ಅಯ್ಯಪ್ಪ ಸನ್ನಿಧಿಗೆ ಮಹಿಳಾ ನಿಷೇಧ: ಸಂವಿಧಾನದ ಪ್ರಶ್ನೆ ಎತ್ತಿದ ಸುಪ್ರೀಂಕೋರ್ಟ್

0
22

ಶಬರಿಮಲೆ ಅಯ್ಯಪ್ಪ ಸ್ವಾಮಿ ದೇವಸ್ಥಾನದೊಳಕ್ಕೆ 10ರಿಂದ 50 ವರ್ಷದ ಮಹಿಳೆಯರಿಗೆ ಪ್ರವೇಶ ನಿರ್ಬಂಧ ಎನ್ನುವ ಧಾರ್ಮಿಕ ಸಂಪ್ರದಾಯವೂ ಸೇರಿದಂತೆ ಯಾವುದೇ ಧಾರ್ಮಿಕ ಆಚರಣೆಗಳು ಸಾಂವಿಧಾನಿಕ ತತ್ವಗಳಿಗೆ ಅನುಗುಣವಾಗಿರಬೇಕು ಎಂದು ಸುಪ್ರೀಂ ಕೋರ್ಟ್‌ ಜುಲೈ 24 ರ ಮಂಗಳವಾರ ಅಭಿಪ್ರಾಯಪಟ್ಟಿದೆ.

ಹೊಸದಿಲ್ಲಿ: ಶಬರಿಮಲೆ  ಅಯ್ಯಪ್ಪ ಸ್ವಾಮಿ ದೇವಸ್ಥಾನದೊಳಕ್ಕೆ 10 ರಿಂದ 50 ವರ್ಷದ ಮಹಿಳೆಯರಿಗೆ ಪ್ರವೇಶ ನಿರ್ಬಂಧ ಎನ್ನುವ ಧಾರ್ಮಿಕ ಸಂಪ್ರದಾಯವೂ ಸೇರಿದಂತೆ ಯಾವುದೇ ಧಾರ್ಮಿಕ ಆಚರಣೆಗಳು ಸಾಂವಿಧಾನಿಕ ತತ್ವಗಳಿಗೆ ಅನುಗುಣವಾಗಿರಬೇಕು ಎಂದು ಸುಪ್ರೀಂ ಕೋರ್ಟ್‌ ಜುಲೈ 24 ರ ಮಂಗಳವಾರ ಅಭಿಪ್ರಾಯಪಟ್ಟಿದೆ. 

ಪ್ರಕರಣದ ವಿಚಾರಣೆ ನಡೆಸುತ್ತಿರುವ ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ಪಂಚ ಸದಸ್ಯರ ಸಂವಿಧಾನ ಪೀಠ, ಸಂವಿಧಾನದ 25 ಮತ್ತು 26ನೇ ವಿಧಿ (ಧಾರ್ಮಿಕ ಆಚರಣೆಗಳ ಸ್ವಾತಂತ್ರ್ಯ)ಗಳನ್ನು ಉಲ್ಲೇಖಿಸುತ್ತಾ ಇಂತಹ ಆಚರಣೆಗಳಲ್ಲಿ ಕಾಯ್ದುಕೊಳ್ಳಬೇಕಾದ ಸಮಾನತೆಯ ಮಹತ್ವವನ್ನು ಮನವರಿಕೆ ಮಾಡಿಕೊಟ್ಟಿತು. ‘‘ಸಾರ್ವಜನಿಕರ ಆರೋಗ್ಯ, ಸಾರ್ವಜನಿಕ ಆದೇಶ ಮತ್ತು ನೈತಿಕತೆ ತಳಹದಿಯ ಮೇಲೆ ಮಾತ್ರ ನಿರ್ಬಂಧದಂತಹ ಕ್ರಮಗಳನ್ನು ಕೈಗೊಳ್ಳಬಹುದಾಗಿದೆ,’’ ಎಂದು ತಿಳಿಸಿತು. ‘‘ಸಂವಿಧಾನ ಜಾರಿಗೆ ಬಂದ 1950ರ ನಂತರ ಎಲ್ಲವೂ ಸಂವಿಧಾನದ ಆಶೋತ್ತರಗಳಿಗೆ ಬದ್ಧವಾಗಿ ನಡೆದು ಬಂದಿದೆ,’’ ಎಂದು ನ್ಯಾಯಮೂರ್ತಿಗಳಾದ ಆರ್‌.ಎಫ್‌.ನಾರಿಮನ್‌, ಎ.ಎಂ.ಖನ್ವಿಲ್ಕರ್‌, ಡಿ.ವೈ.ಚಂದ್ರಚೂಡ್‌ ಮತ್ತು ಇಂದೂ ಮಲ್ಹೋತ್ರಾ ಅವರನ್ನೂ ಒಳಗೊಂಡ ಪೀಠ ತಿಳಿಸಿತು. 

