ಅಸ್ಸಾಂನಲ್ಲಿ “ಮೆಥನಾಲ್‌”ನಿಂದ ಅಡುಗೆ ಇಂಧನ

0
775

ಮೆಥನಾಲ್‌ನಿಂದ ಅಡುಗೆ ಇಂಧನ ಉತ್ಪಾದಿಸಿ, ಮನೆಗಳಿಗೆ ನೀಡಲು ಅಸ್ಸಾಂ ಸಿದ್ಧತೆ ನಡೆಸಿದೆ. ಅಸ್ಸಾಂ ಪೆಟ್ರೋಕೆಮಿಕಲ್ಸ್‌ ಸಂಸ್ಥೆ, ದೇಶದಲ್ಲೇ ಮೊದಲ ಮೆಥನಾಲ್‌ನಿಂದ ತಯಾರಿಸಿದ ಅಡುಗೆ ಇಂಧನ ತಯಾರಿಸಲು ಎಲ್ಲ ರೀತಿಯ ಸಿದ್ಧತೆ ನಡೆಸುತ್ತಿದೆ. ಪರಿಸರ ಸ್ನೇಹಿ, ಸುಲಭ ಸಾಗಾಣಿಕೆ ಹಾಗೂ ಎಲ್‌ಪಿಜಿಯಿಂದ ಶೇ.30ರಷ್ಟು ಕಡಿಮೆ ಬೆಲೆಯಲ್ಲಿ ಮೆಥನಾಲ್‌ ಅಡುಗೆ ಇಂಧನ ಲಭ್ಯವಾಗಲಿದೆ ಎಂದು ಸಂಸ್ಥೆ ಹೇಳಿದೆ.

ಗುವಾಹಟಿ: ಮೆಥನಾಲ್‌ನಿಂದ ಅಡುಗೆ ಇಂಧನ ಉತ್ಪಾದಿಸಿ, ಮನೆಗಳಿಗೆ ನೀಡಲು ಅಸ್ಸಾಂ ಸಿದ್ಧತೆ ನಡೆಸಿದೆ. 
ಅಸ್ಸಾಂ ಪೆಟ್ರೋಕೆಮಿಕಲ್ಸ್‌ ಸಂಸ್ಥೆ, ದೇಶದಲ್ಲೇ ಮೊದಲ ಮೆಥನಾಲ್‌ನಿಂದ ತಯಾರಿಸಿದ ಅಡುಗೆ ಇಂಧನ ತಯಾರಿಸಲು ಎಲ್ಲ ರೀತಿಯ ಸಿದ್ಧತೆ ನಡೆಸುತ್ತಿದೆ. ಪರಿಸರ ಸ್ನೇಹಿ, ಸುಲಭ ಸಾಗಾಣಿಕೆ ಹಾಗೂ ಎಲ್‌ಪಿಜಿಯಿಂದ ಶೇ.30ರಷ್ಟು ಕಡಿಮೆ ಬೆಲೆಯಲ್ಲಿ  ಮೆಥನಾಲ್‌ ಅಡುಗೆ ಇಂಧನ ಲಭ್ಯವಾಗಲಿದೆ ಎಂದು ಸಂಸ್ಥೆ ಹೇಳಿದೆ. 

ಕೇಂದ್ರ ನೀತಿ ಆಯೋಗದ ಶಿಫಾರಸಿನ ಮೇರೆಗೆ ಅನುಷ್ಠಾನಗೊಳ್ಳುತ್ತಿರುವ ಬೃಹತ್‌ ಕಾರ್ಯಕ್ರಮ ಇದಾಗಿದ್ದು, ಚೀನಾ ಹಾಗೂ ಇಸ್ರೇಲ್‌ನಲ್ಲಿ ಈಗಾಗಲೇ ಮೆಥನಾಲ್‌ ಅಡುಗೆ ಇಂಧನ ಬಳಕೆಯಲ್ಲಿದೆ. 

