ಅಂದುಕೊಂಡಕ್ಕಿಂತ ವೇಗದಲ್ಲಿ ವೃದ್ಧಾಪ್ಯಕ್ಕೆ ಜಾರುತ್ತಿದೆ ಭಾರತ

0
5

ವಿಶ್ವದಲ್ಲಿಯೇ ಅತಿ ಹೆಚ್ಚು ಮಾನವ ಸಂಪನ್ಮೂಲ ಹೊಂದಿರುವ ಹೆಗ್ಗಳಿಕೆ ಭಾರತದ್ದು. ಪ್ರಸ್ತುತ ಭಾರತ ಯುವ ದೇಶವೆಂಬ ಹುಮ್ಮಸ್ಸಿನಲ್ಲಿದೆ. ಜನಸಂಖ್ಯೆಯ ಬಹುಪಾಲು ಯವಜನರೇ ಇರುವ `ಆರೋಗ್ಯಕಾರಿ ಯುವದೇಶ’ ನಮ್ಮದು ಎಂಬ ಹೆಮ್ಮೆಯಲ್ಲಿ ತೇಲಾಡುತ್ತಿದೆ. ಆದರೆ, ಕೆಲವೇ ವರ್ಷಗಳಲ್ಲಿ ಭಾರತವೂ ವೃದ್ಧರ ದೇಶವಾಗಿ ಬದಲಾಗಲಿದೆ. 2050ರ ವೇಳೆಗೆ ಭಾರತದಲ್ಲಿ 60 ವಯಸ್ಸನ್ನು ದಾಟಿದ ಜನರ ಸಂಖ್ಯೆ ಸುಮಾರು 34 ಕೋಟಿ ಇರಲಿದೆ ಎಂದು ಅಂದಾಜಿಸಲಾಗಿದೆ.

ಹೊಸದಿಲ್ಲಿ: ವಿಶ್ವದಲ್ಲಿಯೇ ಅತಿ ಹೆಚ್ಚು ಮಾನವ ಸಂಪನ್ಮೂಲ ಹೊಂದಿರುವ ಹೆಗ್ಗಳಿಕೆ ಭಾರತದ್ದು. ಪ್ರಸ್ತುತ ಭಾರತ ಯುವ ದೇಶವೆಂಬ ಹುಮ್ಮಸ್ಸಿನಲ್ಲಿದೆ. ಜನಸಂಖ್ಯೆಯ ಬಹುಪಾಲು ಯವಜನರೇ ಇರುವ `ಆರೋಗ್ಯಕಾರಿ ಯುವದೇಶ’ ನಮ್ಮದು ಎಂಬ ಹೆಮ್ಮೆಯಲ್ಲಿ ತೇಲಾಡುತ್ತಿದೆ. ಆದರೆ, ಕೆಲವೇ ವರ್ಷಗಳಲ್ಲಿ ಭಾರತವೂ ವೃದ್ಧರ ದೇಶವಾಗಿ ಬದಲಾಗಲಿದೆ. 2050ರ ವೇಳೆಗೆ ಭಾರತದಲ್ಲಿ 60 ವಯಸ್ಸನ್ನು ದಾಟಿದ ಜನರ ಸಂಖ್ಯೆ ಸುಮಾರು 34 ಕೋಟಿ ಇರಲಿದೆ ಎಂದು ಅಂದಾಜಿಸಲಾಗಿದೆ. 

ಲೋಕಸಭೆಯಲ್ಲಿ ಸಹಾಯಕ ಆರೋಗ್ಯ ಸಚಿವೆ ಅನುಪ್ರಿಯಾ ಪ್ರಿಯಾ ಬಹಿರಂಗಪಡಿಸಿರುವ ಅಂಕಿಅಂಶಗಳ ಪ್ರಕಾರ 2050ರಲ್ಲಿ ಭಾರತದಲ್ಲಿ ವೃದ್ಧರ ಸಂಖ್ಯೆ ವಿಶ್ವಸಂಸ್ಥೆ ಮತ್ತು ಇತರ ಏಜೆನ್ಸಿಗಳು ಲೆಕ್ಕ ಹಾಕಿದ್ದಕ್ಕಿಂತ ವೇಗವಾಗಿ ವೃದ್ಧಿಸಲಿದೆ. ಒಟ್ಟಾರೆ ಜನಸಂಖ್ಯೆಯಲ್ಲಿ ವೃದ್ಧರ ಸಂಖ್ಯೆ, ಅದರಲ್ಲೂ ವಿಧವೆಯರು ಮತ್ತು ಅವಲಂಬಿತ ಮಹಿಳೆಯರ ಪಾಲು ಹೆಚ್ಚಿರಲಿದೆ ಎಂದು ಕೇಂದ್ರ ಸರಕಾರದ ಅಂಕಿ ಅಂಶ ಹೇಳಿದೆ. 2050 ರಲ್ಲಿ ಭಾರತದಲ್ಲಿ 60ವರ್ಷ ದಾಟಿದವರ ಸಂಖ್ಯೆ 31.68 ಕೋಟಿ ಏರಲಿದೆ ಎಂದು ವಿಶ್ವಸಂಸ್ಥೆ ಲೆಕ್ಕ ಹಾಕಿತ್ತು. ಹೆಲ್ಪ್ ಏಜ್ ಇಂಡಿಯಾ 32.4 ಕೋಟಿ ಎಂದು ಅಂದಾಜಿಸಿತ್ತು. ಆದರೆ ಕೇಂದ್ರ ಸರಕಾರ ನೀಡಿರುವ ಅಂಕಿ ಅಂಶ ಈ ಎಲ್ಲ ಲೆಕ್ಕಾಚಾರಗಳನ್ನು ಬುಡಮೇಲು ಮಾಡಿದೆ. 

