ಅಕ್ಟೋಬರ್‌ನಿಂದ ಏಕರೂಪದ ಡಿಎಲ್‌, ಆರ್‌ಸಿ

0
758

ಅಕ್ಟೋಬರ್‌ 1ರಿಂದ ದೇಶಾದ್ಯಂತ ಏಕರೂಪದ ಡ್ರೈವಿಂಗ್‌ ಲೈಸನ್ಸ್‌(ಡಿಎಲ್‌) ಮತ್ತು ನೋಂದಣಿ ಪ್ರಮಾಣ ಪತ್ರಗಳನ್ನು(ಆರ್‌ಸಿ) ವಿತರಿಸಲು ಕೇಂದ್ರ ಸರಕಾರ ಮುಂದಾಗಿದೆ. ಈ ನಿಟ್ಟಿನಲ್ಲಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಅಧಿಸೂಚನೆ ಹೊರಡಿಸಿದೆ. ನಕಲಿ ಅಥವಾ ಫೋರ್ಜರಿ ಮಾಡಿದ ದಾಖಲೆಗಳನ್ನು ತಡೆಯಲು ಇದು ಅನುಕೂಲಕರ.

ಹೊಸದಿಲ್ಲಿ: ಅಕ್ಟೋಬರ್‌ 1ರಿಂದ ದೇಶಾದ್ಯಂತ ಏಕರೂಪದ ಡ್ರೈವಿಂಗ್‌ ಲೈಸನ್ಸ್‌(ಡಿಎಲ್‌) ಮತ್ತು ನೋಂದಣಿ ಪ್ರಮಾಣ ಪತ್ರಗಳನ್ನು(ಆರ್‌ಸಿ) ವಿತರಿಸಲು ಕೇಂದ್ರ ಸರಕಾರ ಮುಂದಾಗಿದೆ. ಈ ನಿಟ್ಟಿನಲ್ಲಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಅಧಿಸೂಚನೆ ಹೊರಡಿಸಿದೆ. ನಕಲಿ ಅಥವಾ ಫೋರ್ಜರಿ ಮಾಡಿದ ದಾಖಲೆಗಳನ್ನು ತಡೆಯಲು ಇದು ಅನುಕೂಲಕರ. 

ಚಾಲನಾ ಪರವಾನಗಿ ಕುರಿತಾದ ತೊಡಕುಗಳನ್ನು ನಿವಾರಿಸುವ ನಿಟ್ಟಿನಲ್ಲಿ ಕೇಂದ್ರ ಸಾರಿಗೆ ಇಲಾಖೆ ಈ ಕ್ರಾಂತಿಕಾರಕ ಕ್ರಮಕ್ಕೆ ಮುಂದಾಗಿದೆ. ಒಂದೊಂದು ರಾಜ್ಯವು ಒಂದೊಂದು ವಿನ್ಯಾಸದ ಆರ್‌ಡಿ ಮತ್ತು ಡಿಎಲ್‌ಗಳನ್ನು ಈಗ ವಿತರಿಸುತ್ತಿವೆ. ಮುಂದಿನ ದಿನಗಳಲ್ಲಿ ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ವಿತರಿಸುವ ಡಿಎಲ್‌ ಮತ್ತು ಆರ್‌ಸಿಗಳ ನೋಟ, ಬಣ್ಣ, ವಿನ್ಯಾಸ ಮತ್ತು ಭದ್ರತಾ ವೈಶಿಷ್ಟ್ಯಗಳು ಒಂದೇ ರೀತಿಯಾಗಿ ಇರಲಿವೆ. 

ಹೊಸ ಡಿಎಲ್‌ ಮತ್ತು ಆರ್‌ಸಿಗಳಲ್ಲಿ ಕ್ಯೂಆರ್‌ ಕೋಡ್‌ ಇರಲಿದೆ. ಕೇಂದ್ರೀಯ ಆನ್‌ಲೈನ್‌ ಡೇಟಾಬೇಸ್‌ನಲ್ಲಿ ಚಾಲಕ ಮತ್ತು ವಾಹನಕ್ಕೆ ಸಂಬಂಧಿಸಿದ ವಿವರಗಳನ್ನು ಸಂಗ್ರಹಿಸಿ, ಸುಲಭ ಮತ್ತು ತ್ವರಿತವಾಗಿ ವಿವರಗಳ ಪರಾಮರ್ಶೆಗೆ ಅವಕಾಶ ಕಲ್ಪಿಸಲಾಗುತ್ತದೆ. 