ಅಕ್ಟೋಬರ್ 5 ರಿಂದ ಪ್ರಾಯೋಗಿಕವಾಗಿ ಯೋಜನೆ ಅನುಷ್ಠಾನಗೊಳ್ಳಲಿದ್ದು, ಡಿಬ್ರೂಗಡದಲ್ಲಿರುವ ನಮ್ರುಪ್‌ ಮೆಥನಾಲ್‌ ಘಟಕದಲ್ಲಿ ತಯಾರಿಸಲಾಗುತ್ತದೆ. ಸಂಸ್ಥೆ ಆಯ್ಕೆ ಮಾಡಿದ ವ್ಯಕ್ತಿಗಳಿಗೆ ಸ್ಟೌವ್‌ ಹಾಗೂ ಮೆಥನಾಲ್‌ ಕಿಟ್‌ ನೀಡಲಾಗುತ್ತದೆ. ಮುಂದಿನ ಒಂದು ತಿಂಗಳಲ್ಲಿ ವಾಣಿಜ್ಯಕ್ಕಾಗಿ ಮೆಥನಾಲ್‌ ಅಡುಗೆ ಇಂಧನ ಬಳಕೆಗೆ ಸಿದ್ಧವಾಗಲಿದೆ ಎಂದು ಸಂಸ್ಥೆ ಅಧ್ಯಕ್ಷ ಜಗದೀಶ್‌ ಭೂಯನ್‌ ತಿಳಿಸಿದ್ದಾರೆ. 

ಮೆಥನಾಲ್‌ ನಿಂದ ಅಪಾಯ ಇಲ್ಲ. ಇವುಗಳು ಎಲ್‌ಪಿಜಿಯಂತೆ ಸ್ಪೋಟಗೊಳ್ಳುವ ಸಾಧ್ಯತೆಗಳಿಲ್ಲ. ವಿಶೇಷ ಬರ್ನಲ್‌ ಇದಕ್ಕೆ ಅಗತ್ಯ. ಸದ್ಯಕ್ಕೆ 1.2ಕೆಜಿ ಸಿಲಿಂಡರ್‌ ಆಕಾರದಲ್ಲಿ ಇವುಗಳ ಲಭ್ಯವಾಗಲಿದೆ. 32 ರೂನಲ್ಲಿ ಇವುಗಳು ವಾಣಿಜ್ಯ ಉಪಯೋಗಕ್ಕೆ ಲಭ್ಯವಾಗಲಿದೆ. ಪ್ರಸ್ತುತ ಘಟಕದಲ್ಲಿ ಪ್ರತಿನಿತ್ಯ ನೂರು ಟನ್‌ ಮೆಥನಾಲ್‌ ಉತ್ಪಾದನೆಯಾಗುತ್ತಿದೆ. ಮೆಥನಾಲ್‌ ಘಟಕ ವಿಸ್ತರಣೆಯಾಗುತ್ತಿದ್ದು, ಪ್ರತಿ ದಿನ 500 ಟನ್‌ ಉತ್ಪತ್ತಿ ಮಾಡುವ ಸಾಮರ್ಥ್ಯ ಬರಲಿದೆ ಎಂದು ಸಂಸ್ಥೆ ಹೇಳಿದೆ. 

ಚೀನಾದಲ್ಲಿ ಶೇ.10ರಷ್ಟು ಸಾರಿಗೆ ವ್ಯವಸ್ಥೆಗೆ ಮೆಥನಾಲ್‌ ಬಳಕೆ ಮಾಡಲಾಗುತ್ತಿದೆ. ಆಸ್ಟ್ರೇಲಿಯಾ, ಸ್ವೀಡನ್‌, ಯುಎಸ್‌, ಜಪಾನ್‌ ಸೇರಿ ಅನೇಕ ರಾಷ್ಟ್ರಗಳಲ್ಲಿ ಮೆಥನಾಲ್‌ ಇಂಧನವನ್ನೇ ಹೆಚ್ಚು ಬಳಕೆ ಮಾಡಲಾಗುತ್ತಿದೆ. ಮೆಥನಾಲ್‌ನಲ್ಲಿ ಇಂಗಾಲದ ಉತ್ಪತ್ತಿ ತೀರಾ ಕಡಿಮೆಯಾಗಿರುವುದರಿಂದ ಪರಿಸರಕ್ಕೆ ಹಾನಿಯಾಗುವುದು ತಪ್ಪುತ್ತದೆ ಎಂದು ಸಂಸ್ಥೆ ವಿವರಿಸಿದೆ.