ಇದಕ್ಕೂ ಮೊದಲು ತಿರುವಾಂಕೂರು ದೇವಸ್ಥಾನ ಮಂಡಳಿ ಪರ ವಾದ ಮಂಡಿಸಿದ ಹಿರಿಯ ವಕೀಲ ಅಭಿಷೇಕ್‌ ಮನು ಸಿಂಘ್ವಿ, 800 ವರ್ಷಗಳಿಗಿಂತಲೂ ಹೆಚ್ಚು ಹಳೆಯದಾದ ಅಯ್ಯಪ್ಪ ದೇವಸ್ಥಾನದಲ್ಲಿ ಅಂದಿನಿಂದಲೂ ನಡೆದು ಬಂದ ಆಚರಣೆಗಳು ಸರಿಯಿವೆಯೋ ಇಲ್ಲವೋ ಎಂದು ಈಗ ಪರೀಕ್ಷಿಸಲು ಹೊರಟಿರುವುದು ಸರಿಯಲ್ಲ ಎಂದು ಪ್ರತಿಪಾದಿಸಿದರು. 

ಮಸೀದಿಗಳಲ್ಲಿ ನಿರ್ಬಂಧ: 
ಹಿಂದೂಗಳ ದೇವಸ್ಥಾನದಲ್ಲಿ ಮಾತ್ರವೇ ಮಹಿಳೆಯರ ಪ್ರವೇಶ ನಿರ್ಬಂಧವಿದೆ ಎಂದು ಭಾವಿಸುವುದು ತಪ್ಪು. ದೇಶಾದ್ಯಂತ ಯಾವ ಮಸೀದಿಯಲ್ಲೂ ಮಹಿಳೆಯರಿಗೆ ಪ್ರವೇಶ ನೀಡುವುದಿಲ್ಲ. ಇವು ನಂಬಿಕೆಯನ್ನು ಆಧರಿಸಿದ ಸಂಗತಿಗಳು. ಇಂತಹ ನಂಬಿಕೆಗಳನ್ನು ಪ್ರಶ್ನಿಸಲು ಹೊರಟರೆ ಮುಗಿಯದ ರಗಳೆ ಸೃಷ್ಟಿಯಾಗುತ್ತದೆ ಎಂದು ಸಿಂಘ್ವಿ ಹೇಳಿದರು. 

ದೈಹಿಕ ಕಾರಣಗಳಿಂದಾಗಿ ಮಹಿಳೆಯರಿಗೆ ನಿಷೇಧ ಹೇರಲಾಗಿದೆ. ಅಯ್ಯಪ್ಪನ ಮೇಲೆ ನಂಬಿಕೆ ಇರುವವರು ಇದನ್ನು ಹಲವು ವರ್ಷಗಳಿಂದ ಆಚರಿಸಿಕೊಂಡು ಬಂದಿದ್ದಾರೆ. ಧಾರ್ಮಿಕ ಆಚರಣೆಯ ಭಾಗವಾಗಿ ನಡೆದು ಬಂದಿರುವ ಈ ಪದ್ಧತಿಯನ್ನು ಅನುಷ್ಠಾನಕ್ಕೆ ತರುವುದು ದೇವಸ್ಥಾನ ಮಂಡಳಿಯ ಕರ್ತವ್ಯ ಎಂದು ವಾದಿಸಿದರು.