ఆరోసారి ప్రపంచ ఛాంపియన్.. చరిత్రకెక్కిన మేరీ కోమ్

    0
    5

    న్యూ ఢిల్లీలో భారత అభిమానుల మధ్యలో బంగారు పతకం గెలవడం మేరీ కోమ్‌కు ఇది రెండోసారి. గతంలో 2006లో న్యూఢిల్లీలో జరిగిన ప్రపంచ ఛాంపియన్‌షిప్‌లో మేరీ కోమ్ గోల్డ్ మెడల్ సొంతం చేసుకుంది.

    భారత స్టార్ బాక్సర్ ఎంసీ మేరీ కోమ్ కొత్త చరిత్ర సృష్టించింది. ఈ మణిపురి బాక్సర్ మహిళల ప్రపంచ బాక్సింగ్ ఛాంపియన్‌షిప్‌లో రికార్డు స్థాయిలో ఆరోసారి బంగారు పతకం సాధించింది. దీంతో అత్యధిక సార్లు ఈ ఈవెంట్‌లో గోల్డ్ మెడల్ గెలిచిన మహిళా బాక్సర్‌గా మేరీ చరిత్రకెక్కింది. న్యూఢిల్లీలో శనివారం జరిగిన ఫైనల్లో 35 ఏళ్ల మేరీ కోమ్.. ఉక్రెయిన్‌ బాక్సర్ హన్నా ఒఖోటాను ఓడించింది. 48 కేజీలో విభాగంలో పోటీపడిన మేరీ కోమ్.. ఫైనల్‌లో 5-0 తేడాతో విజయం సాధించి ఆరో బంగారు పతకం కొల్లగొట్టింది. న్యూ ఢిల్లీలో భారత అభిమానుల మధ్యలో బంగారు పతకం గెలవడం మేరీ కోమ్‌కు ఇది రెండోసారి. గతంలో 2006లో న్యూఢిల్లీలో జరిగిన ప్రపంచ ఛాంపియన్‌షిప్‌లో మేరీ కోమ్ గోల్డ్ మెడల్ సొంతం చేసుకుంది.

    ప్రపంచ ఛాంపియన్‌షిప్ చరిత్రలోనే అత్యధిక సార్లు సెమీఫైనల్స్‌కు వెళ్లిన మహిళా బాక్సర్‌గా ఇప్పటికే మేరీ కోమ్ చరిత్రకెక్కింది. కాగా, 22 ఏళ్ల ఒఖోటాను ఓడించడం ఈ ఏడాదిలో మేరీ కోమ్‌కు ఇది రెండో సారి. ఈ ఏడాది ప్రారంభంలో పోలాండ్‌లో జరిగిన సెలిసియన్ ఇంటర్నేషన్ బాక్సింగ్ ఛాంపియన్‌షిప్స్‌లోనూ ఒఖోటాను మేరీ ఓడించింది.

    ఇదిలా ఉంటే, ఈ ఈవెంట్‌లో పాల్గొనడానికి ముందు మేరీ కోమ్ ఖాతాలో ఐదు బంగారు పతకాలు, ఒక రజత పతకం ఉండేవి. 2010 తరవాత ప్రపంచ ఛాంపియన్‌షిప్‌లో మేరీ కోమ్ పతకం గెలవడం ఇదే తొలిసారి. 2010లో 48 కేజీల విభాగంలో మేరీ కోమ్ బంగారు పతకం సాధించింది. ఈ ఛాంపియన్‌షిప్‌కు ముందు మేరీ కోమ్ మొత్తం ఆరు పతకాలతో ఐరిష్ దిగ్గజం కేటీ టేలర్ (ఐదు బంగారు పతకాలు, ఒక కాంస్య పతకం) సరసన ఉండేది. ఇప్పుడు మేరీ ఆరో బంగారు పతకం నెగ్గి మహిళ జాబితాలో అగ్రస్థానంలో నిలిచింది. అలాగే, పురుషుల విభాగంలో ఐరు సార్లు ప్రపంచ ఛాంపియన్ అయిన ఫెలిక్స్ సావన్ సరసన మేరీ కోమ్ నిలిచింది.

    ప్రపంచ ఛాంపియన్‌షిప్‌లో సంవత్సరాల వారీగా మేరీ కోమ్ పతకాలు
    సిల్వర్ మెడల్ – 2001

    గోల్డ్ మెడల్ – 2002, 2005, 2006, 2008, 2010, 2018