0-14 ವಯಸ್ಸಿನ ಜನಸಂಖ್ಯಾ ಬೆಳವಣಿಗೆ ದರ ಕ್ಷೀಣಿಸುತ್ತಿದೆ ಆದರೆ ಹಿರಿಯ ಜನ ಸಂಖ್ಯೆ ಹೆಚ್ಚಳವಾಗುತ್ತಿದೆ ಎಂದು ಪಟೇಲ್ ಶುಕ್ರವಾರ ಲೋಕಸಭೆಯಲ್ಲಿ ತಿಳಿಸಿದ್ದಾರೆ. ಇವೆಲ್ಲದರ ಮಧ್ಯೆ ಸಮಾಧಾನಕಾರ ಸಂಗತಿ ಎಂದರೆ ಆದರೆ ಚೀನಾಕ್ಕೆ ಹೋಲಿಸಿದರೆ ಭಾರತದಲ್ಲಿ ವಯಸ್ಸಿನ ಹಂಚಿಕೆ ಉತ್ತಮವಾಗಿದೆ. ಒಂದು ಮಗು ಪಾಲಿಸಿಯಿಂದಾಗಿ ಚೀನಾದಲ್ಲಿ ಒಟ್ಟಾರೆ ಜನಸಂಖ್ಯೆ ಮತ್ತು ದುಡಿಯುವ ವಯೋಮಾನದ ಜನಸಂಖ್ಯೆ ತಗ್ಗುತ್ತಿದೆ.

ಯುನೈಟೆಡ್ ನೇಷನ್ಸ್ ಪಾಪ್ಯುಲೇಶನ್ ಫಂಡ್ ಬಿಡುಗಡೆ ಮಾಡಿರುವ “ಇಂಡಿಯಾ ಏಜಿಂಗ್ ರಿಪೋರ್ಟ್ 2017” ಪ್ರಕಾರ, 60 ನೇ ವಯಸ್ಸಿಗಿಂತ ಹೆಚ್ಚಿನ ಜನಸಂಖ್ಯೆಯು 2015 ರಲ್ಲಿ 8% ಇದ್ದಿದ್ದು 2050 ರಲ್ಲಿ 19% ಕ್ಕೆ ಏರಿಕೆ ಕಾಣಲಿದೆ. ಈ ಶತಮಾನದ ಅಂತ್ಯದ ವೇಳೆಗೆ ಒಟ್ಟು ಜನಸಂಖ್ಯೆಯಲ್ಲಿ ಹಿರಿಯರೇ 34% ಇರಲಿದ್ದಾರೆ . 2000-2050ರ ಅವಧಿಯಲ್ಲಿ ಭಾರತದ ಒಟ್ಟಾರೆ ಜನಸಂಖ್ಯೆ 56% ರಷ್ಟು ಹೆಚ್ಚಾಗಲಿದೆ. 

ವರದಿಯ ಪ್ರಕಾರ, ಭಾರತದ ಜನಸಂಖ್ಯೆಯಲ್ಲಿ ವಿಶಿಷ್ಟ ಲಕ್ಷಣವೊಂದಿದ್ದು ವಯಸ್ಸಿನ ಹಂಚಿಕೆಯಲ್ಲಿ ಅಂತರ-ರಾಜ್ಯ ಅಸಮಾನತೆ ಇದೆ. ಉದಾಹರಣೆಗೆ, ದಕ್ಷಿಣದ ರಾಜ್ಯಗಳು ಸೇರಿದಂತೆ ಹಿಮಾಚಲ ಪ್ರದೇಶ, ಮಹಾರಾಷ್ಟ್ರ, ಒಡಿಶಾ ಮತ್ತು ಪಂಜಾಬ್‌ ಹೆಚ್ಚಿನ ಹಿರಿಯರನ್ನು ಹೊಂದಿರಲಿದೆ. ಮಧ್ಯ ಮತ್ತು ಉತ್ತರ ರಾಜ್ಯಗಳಲ್ಲಿ ಹಿರಿಯರ ಪ್ರಮಾಣ ಕಡಿಮೆ ಇರಲಿದೆ.