ಇರಾನಿನ ಚಬಹಾರ್ ಬಂದರು ಶೀಘ್ರ ಭಾರತಕ್ಕೆ ಹಸ್ತಾಂತರ

0
791

ಭಾರತ-ಅಮೆರಿಕ ನಡುವಣ 2+2 ಮಾತುಕತೆ ಕಡೆಗೆ ಜಗತ್ತಿನ ಗಮನ ಕೇಂದ್ರೀಕೃತವಾಗಿರುವ ಮಧ್ಯೆಯೇ ಇರಾನ್‌ ನಿಯೋಗವೊಂದು ದಿಲ್ಲಿಗೆ ಆಗಮಿಸಿ ನೇಪಥ್ಯದಲ್ಲಿ ಕಾರ್ಯನಿರತವಾಗಿದೆ. ವ್ಯೂಹಾತ್ಮಕವಾಗಿ ಮಹತ್ವ ಪಡೆದಿರುವ ಚಬಹಾರ್ ಬಂದರು ನಿರ್ಮಾಣಕ್ಕೆ ಹಣಕಾಸು ಪಾವತಿ ವಿಧಾನ ಕುರಿತು ಸಮಾಲೋಚನೆ ನಡೆಸುತ್ತಿದೆ.

ಹೊಸದಿಲ್ಲಿ: ಭಾರತ-ಅಮೆರಿಕ ನಡುವಣ 2+2 ಮಾತುಕತೆ ಕಡೆಗೆ ಜಗತ್ತಿನ ಗಮನ ಕೇಂದ್ರೀಕೃತವಾಗಿರುವ ಮಧ್ಯೆಯೇ ಇರಾನ್‌ ನಿಯೋಗವೊಂದು ದಿಲ್ಲಿಗೆ ಆಗಮಿಸಿ ನೇಪಥ್ಯದಲ್ಲಿ ಕಾರ್ಯನಿರತವಾಗಿದೆ. ವ್ಯೂಹಾತ್ಮಕವಾಗಿ ಮಹತ್ವ ಪಡೆದಿರುವ ಚಬಹಾರ್ ಬಂದರು ನಿರ್ಮಾಣಕ್ಕೆ ಹಣಕಾಸು ಪಾವತಿ ವಿಧಾನ ಕುರಿತು ಸಮಾಲೋಚನೆ ನಡೆಸುತ್ತಿದೆ. ಅಲ್ಲದೆ, ಭಾರತದಿಂದ ರೈಲ್ವೇ ಮತ್ತು ಭಾರೀ ಎಂಜಿನಿಯರಿಂಗ್ ಸರಕುಗಳನ್ನು ಖರೀದಿಸುವ ಬಗ್ಗೆಯೂ ಆಸಕ್ತಿ ತೋರಿದೆ. 

ಇರಾನ್‌ ವಿರುದ್ಧ ಅಮೆರಿಕ ಹೇರಿದ ನಿಷೇಧಗಳನ್ನು ನಿಷ್ಫಲಗೊಳಿಸುವ ಹಾಗೂ ಕಚ್ಚಾ ತೈಲ ಬೆಲೆಗಳನ್ನು ತಗ್ಗಿಸುವ ನಿಟ್ಟಿನಲ್ಲಿ ಯುಕೋ ಬ್ಯಾಂಕ್ ಮತ್ತು ಬ್ಯಾಂಕ್‌ ಪಸರ್‌ಗಡ್‌ ನಡುವೆ ಪಾವತಿ ವ್ಯವಸ್ಥೆಯೊಂದನ್ನು ರೂಪಿಸಲು ಸಮಾಲೋಚನೆ ನಡೆದಿದೆ. ಇತ್ತೀಚೆಗಷ್ಟೇ ಭಾರತದಲ್ಲಿ ಶಾಖೆ ತೆರೆಯಲು ಇರಾನಿನ ಬ್ಯಾಂಕ್‌ಗೆ ಅನುಮತಿ ನೀಡಿರುವುದು ಮಹತ್ವದ ಬೆಳವಣಿಗೆಯಾಗಿದೆ. 

ಇರಾನ್‌ನ ಸಾರಿಗೆ ಸಚಿವ ಅಬ್ಬಾಸ್‌ ಅಹ್ಮದ್‌ ಅಖೌಂಡಿ ನೇತೃತ್ವದ ನಿಯೋಗ ಭಾರತದ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರನ್ನು ಭೇಟಿ ಮಾಡಿ, ಚಬಹಾರ್ ಬಂದರನ್ನು ಶೀಘ್ರವೇ ಭಾರತಕ್ಕೆ ಹಸ್ತಾಂತರಿಸಲಾಗುವುದು ಎಂದು ಭರವಸೆ ನೀಡಿದರು. 

