क्रिकेटवरील सट्टेबाजी कायदेशीर करण्याची मागणी

0
6

भारतीय क्रिकेटमधील भ्रष्टाचाराची समस्या दूर करण्यासाठी मॅच फिक्सिंगशी संबंधित नियम करण्यात यावेत, तसेच क्रिकेटवरील सट्टेबाजी कायदेशीर करण्यात यावी. त्यामुळं सरकारचा मोठा फायदा होईल, असं मत बीसीसीआयच्या भ्रष्टाचारविरोधी विभागाचे प्रमुख अजितसिंग शेखावत यांनी व्यक्त केलं आहे. शेखावत हे याआधी राजस्थानचे पोलीस महासंचालक होते.

गेल्या वर्षभरात राष्ट्रीय आणि आंतरराष्ट्रीय क्रिकेटपटूंसहित बारा खेळाडूंविरोधात भ्रष्टाचाराशी संबंधित तक्रारी, तसंच संशयाच्या भोवऱ्यात सापडलेली तामिळनाडू प्रीमिअर लीग आणि महिला क्रिकेटपटू सट्टेबाजांच्या संपर्कात आल्याच्या घटना समोर आल्या आहेत. त्या पार्श्वभूमीवर शेखावत यांनी मॅच फिक्सिंगसंबंधी नियम आणि क्रिकेटवरील सट्टेबाजी कायदेशीर करण्याची शिफारस केली आहे.

सट्टेबाजी कायदेशीर केली तर भ्रष्टाचार नियंत्रणात आणता येईल, तसंच या माध्यमातून सरकारला मोठ्या प्रमाणात महसूलही मिळेल, असंही शेखावत यांनी सांगितलं. सट्टेबाजी कायदेशीर केल्यानंतर कोण सट्टेबाजी करतो आणि किती रकमेचा सट्टा लावला जातो, याची आकडेवारीही मिळू शकेल, असंही ते म्हणाले.