ಏನಿದರ ಪ್ರಯೋಜನ?
‘ಸ್ಮಾರ್ಟ್‌ ಡಿಎಲ್‌’ ಮತ್ತು ‘ಆರ್‌ಸಿ’ಗಳು ಮೈಕ್ರೋಚಿಪ್‌, ಕ್ಯೂಆರ್‌ ಕೋಡ್‌, ಎನ್‌ಎಫ್‌ಸಿ(ನಿಯರ್‌ ಫೀಲ್ಡ… ಕಮ್ಯುನಿಕೇಶನ್‌) ವೈಶಿಷ್ಟ್ಯಗಳನ್ನು ಹೊಂದಿರಲಿವೆ. ಎಟಿಎಂ ಕಾರ್ಡ್‌ ಮತ್ತು ಮೆಟ್ರೊ ಕಾರ್ಡ್‌ ರೀತಿಯಲ್ಲೇ ಇವುಗಳನ್ನು ಬಳಸಬಹುದಾಗಿದೆ. ಇದರಿಂದ ಟ್ರಾಫಿಕ್‌ ಪೊಲೀಸರು ತಮ್ಮ ಬಳಿ ಇರುವ ವಿಶೇಷ ಸಾಧನಗಳ ಮೂಲಕ (ಹ್ಯಾಂಡ್‌ ಹೆಲ್ಡ್‌ ಡಿವೈಸ್‌) ಈ ಕಾರ್ಡ್‌ಗಳನ್ನು ಸ್ಕ್ಯಾ‌ನ್‌ ಮಾಡಿ ಎಲ್ಲ ವಿವರಗಳನ್ನೂ ತಕ್ಷಣ ಪಡೆಯಬಹುದಾಗಿದೆ. 

ಪ್ರಸ್ತುತ ಪೊಲೀಸರು ತಮ್ಮ ಸಾಧನಕ್ಕೆ ಡಿಎಲ್‌ ಅಥವಾ ಆರ್‌ಸಿ ಸಂಖ್ಯೆಯನ್ನು ನಮೂದಿಸಬೇಕಾದರೆ ಅದನ್ನು ಟೈಪಿಸಿ ಬೇಕು. ಆದರೆ ಮುಂದೆ ಕ್ಯೂಆರ್‌ ಕೋಡ್‌ ಸ್ಕ್ಯಾ‌ನ್‌ ಮಾಡುವ ಮೂಲಕ ಅಥವಾ ‘ಎನ್‌ಎಫ್‌ಸಿ’ ಹೊಂದಿರುವ ಕಾರ್ಡ್‌ ಅನ್ನು ಸಾಧನಕ್ಕೆ ಸ್ಪರ್ಶಿಸುವ ಮೂಲಕ ವಿವರ ಪಡೆಯಬಹುದು. 

ವಾಹನದ ಮಾಲಿನ್ಯದ ಪ್ರಮಾಣ ಮತ್ತು ಇತರ ನಿಯಮಗಳನ್ನು ಆರ್‌ಸಿ ಕಾರ್ಡ್‌ನಲ್ಲೇ ಅಳವಡಿಸಲಾಗಿರುತ್ತದೆ. ಇದರಿಂದ ಮಾಲಿನ್ಯ ಪರೀಕ್ಷೆಯ ವೇಳೆ ಅನುಕೂಲವಾಗುತ್ತದೆ. 

ಚಾಲಕನು ಅಂಗಾಂಗ ದಾನಕ್ಕೆ ಘೋಷಣೆ ಮಾಡಿದ್ದರೆ, ಆ ಅಂಶವನ್ನು ಸ್ಮಾರ್ಟ್‌ ಕಾರ್ಡ್‌ನಲ್ಲಿ ದಾಖಲಿಸಲಾಗುತ್ತದೆ. 

ವಿತರಣೆಯ ಬಗೆ ಹೇಗೆ?
ಹೊಸದಾಗಿ ಅರ್ಜಿ ಸಲ್ಲಿಸುವ ವ್ಯಕ್ತಿಗಳಿಗೆ ಅತ್ಯಾಧುನಿಕ ಡಿಎಲ್‌ ಮತ್ತು ಆರ್‌ಸಿಗಳನ್ನು ಅ.1ರಿಂದ ವಿತರಿಸಲಾಗುತ್ತದೆ. ಈಗಾಗಲೇ ಡಿಎಲ್‌ ಅಥವಾ ಆರ್‌ಸಿ ಪಡೆದಿರುವವರಿಗೆ ಅವುಗಳ ನವೀಕರಣದ ವೇಳೆ ಹೊಸ ಕಾರ್ಡ್‌ಗಳ ವಿತರಿಸಲಾಗುತ್ತದೆ. 

ಒಂದೇ ವಿನ್ಯಾಸ, ಬಣ್ಣ, ಭದ್ರತಾ ವೈಶಿಷ್ಟ್ಯ, ಮೈಕ್ರೊ ಚಿಪ್‌, ಕ್ಯೂಆರ್‌ ಕೋಡ್‌ ಬಳಕೆ, ಎಟಿಎಂ, ಮೆಟ್ರೊ ಕಾರ್ಡ್‌ ರೀತಿ ಬಳಕೆ, ಮಾಲಿನ್ಯ ಪರೀಕ್ಷೆ ವಿವರವೂ ದಾಖಲು. 

ದೇಶದಲ್ಲಿ ಪ್ರತಿ ದಿನ 32,000 ಡಿಎಲ್‌ಗಳ ವಿತರಣೆ/ನವೀಕರಣವಾಗುತ್ತಿದೆ. 43,000 ಹೊಸ ವಾಹನಗಳು ನೋಂದಣಿ/ಮರು-ನೋಂದಣಿಯಾಗುತ್ತವೆ.