತ್ತು ಹಣಕಾಸು ಪಾವತಿ ವ್ಯವಸ್ಥೆಯನ್ನು ತಡೆಹಿಡಿದಿರುವ ಬೆನ್ನಲ್ಲೇ ಉಭಯ ರಾಷ್ಟ್ರಗಳು ಪ್ರತ್ಯೇಕವಾಗಿ ರೂಪಾಯಿ ಮೂಲಕವೇ ಪಾವತಿ ಮಾಡುವ ವ್ಯವಸ್ಥೆ ಜಾರಿಗೆ ಕ್ರಮ ಕೈಗೊಂಡಿವೆ. ಯುಕೋ ಬ್ಯಾಂಕ್‌ ಮೂಲಕವೇ ಭಾರತ ಇರಾನ್‌ಗೆ ತೈಲ ಆಮದಿನ ದರವನ್ನು ಪಾವತಿಸಲಿದೆ. 

ಅಮೆರಿಕದ ನಿರ್ಬಂಧ ನವೆಂಬರ್ 5 ರ ಸೋಮವಾರದಿಂದ ಜಾರಿಗೆ ಬರುತ್ತಿದ್ದು, ಭಾರತ ಇರಾನ್‌ಗೆ ಆಮದು ಮಾಡಿಕೊಂಡ ತೈಲಕ್ಕೆ ಪೂರ್ತಿ ಮೊತ್ತವನ್ನು ರೂಪಾಯಿ ಮೂಲಕವೇ ಪಾವತಿಸುತ್ತದೆ. ಈ ಮೊದಲು ಶೇ. 45 ರೂಪಾಯಿ ಮತ್ತು ಶೇ. 55 ಯೂರೋ ಮೂಲಕ ಪಾವತಿಸಲಾಗುತ್ತಿತ್ತು. 

ಭಾರತವು ಇರಾನ್‌ಗೆ ಪಾವತಿಸುವ ಮೊತ್ತವನ್ನು ಇರಾನ್ ಭಾರತದಿಂದ ಆಮದು ಮಾಡಿಕೊಳ್ಳುವ ವಸ್ತುಗಳ ಪಾವತಿಗೆ ಬಳಸಿಕೊಳ್ಳಲಿದೆ. ಜತೆಗೆ ಇರಾನ್‌ನ ಬ್ಯಾಂಕ್‌ಗಳಿಗೆ ಭಾರತದಿಂದ ಪಾವತಿಸುವ ಹಣಕಾಸು ವ್ಯವಸ್ಥೆ ಮೇಲೆ ನಿರ್ಬಂಧ ವಿಧಿಸಿದರೂ, ಯಾವುದೇ ಸಮಸ್ಯೆಯಾಗದಂತೆ ಮತ್ತು ಭಾರತವು ರೂಪಾಯಿಯಲ್ಲೇ ಪಾವತಿಸುವಂತೆ ವ್ಯವಸ್ಥೆ ರೂಪಿಸಿಕೊಳ್ಳಲಿದೆ. 

ಇರಾನ್ ಭಾರತಕ್ಕೆ ಅತಿಹೆಚ್ಚಿನ ಪ್ರಮಾಣದಲ್ಲಿ ಪೂರೈಕೆ ಮಾಡುತ್ತಿದೆ. ಉಭಯ ರಾಷ್ಟ್ರಗಳ ಮೇಲೆ ಅಮೆರಿಕ ಒತ್ತಡವಿದ್ದರೂ, ತೈಲ ಪಾವತಿ ಮತ್ತು ಆಮದು ಬಗ್ಗೆ ದೃಢ ನಿರ್ಧಾರ ಕೈಗೊಂಡು, ಭಾರತ ಆಮದು ಮುಂದುವರಿಸಲಿದೆ.