‘ಈ ಯೋಜನೆ ಇರಾನ್ ಮೇಲಿನ ನಿರ್ಬಂಧಕ್ಕೂ ಮೊದಲೇ ಸಿದ್ಧಪಡಿಸಿದ್ದು, ನಿರ್ಮಾಣ ಕಾರ್ಯವೂ ಮುಕ್ತಾಯಗೊಂಡಿದೆ’ ಎಂದು ಗಡ್ಕರಿ ಟೈಮ್ಸ್‌ ಆಫ್‌ ಇಂಡಿಯಾಗೆ ತಿಳಿಸಿದರು. 

ಅಫಘಾನಿಸ್ತಾನದ ಹೆಬ್ಬಾಗಿಲು ಎಂದು ಪರಿಗಣಿಸಲಾಗಿರುವ ಚಬಹಾರ್ ಬಂದರಿನಲ್ಲಿ ಮಧ್ಯಂತರ ಕಾರ್ಯಾರಂಭಕ್ಕೆ 35 ಲಕ್ಷ ಡಾಲರ್‌ಗಳ ನಿರ್ವಹಣಾ ಖಾತರಿಯನ್ನು ಭಾರತದಿಂದ ಇರಾನ್ ಸರಕಾರ ಬಯಸಿದೆ. ಆದರೆ ಆರ್ಥಿಕ ನಿರ್ಬಂಧಗಳ ಹಿನ್ನೆಲೆಯಲ್ಲಿ ಇರಾನ್‌ಗೆ ಆ ಮೊತ್ತ ಪಾವತಿಸುವ ಷರತ್ತಿನಿಂದ ಭಾರತ ವಿನಾಯಿತಿ ಕೋರಿದೆ. 

ಚಬಹಾರ್‌ ಬಂದರಿನಲ್ಲಿ ಉಪಕರಣಗಳ ಅಳವಡಿಕೆಗೆ ಆದೇಶಿಸಲಾಗಿರುವ ಎರಡು ಬರ್ತ್‌ಗಳಿಗೆ ಬ್ಯಾಂಕ್‌ ಖಾತರಿ ಒದಗಿಸುವುದೂ ಸವಾಲಾಗಿ ಪರಿಣಮಿಸಿದೆ. ಹೀಗಾಗಿ ಯುಕೋ ಬ್ಯಾಂಕ್‌ ಮತ್ತು ಬ್ಯಾಂಕ್‌ ಪಸರ್‌ಗಡ್‌ ನಡುವಣ ಒಪ್ಪಂದ ಮಹತ್ವದ್ದಾಗಿದೆ. ಭಾರತದ ಅಕ್ಕಿ ಮತ್ತು ಎಂಜಿನಿಯರಿಂಗ್ ವಸ್ತುಗಳ ರಫ್ತಿಗೆ ಬರಬೇಕಾದ ಹಣವನ್ನು ಇರಾನ್‌ನಿಂದ ಆಮದು ಮಾಡಿಕೊಳ್ಳುವ ತೈಲಕ್ಕೆ ಹೊಂದಿಸಿಕೊಳ್ಳುವ ವ್ಯವಸ್ಥೆಯನ್ನು ಈ ಬ್ಯಾಂಕ್‌ಗಳ ಮೂಲಕ ಮಾಡಲಾಗುವುದು. ಹಿಂದಿನ ಬಾರಿ ಅಮೆರಿಕದ ನಿರ್ಬಂಧಗಳಿದ್ದಾಗಲೂ ಇದೇ ರೀತಿಯ ವ್ಯವಸ್ಥೆ ಮಾಡಿಕೊಳ್ಳಲಾಗಿತ್ತು. 

ಇರಾನ್‌ ನಿಯೋಗ ಭಾರತದಿಂದ ರೈಲು ಎಂಜಿನ್‌ಗಳು, ರೈಲು ಹಳಿಗಳು ಮತ್ತು ಬಿಎಚ್‌ಇಎಲ್‌ ಉತ್ಪಾದಿತ ಸಿಗ್ನಲಿಂಗ್‌ ವ್ಯವಸ್ಥೆಗಳು, ಎಂಜಿನಿಯರಿಂಗ್ ಸರಕುಗಳ ಖರೀದಿಗೆ ಇರಾನ್ ನಿಯೋಗ ಆಸಕ್ತಿ ತೋರಿದೆ. 

ಇರಾನ್ ಸಚಿವ ಅಖೌಂಡಿ ಇಂದು ವಾಣಿಜ್ಯ ಸಚಿವ ಸುರೇಶ್‌ ಪ್ರಭು ಅವರನ್ನು ಭೇಟಿಯಾಗುತ್ತಿದ್ದಾರೆ.